គូឡាឡាំពួរ៖ សមាគមកសិករដាំស្រូវម៉ាឡេស៊ី បានលើកឡើងថា ការបង្កបង្កើនផលដំណាំស្រូវនៅក្នុងប្រទេសម៉ាឡេស៊ី អាចនឹងត្រូវពន្យារពេលបង្កបង្កើនផល និងកាត់បន្ថយផ្ទៃដីដាំដុះ ប្រសិនបើឥទ្ធិពលបាតុភូតអែលនីញ៉ូ (El Nino) កាន់តែធ្ងន់ធ្ងរ និងបង្កឱ្យខ្វះទឹកស្រោចស្រព។
ប្រធានសមាគម លោក អាប់ឌុល រ៉ាស៊ីដ (Abdul Rashid) បានឱ្យដឹងថា ប្រមាណ៣០ភាគរយនៃកសិករម៉ាឡេស៊ីបានចាប់ផ្តើមដាំដុះរួចហើយ បើទោះបីជាសកម្មភាពបង្កបង្កើនផលមានការពន្យារពេលបន្តិចក៏ដោយ។
លោកបានបញ្ជាក់ថា «ប្រសិនបើខ្វះទឹកស្រោចស្រពដោយសារឥទ្ធិពលអែលនីញ៉ូ កសិករជាច្រើនអាចនឹងត្រូវកំណត់ពេលវេលាសាបព្រោះឡើងវិញ និងកាត់បន្ថយផ្ទៃដីដាំដុះ ដើម្បីការពារកុំឱ្យខាតបង់ច្រើនពេក»។
អែលនីញ៉ូ គឺជាបាតុភូតអាកាសធាតុ ដែលតែងតែនាំមកនូវអាកាសធាតុក្តៅ និងស្ងួតហួតហែងនៅប្រទេសម៉ាឡេស៊ី ដោយឱ្យមានគ្រោះរាំងស្ងួត និងការខ្វះខាតទឹក។ អែលនីញ៉ូ គឺជាភាសាអេស្ប៉ាញ មានន័យថា “ក្មេងប្រុសតូច” ឬ “កូនព្រះគ្រីស្ទ”។ ឈ្មោះនេះត្រូវអ្នកនេសាទជនជាតិប៉េរូ បង្កើតដំបូង នៅទសវត្សឆ្នាំ១ ៦០០ ដោយសារតែពួកគេបានកត់សម្គាល់ឃើញចរន្តទឹកក្តៅក្នុងមហាសមុទ្រ ដែលជាធម្មតាតែងតែហូរមកដល់នៅក្នុងរង្វង់វេលាបុណ្យណូអែល។
ចំណែកខាងវិទ្យាសាស្ត្រ គឺសំដៅទៅលើទម្រង់អាកាសធាតុ ដែលកើតឡើងដោយធម្មជាតិ និងកំណត់បានដោយការឡើងកម្តៅខុសប្រក្រតីនៃសីតុណ្ហភាពផ្ទៃសមុទ្រនៅភាគកណ្តាល និងភាគខាងកើតនៃមហាសមុទ្រប៉ាស៊ីហ្វិក។
អ្នកវិទ្យាសាស្ត្របានគិតទុកថា បាតុភូតនេះនឹងបន្តរហូតដល់ដើមឆ្នាំ២០២៧ និងត្រូវបានព្យាករថា នឹងធ្វើឱ្យមានភ្លៀងធ្លាក់តិចតួច ព្រមទាំងអាកាសធាតុក្តៅ និងស្ងួតហួតហែងជាងមុន ដែលអាចប៉ះពាល់ដល់វិស័យកសិកម្ម ការផ្គត់ផ្គង់ទឹក សុខភាពសាធារណៈ និងបង្កឱ្យផ្ទៃមេឃមានផ្សែងអ័ព្ទអួរ។
លោក អាប់ឌុល រ៉ាស៊ីដ បានឱ្យដឹងទៀតថា បរិមាណទឹកនៅក្នុងអាស្តុកបានស្រុកយ៉ាងខ្លាំង ដែលធ្វើឱ្យការផ្គត់ផ្គង់ទឹកសម្រាប់ការប្រើប្រាស់ក្នុងវិស័យកសិកម្មជួបការលំបាក។
លោកបានបន្ថែមថា នៅពេលនេះនៅមិនទាន់អាចប៉ាន់ប្រមាណបានច្បាស់លាស់ពីផលប៉ះពាល់លើទិន្នផលដំណាំនៅឡើយទេ ព្រោះវាអាស្រ័យលើកម្រិតភាពធ្ងន់ធ្ងរ និងរយៈពេលនៃបាតុភូតអាកាសធាតុនេះ។
ទោះបីជាកសិករបានត្រៀមខ្លួនរួចជាស្រេចដើម្បីប្រឈមមុខនឹងបញ្ហាប្រឈមពាក់ព័ន្ធនឹងអាកាសធាតុក៏ដោយ លោកបានបញ្ជាក់ថា ការគ្រប់គ្រងធនធានទឹកប្រកបដោយប្រសិទ្ធភាព និងការគាំទ្រពីរដ្ឋាភិបាល នៅតែមានសារៈសំខាន់ក្នុងការធានាថា ផលិតកម្មដំណាំស្រូវរបស់ប្រទេសម៉ាឡេស៊ីមិនរងផលប៉ះពាល់ធ្ងន់ធ្ងរពេក។
