ពូត្រាចាយ៉ា៖ លទ្ធភាពកើតបាតុភូតអែលនីញ៉ូ ដែលជាទូទៅនាំមកនូវអាកាសធាតុក្តៅ និងស្ងួតជាងធម្មតា ឈានដល់កម្រិតខ្លាំងបំផុត ឬហៅថា មហាអែលនីញ៉ូ (Super El Niño) នឹងកើតឡើងនៅចន្លោះខែតុលា និងខែធ្នូ ឆ្នាំ២០២៦នេះ។
អគ្គនាយកដ្ឋានឧតុនិយមម៉ាឡេស៊ី បាននិយាយថា ការព្យាករណ៍នេះ គឺផ្អែកលើនិន្នាការកើនឡើងយ៉ាងខ្លាំង ចាប់តាំងពីពាក់កណ្តាលឆ្នាំនេះ រួមជាមួយការសង្កេតប្រចាំសប្តាហ៍ថ្មីៗ ដែលបង្ហាញថា សីតុណ្ហភាពផ្ទៃសមុទ្រខ្ពស់ជាងមធ្យមភាគអាកាសធាតុរយៈពេលវែងជាង១,៨អង្សាសេ។
លោកអគ្គនាយនៃនាយកកដ្ឋានឧតុនិយម បានមានប្រសាសន៍ថា «ស្ថានភាពនេះបង្ហាញថា បាតុភូតអែលនីញ៉ូកំពុងបន្តកាន់តែខ្លាំង ហើយត្រូវបានព្យាករថា នឹងឈានដល់កម្រិតកំពូលនៅចុងឆ្នាំ២០២៦។ លទ្ធភាពអាចកើតមហាអែលនីញ៉ូ បានឡើងខ្ពស់ជាង៩០ភាគរយ ដោយផ្អែកលើការព្យាករណ៍ចុងក្រោយពីគំរូអាកាសធាតុអន្តរជាតិ»។
លោកបាននិយាយថា លំនាំអាកាសធាតុសកលបច្ចុប្បន្នបង្ហាញថា បាតុភូតអែលនីញ៉ូ ឆ្នាំ២០២៦-២០២៧ អាចស្ថិតក្នុងចំណោមព្រឹត្តិការណ៍អែលនីញ៉ូដ៏ខ្លាំងបំផុតក្នុងប្រវត្តិសាស្ត្រ ហើយផលប៉ះពាល់របស់វាអាចខ្លាំងជាង ឬយ៉ាងហោចណាស់ស្មើនឹងអែលនីញ៉ូ ដ៏ខ្លាំងបំផុតនៅ ឆ្នាំ១៩៩៧-១៩៩៨ និងខ្លាំងជាងឆ្នាំ២០១៥-២០១៦។
ក្នុងអំឡុងព្រឹត្តិការណ៍អែលនីញ៉ូ ឆ្នាំ១៩៩៧-១៩៩៨ សីតុណ្ហភាពខ្ពស់បំផុតរបស់ប្រទេសម៉ាឡេស៊ី គឺ៤០,១អង្សាសេ នៅថ្ងៃទី៩ ខែមេសា ឆ្នាំ១៩៩៨។ ចំណែកក្នុងអំឡុងព្រឹត្តិការណ៍អែលនីញ៉ូ ឆ្នាំ២០១៥-២០១៦ សីតុណ្ហភាពខ្ពស់បំផុតនៅក្នុងប្រទេសម៉ាឡេស៊ី បានឡើងដល់៣៩,៣អង្សាសេ នៅថ្ងៃទី១០ ខែមេសា ឆ្នាំ២០១៦។
លោកបាននិយាយថា «បទពិសោធន៍ក្នុងអំឡុងពេលព្រឹត្តិការណ៍មហាអែលនីញ៉ូ នៅឆ្នាំទាំងនោះ បានបង្ហាញថា ប្រទេសម៉ាឡេស៊ីជួបប្រទះអាកាសធាតុក្តៅ និងស្ងួតជាងធម្មតា ព្រមទាំងមានការថយចុះយ៉ាងខ្លាំងនៃបរិមាណទឹកភ្លៀង តាមតំបន់មួយចំនួននៅចុងរដូវមូសុងឦសាន និងក្នុងអំឡុងពេលអន្តរមូសុង ចាប់ពីខែកុម្ភៈដល់ខែឧសភា»។
អ្នកវិទ្យាសាស្ត្រ បានព្យាករណ៍ថា បាតុភូតអែលនីញ៉ូ នាពេលបច្ចុប្បន្ននឹងបន្តឡើងកម្ដៅបន្ថែមទៀត នៅក្នុងឆមាសទីពីរនៃឆ្នាំ២០២៦នេះ ដោយកម្រិតវាយប្រហារខ្លាំងបំផុត អាចនឹងកើតឡើងនៅអំឡុងខែវិច្ឆិកា និងខែធ្នូ។
បាតុភូតអែលនីញ៉ូ កើតឡើងនៅពេលទឹកសមុទ្រនៅតំបន់ប៉ាស៊ីហ្វិកភាគកណ្តាល និងភាគខាងកើត កើនកម្ដៅខុសពីធម្មតា ដែលជះឥទ្ធិពលយ៉ាងខ្លាំងដល់ចរន្តបរិយាកាស និងអាកាសធាតុនៅទូទាំងពិភពលោក។
យោងតាមសេចក្តីការណ៍ជាច្រើន បានឱ្យដឹងថា បាតុភូតអែលនីញ៉ូ ដែលកំពុងកើតមានឡើងនៅក្នុងតំបន់ប៉ាស៊ីហ្វិកត្រពិច ដើរទន្ទឹមនឹងសញ្ញាបង្ហាញថា វានឹងក្លាយជាព្រឹត្តិការណ៍អាកាសធាតុដ៏ខ្លាំងក្លាខុសពីធម្មតា។ អ្នកស្រាវជ្រាវបានព្រមានថា កម្រិតកម្ដៅ ដែលឡើងដល់កំពូលនាចុងឆ្នាំនេះ អាចនឹងរុញច្រានសីតុណ្ហភាពពិភពលោក ឱ្យកើនឡើងដល់កម្រិតក្តៅបំផុតមិនធ្លាប់មានពីមុនមក។
បច្ចុប្បន្ន សីតុណ្ហភាពផ្ទៃទឹកសមុទ្រនៅតាមបណ្តោយតំបន់អេក្វាទ័រប៉ាស៊ីហ្វិក បានឈានដល់កម្រិតមហាអែលនីញ៉ូ រួចទៅហើយ។ ទោះជាយ៉ាងណាក៏ដោយ ក្រុមអ្នកស្រាវជ្រាវ កំពុងតាមដានយ៉ាងយកចិត្តទុកដាក់លើចរន្តកម្ដៅដ៏ធំធេង ដែលកប់នៅក្រោមបាតសមុទ្រ ដែលកម្ដៅក្រោមទឹកនេះ អាចនឹងងើបឡើងមកលើផ្ទៃទឹកនៅប៉ុន្មានខែខាងមុខទៀត ហើយរឹតតែធ្វើឱ្យបាតុភូតនេះ កាន់តែមានកម្លាំងខ្លាំងក្លាថែមមួយកម្រិតទៀត៕ (អៀវ ឈៀងនី)
