កាណាដា៖ ខណៈពេលសាច់គោនាំចូលពីប្រទេសអូស្ត្រាលី មានតម្លៃធូរថ្លៃជាង ដែលធ្វើឲ្យអ្នកទិញងាយស្រួលសម្រេចចិត្តរើសដាក់ក្នុងកន្ត្រកទិញអីវ៉ាន់ជាងសាច់គោ ដែលផលិតនៅក្នុងប្រទេសកាណាដា ដូច្នេះអ្នកជំនាញផ្នែកសាច់គោម្នាក់ ប្រចាំខេត្តសាស្កាតឈីវ៉ាន់ (Saskatchewan) ប្រទេសកាណាដា បានផ្តល់ជាមតិ និងការពិចារណាខ្លះៗសម្រាប់អ្នកប្រើប្រាស់។
លោក ជេហ្វ្រី យោហ្គា (Jeffrey Yorga) អតីតប្រធានសមាគមអ្នកចិញ្ចឹមសត្វ ខេត្តសាស្កាតឈីវ៉ាន់ បានលើកឡើងថា ទីផ្សារសាច់គោ គឺជាទីផ្សារសកល ប៉ុន្តែវាមិនមែនមានន័យថា សាច់គោទាំងអស់សុទ្ធតែមានគុណភាពដូចគ្នានោះទេ។ ភាពខុសគ្នានៃតម្លៃរវាងផលិតផលទាំងពីរនេះ មិនសូវពាក់ព័ន្ធនឹងចម្ងាយនៃការដឹកជញ្ជូនផ្លូវឆ្ងាយនោះទេ ប៉ុន្តែវាអាស្រ័យទៅលើគុណភាព នៃសាច់គោផ្ទាល់តែម្តង។
លោកបាននិយាយថា សាច់គោអូស្ត្រាលី មិនដូចសាច់គោមកពីខេត្តអាល់ប៊ឺតា (Alberta) ឬសាច់គោផ្សេងទៀត ដែលផលិតនៅក្នុងប្រទេសកាណាដានោះទេ។ សាច់គោមកពីអូស្ត្រាលីខ្លះមិនមានការវាយតម្លៃចំណាត់ថ្នាក់ច្បាស់លាស់ឡើយ ដូច្នេះអ្នកទិញមិនអាចប្រាកដប្រជាពីគុណភាពនៃសាច់ដែលពួកគេកំពុងទិញ ដូចជាការទិញសាច់គោរបស់កាណាដានោះទេ។ ទោះបីជាមើលទៅវាជាសាច់ដុំដូចគ្នា ប៉ុន្តែគុណភាពមិនដូចគ្នាទេ ដូច្នេះយើងមិនអាចយកវាមកប្រៀបធៀបស្មើគ្នាបានឡើយ។
លោកបានពន្យល់បែបនេះថា សាច់គោនាំចូលពីអូស្ត្រាលីភាគច្រើន គឺបានមកពីគោស៊ីស្មៅធម្មតាៗ មិនមានការផ្ទៀងផ្ទាត់អាយុកាលរបស់សត្វច្បាស់លាស់ ហើយក៏មិនមានការបំប៉នចំណីឲ្យបានត្រឹមត្រូវមុនពេលសម្លាប់យកសាច់នោះដែរ គឺមិនទាន់បំប៉នឱ្យគ្រប់ស្តង់ដារនៅឡើយទេ។
អ្នកជំនាញផ្នែកសាច់គោរូបនេះបានអះអាងថា សាច់គោប្រចាំប្រទេសកាណាដា គឺស្ថិតនៅកម្រិត AAA គឺមានឈ្មោះល្បីលើទីផ្សារពិភពលោក។ វាជាផលិតផលខុសគ្នាស្រឡះ។ សាច់គោរបស់កាណាដា ត្រូវបានបែងចែកចំណាត់ថ្នាក់គុណភាពច្បាស់ៗដូចជា កម្រិត អេវ័ន A, អេធូ AA, និងអេស្រ៊ី AAA ឬកម្រិតប្រណីត (Prime)។ លើសពីនេះ វាក៏មានការពិនិត្យអាយុកាលច្បាស់លាស់ ដែលធានាថា សាច់គោទាំងនោះបានមកពីសត្វគោមានអាយុនៅក្មេង និងមានការកំណត់កម្រិតជាតិខ្លាញ់រុំសរសៃសាច់ (Marbling) ដើម្បីធានាថា ពេលយកទៅធ្វើម្ហូប គឺមានរសជាតិឆ្ងាញ់ និងទន់ល្អ។
