ខេត្តកណ្តាល៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នាថ្ងៃទី២៥ ខែមិថុនា ឆ្នាំ២០២៦ បានលើកទឹកចិត្តដល់ការវិនិយោគផ្នែកចិញ្ចឹមត្រី ដែលកំពុងតែមានតម្រូវការខ្ពស់នៅក្នុងប្រទេសកម្ពុជា ដើម្បីបង្កើនផលិតផលត្រីសម្រាប់ការផ្គត់ផ្គង់តម្រូវការទីផ្សារក្នុងស្រុក និងចូលរួមកាត់បន្ថយនាំចូលពីប្រទេសជិតខាង។
ឯកឧត្តមបណ្ឌិតបានមានប្រសាសន៍លើទឹកចិត្តបែបនេះ ក្នុងឱកាសអញ្ជើញពិនិត្យមើល និងស្វែងយល់អំពីដំណើរការចិញ្ចឹមត្រីទីឡាព្យ៉ា នៅកសិដ្ឋានបន្លែសុវត្ថិភាពកោះធំ ស្ថិតនៅភូមិក្បាលដំរីក្រោម ឃុំកំពង់កុង ស្រុកកោះធំ ខេត្តកណ្តាល។
អញ្ជើញអមដំណើរឯកឧត្តមបណ្ឌិត កៅ ថាច ក៏មានអគ្គនាយករងធនាគារ ARDB បីរូបផងដែរ គឹឯកឧត្តម បាន លឹម, ឯកឧត្តម ប៉ិច សានី និងឯកឧត្តម ចាន់ សីហា ព្រមទាំងមន្ត្រីជាន់ខ្ពស់របស់ធនាគារ និងថ្នាក់ដឹកនាំសមាគមបណ្តាញកសិកតេជោជាច្រើនរូបទៀត។
ក្នុងឱកាសនេះ ឯកឧត្តមបណ្ឌិត កៅ ថាច បានមានប្រសាសន៍វាយតម្លៃខ្ពស់ចំពោះការវិនិយោគលើការចិញ្ចឹមត្រីទីឡាព្យ៉ាដែលកំពុងតែមានតម្រូវការខ្ពស់នៅក្នុងប្រទេសកម្ពុជា ហើយការវិនិយោគបែបនេះ គឺជាការបង្កើនផលិតផលត្រីសម្រាប់ការផ្គត់ផ្គង់លើទីផ្សារក្នុងស្រុក និងឈានទៅកាត់បន្ថយនាំចូលពីប្រទេសជិតខាង។
ព្រមជាមួយគ្នានេះដែរ ឯកឧត្តមបណ្ឌិតប្រតិភូក៏បានលើកទឹកចិត្តដល់ម្ចាស់កសិដ្ឋានខាងលើ ត្រូវបង្កើតផលិតភាព ដោយបន្តអនុវត្តការចិញ្ចឹមត្រីក្នុងស្រុកទៅតាមស្តង់ដារបច្ចេកទេសត្រឹមត្រូវ ព្រមទាំងជួយជំរុញផ្នែកបច្ចេកទេស និងផ្សព្វផ្សាយឱ្យបានទូលំទូលាយ ទៅកាន់កសិករផងដែរ ជាពិសេស ត្រូវជំរុញការអភិវឌ្ឍលើការចិញ្ចឹមត្រីទៅជាលក្ខណៈពាណិជ្ជកម្ម។
សូមជម្រាបថា កសិដ្ឋានចិញ្ចឹមត្រីទីឡាព្យ៉ាខាងលើ កំពុងតែពង្រីកអាជីវកម្មបន្ថែមទៀត ដោយទទួលបានការគាំទ្រឥណទានពីធនាគារអភិវឌ្ឍន៍ជនបទ និងកសិកម្ម ដើម្បីយកទៅពង្រីកអាជីវកម្ម ហើយកសិដ្ឋានក៏កំពុងចិញ្ចឹមកូនត្រីទីឡាព្យ៉ាជាងមួយលានក្បាលនៅក្នុងស្រះចំនួន១៨ ក្នុងចំណោមស្រះសរុបចំនួន៤៤ស្រះ។
ត្រីទីឡាព្យ៉ា គឺជាប្រភេទត្រីទឹកសាប ដែលមានប្រភពដើមពីទ្វីបអាហ្វ្រិក។ ដោយសារមានលក្ខណៈលូតលាស់លឿន ងាយសម្របខ្លួន និងងាយចិញ្ចឹម វាបានក្លាយជាប្រភេទត្រីដ៏ពេញនិយមសម្រាប់ការចិញ្ចឹមជាលក្ខណៈពាណិជ្ជកម្មនៅតាមបណ្តាប្រទេសជាច្រើនលើពិភពលោក។
ក្រៅពីតម្លៃសេដ្ឋកិច្ច ត្រីទីឡាព្យ៉ាក៏មានគុណតម្លៃអាហារូបត្ថម្ភខ្ពស់ផងដែរ ដោយមានកាឡូរី និងជាតិខ្លាញ់ទាប ប៉ុន្តែសម្បូរទៅដោយប្រូតេអ៊ីន វីតាមីន និងសារធាតុរ៉ែសំខាន់ៗ ដូចជា Selenium, Vitamin B12, Niacin និង Phosphorus។
យោងតាមសៀវភៅមគ្គុទ្ទេសក៍ ស្តីពីប្រភេទត្រីនៅក្នុងដែនទឹកសាបនៃប្រទេសកម្ពុជា របស់វិទ្យាស្ថានស្រាវជ្រាវ និងអភិវឌ្ឍជលផលទឹកសាប នៃរដ្ឋបាលជលផល បានបង្ហាញថា ត្រីទីឡាព្យ៉ាមានវត្តមាននៅកម្ពុជា មានឈ្មោះវិទ្យាសាស្ត្រ Oreochromis Niloticus និងឈ្មោះជាភាសាអង់គ្លេស Nile Tilapia ដែលអាចមានប្រវែងដងខ្លួនអតិបរមាប្រមាណ ៣០សង់ទីម៉ែត្រ។
ទន្ទឹមនឹងនេះ របាយការណ៍របស់រដ្ឋបាលជលផល និងអង្គការត្រីពិភពលោក (World Fish Organization)បានបញ្ជាក់ថា ត្រីទីឡាព្យ៉ាមានផ្ទុកអាស៊ីតខ្លាញ់អូមេហ្គា៣ (Omega-3) ដែលមានសារៈសំខាន់សម្រាប់ការអភិវឌ្ឍខួរក្បាល ការលូតលាស់រាងកាយ និងសុខភាពបេះដូង។ លើសពីនេះ វាក៏សម្បូរទៅដោយវីតាមីន B12 វីតាមីន B6 និងវីតាមីន D ដែលជួយលើកកម្ពស់សុខភាព និងអាហារូបត្ថម្ភរបស់អ្នកបរិភោគផងដែរ៕
