ដោយ៖ អៀវ ឈៀងនី
មណ្ឌលគិរី៖ ដំណាំកាហ្វេប្រភេទរ៉ូប៊ូស្តា (Robusta) កំពុងបង្ហាញពីសក្តានុពលសេដ្ឋកិច្ចយ៉ាងខ្លាំង ជាមួយនឹងការផ្តល់ទិន្នផលខ្ពស់គួរឱ្យកត់សម្គាល់ នៅក្នុងចំការគីរីកាហ្វេមួយកន្លែង ដែលស្ថិតនៅក្នុងភូមិពូឃុំដាក់ដាំ ស្រុកអូររាំង ខេត្តមណ្ឌលគិរី។
លោក សៀម ធារ៉ា អ្នកគ្រប់គ្រងចំការគិរី និងជាអ្នកបច្ចេកទេស ថែទាំចំការកាហ្វេគិរី បានឱ្យដឹងថា ចំការគីរីកាហ្វេ ដែលឈានចូលដល់ឆ្នាំទី៤ នៃការដាំដុះ អាចផ្តល់ទិន្នផលចន្លោះពី ៥ ទៅ ៦ តោន ក្នុងមួយហិកតា។ សម្រាប់ដើមកាហ្វេ ដែលមានអាយុចន្លោះពី ៤ ទៅ ៧ ឆ្នាំ ក្នុងមួយដើមៗ អាចប្រមូលផលផ្លែកាហ្វេទុំបានមិនក្រោម ២០ គីឡូក្រាម នោះឡើយ ដែលផ្លែត្រូវការរយៈពេលប្រមាណ ៤ ខែ ក្នុងការទុំ និងប្រមូលផល។
ដើម្បីទទួលបានទិន្នផលខ្ពស់ និងផ្លែកាហ្វេណែនល្អ លោក សៀម ធារ៉ា បានចែករំលែកនូវបច្ចេកទេសសំខាន់ៗមួយចំនួន៖ ដូចជា ប្រព័ន្ធស្រោចស្រព និងការផ្តល់ទឹក គឺជាកត្តាសំខាន់បំផុត ដោយក្នុងនោះ ការប្រើប្រាស់ ប្រព័ន្ធទុយោបាញ់សាច ពីខាងលើគឺសមស្របបំផុតសម្រាប់ដើមកាហ្វេ ដើម្បីជួយដល់ការចេញផ្កា។ ក្នុងមួយឆ្នាំ ដើមកាហ្វេត្រូវស្រោចទឹកឱ្យជក់គល់ចំនួន ៣ ដង ក្នុងអំឡុងខែក្តៅ ដើម្បីជំរុញឱ្យដើមកាហ្វេចេញផ្កាបានល្អ (ប្រមាណ ២ ទៅ ៣ ដងក្នុងមួយឆ្នាំ)។
ចំពោះការជ្រើសរើសពូជវិញ ពូជកាហ្វេ រ៉ូប៊ូស្តា (Robusta) ត្រូវបានទទួលស្គាល់ថា ជាពូជ ដែលមានអំណោយផល និងសមស្របបំផុតសម្រាប់លក្ខខណ្ឌដី និងអាកាសធាតុនៅកម្ពុជា ជាពិសេសនៅខេត្តមណ្ឌលគិរី ដោយដើមកាហ្វេប្រភេទនេះ មានដើមធំៗ និងធន់បានល្អជាងពូជអារ៉ាប៊ីកា (Arabica)។ ហើយដោយឡែកសម្រាប់ការគ្រប់គ្រង និងផ្តល់ជីបានត្រឹមត្រូវតាមបច្ចេកទេស គឺជាចំណុចស្នូលទីពីរដែលមិនអាចខ្វះបាន ក្នុងការធានាឱ្យដើមកាហ្វេមានកម្លាំងរឹងមាំ និងបង្កើនទិន្នផលពីមួយឆ្នាំទៅមួយឆ្នាំ។
ការថែទាំជំងឺ និងសត្វល្អិតចង្រៃដែលតែងតែរំខានដល់ផ្លែកាហ្វេ ជាពិសេសសត្វចៃ លោក សៀម ធារ៉ា បានជ្រើសរើសវិធីសាស្ត្រធម្មជាតិ ដោយមិនប្រើប្រាស់ថ្នាំគីមីនោះទេ។ លោក បានផលិតថ្នាំបាញ់ដេញសត្វល្អិតដោយខ្លួនឯង ដោយប្រើប្រាស់ ទឹកខ្មេះធ្យូងអង្កាម លាយជាមួយទឹកក្នុងផលធៀប ១ លីត្រ លាយទឹកបានពី ៨០០ ទៅ ១,០០០ លីត្រ។ ថ្នាំបាញ់ធម្មជាតិនេះ មានតួនាទីបណ្ដេញសត្វល្អិតតាមរយៈក្លិន ដោយមិនធ្វើឱ្យប៉ះពាល់ដល់បរិស្ថាន និងគុណភាពផ្លែកាហ្វេនោះឡើយ។
គួរបញ្ជាក់ថា ថ្មីៗនេះ ក្រុមហ៊ុន គិរីកាហ្វេ (Kiri Coffee) បានពិភាក្សា ជាមួយលោក Vithya Taing នាយកប្រតិបត្តិនៃក្រុមហ៊ុន GOLD STAR TRADING SWISS B.I.G GmbH មកពីប្រទេសស្វ៊ីស ដើម្បីជំរុញកាហ្វេខ្មែរឱ្យកាន់តែល្បីល្បាញ និងអាចឈានចូលទីផ្សារអន្តរជាតិ និងក្នុងគោលបំណងនាំចេញគ្រាប់កាហ្វេគុណភាពខ្ពស់របស់ គិរីកាហ្វេ ទៅកាន់ទីផ្សារធំៗនៅតំបន់អឺរ៉ុបផងដែរ រួមមានប្រទេសស្វ៊ីស និងប្រទេសអ៊ីតាលី៕
