ទីក្រុងម៉ិកស៊ិក៖ មូលនិធិវិនិយោគអាកាសធាតុ កាលពីសប្តាហ៍មុន បានប្រកាសថា ខ្លួនបានអនុម័តហិរញ្ញប្បទានកាតាលីករចំនួន៥០០លានដុល្លារ សម្រាប់ប្រទេសប្រេស៊ីល និងម៉ិកស៊ិក ដែលមានបំណងទាញយកមូលនិធិរាប់ពាន់លានដុល្លារបន្ថែមទៀត ដើម្បីពន្លឿនការកាត់បន្ថយការបញ្ចេញកាបូនក្នុងវិស័យឧស្សាហកម្មរបស់ខ្លួន។
ទុនបម្រុងគ្រប់គ្រងដោយធនាគារពិភពលោក (World Bank) ដែលមានទឹកប្រាក់ចំនួន១៤ពាន់លានដុល្លារ គឺជាមូលនិធិមូលធនផ្តោតលើអាកាសធាតុ បានគាំទ្រការវិនិយោគដំបូងគេបង្អស់ ដើម្បីជំរុញកិច្ចខិតខំប្រឹងប្រែងកាត់បន្ថយការបញ្ចេញកាបូនក្នុងប្រទេសទាំងពីរនេះ ដែលមានសេដ្ឋកិច្ចធំជាងគេនៅក្នុងតំបន់អាម៉េរិកឡាទីន។
នាយកប្រតិបត្តិមូលនិធិវិនិយោគអាកាសធាតុ លោក តារីយេ ក្បាដេហ្គេស៊ីន (Tariye Gbadegesin) បាននិយាយថា “ការប្រកួតប្រជែងជាសកលដើម្បីកាត់បន្ថយការបញ្ចេញឧស្ម័នកាបូនិកបានចាប់ផ្តើមហើយ សម្រាប់ទីផ្សារកំពុងរីកចម្រើន គឺនៅពេលខាងមុខ។ ឧស្សាហកម្មកាត់បន្ថយការបញ្ចេញកាបូន គឺមានលក្ខណៈលើសពីការបំភាយឧស្ម័ន វាជាការធានាបាននូវវិបុលភាពរយៈពេលវែង និងការងារនៅថ្ងៃអនាគត”។
ប្រទេសទាំងពីរកំពុងអភិវឌ្ឍមូលដ្ឋានឧស្សាហកម្មរបស់ខ្លួនយ៉ាងឆាប់រហ័ស ហើយនៅប្រទេសម៉ិកស៊ិក បច្ចុប្បន្នឧស្សាហកម្មនេះមានចំនួន១៨ភាគរយនៃការបំភាយឧស្ម័នផ្ទះកញ្ចក់។
ប្រទេសប្រេស៊ីល និងម៉ិកស៊ិក នឹងទទួលបានចំណែកទឹកប្រាក់ចំនួន២៥០លានដុល្លាររៀងៗខ្លួន។ ជំនួយនេះមានបំណងដើរតួជានុយ “កាតាលីករ” ដើម្បីស្រូបយកទឹកប្រាក់ដ៏ច្រើនសន្ធឹកសន្ធាប់ពីធនាគារ និងវិនិយោគិនឯកជន។
នៅប្រទេសម៉ិកស៊ិក ការវិនិយោគនេះត្រូវបានគេរំពឹងថា នឹងធ្វើឱ្យមានសហហិរញ្ញប្បទានចំនួន១,៦៨ពាន់លានដុល្លារ រួមទាំងទឹកប្រាក់១,២ពាន់លានដុល្លារ ពីវិនិយោគិនឯកជនផងដែរ។ ស្ថាប័នចូលរួមរួមមានក្រុមធនាគារអភិវឌ្ឍន៍អន្តរ-អាមេរិក (Inter-American Development Bank Group) និងក្រុមធនាគារពិភពលោក (World Bank Group) ទទួលផ្នែកឯកជន និងសាធារណៈ។
លោកស្រី ម៉ារ៉ា ដែលកាម៉ឹន បូនីឡា (Mara del Carmen Bonill) អនុរដ្ឋមន្ត្រីក្រសួងហិរញ្ញវត្ថុម៉ិកស៊ិក បានថ្លែងថា នៅពេលប្រទេសម៉ិកស៊ិក ឈានទៅមុខក្នុងការអនុវត្តផែនការមេរបស់ម៉ិកស៊ិកូ និងផែនការអភិវឌ្ឍន៍ជាតិ ឆ្នាំ២០២៥-២០៣០ បរិវត្តកម្មឧស្សាហកម្មបានក្លាយជាអាទិភាពយុទ្ធសាស្ត្រ។
លោកស្រីបានមានប្រសាសន៍ទៀតថា ប្រទេសម៉ិកស៊ិក នឹងផ្តោតលើឧស្សាហកម្ម ដែលពិបាកសម្អាតបំផុត ដូចជាដែក និងដែកថែប ស៊ីម៉ងត៍ សារធាតុគីមី និងអាលុយមីញ៉ូម។
មូលនិធិវិនិយោគអាកាសធាតុ គឺជាជំនួយឥតសំណង ដែលនឹងត្រូវបែងចែកឱ្យតាមគម្រោងនីមួយៗ តាមរយៈឧបករណ៍ហិរញ្ញប្បទានជាច្រើន រួមមានបំណុលជាន់ខ្ពស់ បំណុលក្រោមការគ្រប់គ្រង និងបំណុលកម្រិតមធ្យមុំ ហើយក្នុងករណីខ្លះ ការវិនិយោគលើភាគហ៊ុន និងការធានា។
បើយោងតាមសេចក្តីប្រកាសព័ត៌មានដដែលនេះ បានឱ្យដឹងទៀតថា រួមបញ្ចូលគ្នា កម្មវិធីទាំងពីរនេះ ត្រូវបានគេរំពឹងថា នឹងទប់ស្កាត់ការបញ្ចេញឧស្ម័នកាបូនិកជិត២លានតោន ទៅក្នុងបរិយាកាសជារៀងរាល់ឆ្នាំ ឬប្រហែលស្មើនឹងឧស្ម័នកាបូនិក ដែលស្រូបយកដោយ៣៣លានដើមឈើ ព្រមទាំងគាំទ្រដល់ការបង្កើតការងារបៃតង៕