លោកក៏បានសំណូមពរឱ្យអាជ្ញាធរពាក់ព័ន្ធឱ្យជួយដោះស្រាយបញ្ហាថ្លៃដើម នៅក្នុងវិស័យស្រូវអង្ករ ដើម្បីរក្សាផលិតកម្ម និងកាត់បន្ថយការនាំចូល។
លោកប្រធានសមាគមរូបនេះ បាននិយាយបន្តទៀតថា កសិករកំពុងប្រឈមមុខនឹងបញ្ហាថ្លៃដើមផលិតកម្មឡើងខ្ពស់ជាមុន ដែលពាក់ព័ន្ធនឹងវិបត្តិថាមពលសកល ហើយស្ថានភាពបែបនេះ បានប៉ះពាល់ដល់ទឹកចិត្តរបស់កសិករ។
លោកក៏បានអំពាវនាវឱ្យមានការប្រើប្រាស់ពូជដំណាំ ដែលធន់នឹងគ្រោះរាំងស្ងួតឱ្យកាន់តែច្រើន និងអនុវត្តវិធីសាស្ត្រធ្វើកសិកម្មឱ្យមានប្រសិទ្ធភាពជាងមុន ដើម្បីទប់ទល់នឹងអាកាសធាតុក្តៅ និងបញ្ហាខ្វះទឹកស្រោចស្រព។
ចំណែកសេដ្ឋវិទូកសិកម្ម លោកបណ្ឌិតសាស្ត្រាចារ្យ ណាសៀ សាមស៊ីឌីន (Nasir Shamsudin) បានជំរុញឱ្យអាជ្ញាធរផ្តល់អាទិភាពដល់ការផ្គត់ផ្គង់ទឹកស្រោចស្រពសម្រាប់តំបន់បង្កបង្កើនផលដំណាំស្រូវ ដើម្បីពង្រឹងស្តុកស្បៀងបម្រុង និងផ្តល់ជំនួយដល់កសិករ ដែលរងផលប៉ះពាល់។
លោកសាស្ត្រាចារ្យបានបញ្ជាក់ថា ដំណាំស្រូវ និងបន្លែ គឺជាដំណាំងាយរងគ្រោះពីកម្ដៅថ្ងៃខ្លាំងពេក ជាពិសេស ត្រូវស្រោចទឹកជាប្រចាំ និងងាយរលួយខូចដោយសារសំណើមច្រើនពេក។
លោកសាស្ត្រាចារ្យ បានឱ្យដឹងទៀតទៀតថា ស្ថានភាពរាំងស្ងួតអូសបន្លាយពេលវែងអាចកាត់បន្ថយទិន្នផលដូងប្រេង ព្រមទាំងធ្វើឱ្យទិន្នផលផ្លែឈើក្នុងចម្ការ និងជ័រកៅស៊ូធ្លាក់ចុះផងដែរ។
លោកសាស្ត្រាចារ្យ បានព្រមានថា ប្រទេសម៉ាឡេស៊ីអាចនឹងបង្កើនការនាំចូលស្បៀងអាហារ ប្រសិនបើបាតុភូតអែលនីញ៉ូ អូសបន្លាយរយៈពេលយូរ និងធ្វើឱ្យផលិតកម្មស្រូវអង្ករក្នុងស្រុក និងផលិតផលស្បៀងអាហារចាំបាច់ផ្សេងទៀតធ្លាក់ចុះ។
លោកសាស្ត្រាចារ្យ បានបញ្ជាក់ថា “ស្រូវអង្ករ គឺជាកសិផលងាយរងផលប៉ះពាល់ជាងគេ ជាពិសេស ម៉ាឡេស៊ីបាននាំចូលប្រមាណអង្ករប្រមាណ៤៥ភាគរយនៃតម្រូវការប្រើប្រាស់របស់ខ្លួន ដែលធ្វើឱ្យសមត្ថភាពទូទាត់ការខាតបង់ផលិតកម្មក្នុងស្រុកធ្លាក់ចុះ”។
លោកបណ្ឌិតសាស្ត្រាចារ្យ ណាសៀ សាមស៊ីឌីន បានបន្ថែមថា បាតុភូតអែលនីញ៉ូ ក៏អាចរំខានដល់ការផ្គត់ផ្គង់វត្ថុធាតដើមសម្រាប់ផលិតចំណីសត្វ នៅលើទីផ្សារពិភពលោកផងដែរ ដែលនាំឱ្យថ្លៃដើមនាំចូលកើនឡើង។
ដោយសារប្រទេសម៉ាឡេស៊ីពឹងផ្អែកយ៉ាងខ្លាំងលើការនាំចូលគ្រាប់ធញ្ញជាតិសម្រាប់ផលិតចំណីសត្វ លោកបណ្ឌិតសាស្រ្តាចារ្យ បានកត់សម្គាល់ថា ការកើនឡើងនៃតម្លៃចំណីសត្វអាចធ្វើឱ្យថ្លៃដើមផលិតកម្មបសុបក្សីកើនឡើង ហើយនៅទីបំផុតនឹងប៉ះពាល់ដល់តម្លៃស្បៀងអាហារតែម្តង៕ (នៅ ស៊ីវុត្ថា)