លោកបាននិយាយថា ចំណែកឯសាច់គោអូស្ត្រាលី ដែលជាប្រភេទថោកៗ គឺមិនមានលក្ខខណ្ឌទាំងនេះទេ។ គេមិនដឹងអាយុកាលពិតប្រាកដ ហើយក៏គ្មានការកំណត់កម្រិតជាតិខ្លាញ់សរសៃសាច់អប្បបរមាដែរ។ វាអាចជាសាច់បានមកពីសត្វនៅក្មេង ឬក៏អាចបានមកពីមេគោចាស់ក៏ថាបាន។
លោកមានប្រសាសន៍ថា នៅក្នុងស្ថានភាពបច្ចុប្បន្ន ដែលតម្លៃសាច់គោសម្រាប់អ្នកប្រើប្រាស់កំពុងឡើងថ្លៃខ្ពស់ជាងពេលណាៗទាំងអស់ យើងត្រូវតែយោគយល់ពីចំណុចនេះ។ ការណ៍ដែលហាងនានាផ្តល់ជម្រើសសាច់គោមានតម្លៃថោកជាងជូនអតិថិជន គឺជារឿងវិជ្ជមាន ប៉ុន្តែវាក៏ជាចំណុចមួយ ដែលអ្នកនៅក្នុងឧស្សាហកម្មនេះត្រូវដឹងផងដែរ។
លោក ជេហ្វ្រី យោហ្គា បានលើកទឹកចិត្តឲ្យអ្នកប្រើប្រាស់ទាំងអស់ ងាកមកគាំទ្រសាច់គោរបស់កាណាដា ហើយលោកក៏បានណែនាំដែរថា សម្រាប់អ្នកទិញណា ដែលចង់សន្សំសំចៃថវិកា អាចសាកល្បងប្រើវិធីចម្អិន ឬវិធីផ្អាប់គ្រឿងផ្សេងៗ ដើម្បីជួយឲ្យសាច់គោមានតម្លៃថោកនោះ មានរសជាតិឆ្ងាញ់ជាងមុន។
លោកបានប្រាប់ថា មូលហេតុដែលធ្វើឲ្យសាច់គោឡើងថ្លៃ គឺដោយសារតែការខ្វះខាតការផ្គត់ផ្គង់ ព្រោះសាច់គោមានតិចជាងតម្រូវការ។ ក្នុងរយៈពេល២៥ឆ្នាំកន្លងមកនេះ អ្នកចិញ្ចឹមគោជាច្រើនបានបោះបង់ចោលមុខរបរនេះ ដោយសារតែកាលនោះសាច់គោមានតម្លៃថោកហួសហេតុ។
លោកបានបន្តថា៖ បច្ចុប្បន្ន ចំនួនសត្វគោលែងមានច្រើនដូចមុនទៀតហើយ សម្រាប់ការផលិតសាច់ ជាពិសេសនៅក្នុងខេត្តសាស្កាតឈីវ៉ាន់ និងនៅភាគខាងលិចប្រទេសកាណាដា។ ម្យ៉ាងទៀត យើងបានជួបប្រទះនឹងស្ថានភាពគ្រោះរាំងស្ងួតជិត១០ឆ្នាំមកហើយ ដែលធ្វើឲ្យស្ថានភាពកាន់តែអាក្រក់ទៅៗ។ គ្រោះរាំងស្ងួតបានធ្វើឲ្យហ្វូងគោ មានទំហំតូចជាងមុន ហើយបើគ្មានការកើនឡើងនៃចំនួនសត្វគោទេ តម្លៃសាច់គោនឹងមិនធ្លាក់ថ្លៃវិញឡើយ។
លោក ជេហ្វ្រី យោហ្គា បានបញ្ជាក់ថា សមាគមអ្នកចិញ្ចឹមសត្វពិតជាសប្បាយរីករាយ ដែលបានឃើញសាច់គោ នៅតែមានអ្នកប្រើប្រាស់ក្នុងខេត្តសាស្កាតឈីវ៉ាន់ ទោះបីជាមានការឡើងថ្លៃក៏ដោយ
លោកថា សាច់គោបានឡើងថ្លៃជាងមុន ពិតណាស់យើងដឹងច្បាស់ពីចំណុចនេះ។ ទោះជាយ៉ាងណាក៏ដោយ លោកបាននិយាយបញ្ចប់ដោយភាពជឿជាក់លើគុណភាពសាច់គោជាតិខ្លួនឯងថា អ្វីដែលខ្ញុំដឹងច្បាស់ គឺសម្រាប់អ្នកធ្លាប់ទិញសាច់គោអូស្ត្រាលីតម្លៃថោកយកទៅញ៉ាំ ពួកគេនឹងទិញវាតែម្តងគត់ ព្រោះដឹងថា គុណភាពមិនអាចប្រៀបនឹងសាច់គោកាណាដាបានទេ៕ (អៀវ ឈៀងនី)
