ណៃពិដោ៖ ប្រទេសភូមារំពឹងថា នឹងអាចរកប្រាក់ចំណូលបានជាង១,១៧៩ពាន់លានដុល្លារពីការនាំចេញអង្ករ និងចុងអង្ករ ដោយគិតចាប់ពីថ្ងៃទី១ ខែមេសា ឆ្នាំ២០២៦ ដល់ថ្ងៃទី៣១ ខែមីនា ឆ្នាំ២០២៧។
នៅក្នុងឆ្នាំហិរញ្ញវត្ថុ២០២៦-២០២៧ ប្រទេសភូមាបានកំណត់គោលដៅនាំចេញអង្ករឱ្យបាន១,៨លានតោន និងចុងអង្ករចំនួន១,២លានតោន តាមផ្លូវសមុទ្រ និងច្រកពាណិជ្ជកម្មតាមព្រំដែន ដែលសរុបបរិមាណអង្ករទាំងអស់មានចំនួន៣លានតោន។
យោងតាមសហព័ន្ធស្រូវអង្ករភូមា បានឱ្យដឹងថា នៅក្នុងត្រីមាសទីមួយ គិតពីខែមេសា ដល់ខែមិថុនា ប្រទេសភូមាបាននាំចេញអង្ករ និងចុងអង្ករបានជាង៥២៩ ០០០តោន ដោយទទួលបានប្រាក់ចំណូលចំនួន១៦៧លានដុល្លារ។
បរិមាណនាំចេញអង្ករនៅដើមឆ្នាំ២០២៦ ត្រូវបានកត់ត្រាដូចជាក្នុងខែមេសា មានចំនួន១៦៩ ៥៥៩តោន ទទួលបានប្រាក់ចំណូលចំនួន៥១លានដុល្លារ។ ក្នុងខែឧសភានាំចេញបានចំនួន១៣៦ ២៦២តោន ទទួលបានប្រាក់ចំណូលចំនួន៤២លានដុល្លារ។ ចំណែកនៅក្នុងខែមិថុនា នាំចេញបានចំនួន២២៣ ៧១៤តោន ទទួលបានប្រាក់ចំណូលចំនួន៧៤លានដុល្លារ។
រហូតមកទល់ពេលនេះ នៅក្នុងឆ្នាំសារពើពន្ធថ្មីនមិនទាន់មានការនាំចេញអង្ករតាមច្រកព្រំដែនគោកនៅឡើយទេ។
ក្រសួងពាណិជ្ជកម្មភូមា កំពុងសហការរៀបចំសេចក្តីព្រាងយុទ្ធសាស្ត្រនាំចេញអង្ករសម្រាប់ឆ្នាំ២០២៦-២០៣០ ជាមួយស្ថាប័នរដ្ឋ និងឯកជន ដើម្បីជំរុញពាណិជ្ជកម្ម បង្កើនប្រាក់ចំណូលរូបិយប័ណ្ណបរទេសឱ្យបានជាអតិបរមាដោយវាយលុកចូលទីផ្សារបរទេស ដែលមានសក្តានុពលបន្ថែមទៀត និងជួយលើកកម្ពស់ការនាំចេញ។
ទិន្នន័យរបស់សហព័ន្ធស្រូវអង្ករភូមា បានបង្ហាញថា ការនាំចេញអង្កររបស់ប្រទេសភូមា ក្នុងឆ្នាំហិរញ្ញវត្ថុ២០២៥-២០២៦ ដោយគិតចាប់ពីខែមេសា ដល់ខែមីនា សម្រេចបានលើស២,៧លានតោន ដោយប្រមូលចំណូលបានចំនួន៨៦១លានដុល្លារ។ ចំណែកក្នុងឆ្នាំហិរញ្ញវត្ថុ២០២៤-២០២៥ ប្រទេសភូមា រកចំណូលបានជាង១,១២៩ពាន់លានដុល្លារ ពីការនាំចេញអង្ករ និងចុងអង្ករចំនួន២,៤៨លានតោន។
ក្រសួងពាណិជ្ជកម្មភូមា កំពុងធ្វើការយ៉ាងជិតស្និទ្ធជាមួយសហព័ន្ធសភាពាណិជ្ជកម្ម និងឧស្សាហកម្ម, សហព័ន្ធស្រូវអង្ករភូមា, សមាគមពាណិជ្ជករគ្រាប់សណ្តែក ពោត និងល្ង, សមាគមផលិតផលកាត់ដេរ, សមាគមឧស្សាហកម្ម, សមាគមអ្នកដាំដុះ និងផលិតកៅស៊ូ ព្រមទាំងសមាគមកែច្នៃ និងនាំចេញផលិតផលជលផលភូមា ដើម្បីសម្រេចឱ្យបាននូវគោលដៅនាំចេញប្រចាំខែ និងសម្រួលដល់កិច្ចការនាំចេញឱ្យកាន់តែរលូន។
នៅក្នុងឆ្នាំ២០២៥ ប្រទេសភូមាបាននាំចេញអង្ករជាង១៤២ ៧០០តោន គិតជាទឹកប្រាក់៥២លានដុល្លារ ក្នុងខែមេសា, អង្ករជាង៥២៩ ០០តោន គិតជាទឹកប្រាក់៩០លានដុល្លារ ក្នុងខែឧសភា, អង្ករជាង២១០ ០០០តោន គិតជាទឹកប្រាក់៧១លានដុល្លារ ក្នុងខែមិថុនា, អង្ករជាង២៣០ ០០០តោន គិតជាទឹកប្រាក់៧៧លានដុល្លារ ក្នុងខែកក្កដា, អង្ករជាង១៩០ ០០០តោន គិតជាទឹកប្រាក់៦៥លានដុល្លារ ក្នុងខែសីហា, អង្ករជាង១៦៨ ០០០តោន គិតជាទឹកប្រាក់៥២លានដុល្លារ ក្នុងខែកញ្ញា, អង្ករជាង៣១០ ០០០តោន គិតជាទឹកប្រាក់៩២លានដុល្លារ ក្នុងខែតុលា, អង្ករជាង២៦៣ ៨១៥តោន គិតជាទឹកប្រាក់៧៦លានដុល្លារ ក្នុងខែវិច្ឆិកា, អង្ករជាង៣៣១ ៨៦៩តោន គិតជាទឹកប្រាក់៩៩លានដុល្លារ ក្នុងខែធ្នូ។
ចំណែកនៅក្នុងឆ្នាំ២០២៦ បាននាំចេញអង្ករជាង២០៨ ៨៤៧តោន គិតជាទឹកប្រាក់៦០លានដុល្លារ ក្នុងខែមករា, អង្ករជាង១៧៨ ១៩១តោន គិតជាទឹកប្រាក់៥៥លានដុល្លារ ក្នុងខែកុម្ភៈ និងនាំចេញអង្ករជាង២៣៤ ៦៩០តោន គិតជាទឹកប្រាក់៧១លានដុល្លារ ក្នុងខែមីនា។
ពាណិជ្ជកម្មអង្កររបស់ភូមា គឺពឹងផ្អែកយ៉ាងខ្លាំងលើការដឹកជញ្ជូនតាមសមុទ្រ។ សហព័ន្ធស្រូវអង្ករភូមាមានគោលបំណងសម្រេចបានការនាំចេញអង្ករចំនួនបីលានតោន ក្នុងឆ្នាំសារពើពន្ធ ២០២៥-២០២៦។ ប្រទេសភូមារកចំណូលពីការនាំចេញអង្ករបានជាង១,១ពាន់លានដុល្លារ ក្នុងឆ្នាំហិរញ្ញវត្ថុ ២០២៤-២០២៥ ដោយគិតពីថ្ងៃទី១ ខែមេសា ឆ្នាំ២០២៥ រហូតដល់ថ្ងៃទី៣១ ខែមីនា ឆ្នាំ២០២៦៕
