ឡុងដ៍៖ យោងតាមការព្រមានរបស់អ្នកផលិតម្ហូបអាហារ និងភេសជ្ជៈ បានឱ្យដឹងកាលពីថ្ងៃទី១ ខែមេសា ឆ្នាំ២០២៦នេះថា ដោយសារតែវិបត្តិសង្គ្រាមអ៊ីរ៉ង់ធ្វើឱ្យតម្លៃម្ហូបអាហាររបស់ប្រទេសអង់គ្លេសនឹងកើនឡើងជិត១០ភាគរយ នៅចុងឆ្នាំ២០២៦នេះ ដែលឡើងលឿនជាងការព្យាករណ៍ពីមុនប្រហែលបីដង។
សហព័ន្ធអាហារ និងភេសជ្ជៈ បាននិយាយថា អតិផរណាអាហារ និងភេសជ្ជៈគ្មានជាតិអាល់កុល ដែលពីមុនរំពឹងថា នឹងថយចុះដល់៣,២ភាគរយ នៅខែធ្នូ ឆ្នាំ២០២៦ ឥឡូវនេះនឹងកើនឡើងលើសពី៩ភាគរយ។
សហព័ន្ធ ដែលមានក្រុមហ៊ុនផលិតអាហារ និងភេសជ្ជៈប្រមាណ១២ ០០០ជាសមាជិក នៅចក្រភពអង់គ្លេស បានសន្មតថា ផ្លូវដឹកជញ្ជូនតាមច្រកសមុទ្រ ហ័រមូស (Hormuz) របស់ប្រទេសអ៊ីរ៉ង់ នឹងបើកឱ្យចរាចរទំនិញឡើងវិញ ហើយវិស័យសំខាន់ៗភាគច្រើន រួមមានវិស័យប្រេង ឧស្ម័ន និងជី នឹងវិលមករកភាពប្រក្រតីវិញក្នុងរយៈពេលមួយឆ្នាំទៀត។
ព្យាករណ៍នេះបានបង្ហាញទៀតថា អតិផរណាស្បៀងអាហារអាចកើនឡើងបន្ថែមទៀតប្រសិនបើការរំខានមានរយៈពេលយូរជាងនេះ ឬការផ្គត់ផ្គង់ថាមពលត្រូវបានរងផលប៉ះពាល់កាន់តែធ្ងន់ធ្ងរ ដែលបង្កឡើងពីហានិភ័យសេដ្ឋកិច្ចពីជម្លោះ រហូតធ្វើឱ្យធនាគារកណ្តាលលុបចោលការកាត់បន្ថយអត្រាការប្រាក់ ហើយរដ្ឋាភិបាលនឹងពិចារណាវិធីជួយអាជីវកម្ម និងអ្នកប្រើប្រាស់។
សហព័ន្ធម្ហូបអាហារ និងភេសជ្ជៈ បាននិយាយថា ឧស្សាហកម្មនេះបានរងផលប៉ះពាល់ពីតម្លៃប្រេង និងឧស្ម័ន ដោយសារតែការប្រើប្រាស់ថាមពលខ្ពស់ និងការពឹងផ្អែកលើខ្សែសង្វាក់ផ្គត់ផ្គង់សកលដ៏ស្មុគស្មាញ។
ខណៈពេលក្រុមហ៊ុនខ្នាតមធ្យម និងខ្នាតធំៗជាច្រើនការពារការប្រែប្រួលតម្លៃថាមពល តាមរយៈកាត់បន្ថយសុពលភាពកិច្ចសន្យា ត្រូវសហព័ន្ធអាហារ និងភេសជ្ជៈ ចាត់ទុកថា ពួកគេកំពុងរង់ចាំតម្លៃឡើងខ្ពស់បំផុត ទើបគេបន្តកិច្ចសន្យាឡើងវិញ។ សម្រាប់អ្នកផលិតតូចៗ ដែលជាធម្មតាទិញថាមពល ភ្លាមៗនៅលើទីផ្សារ កំពុងជួបប្រទះនឹងការឡើងថ្លៃដើមរួចទៅហើយ។
សេដ្ឋវិទូជាន់ខ្ពស់របស់សហព័ន្ធអាហារ និងភេសជ្ជៈ បាននិយាយថា «ទោះបីជាមានការខិតខំប្រឹងប្រែងដ៏ល្អបំផុតរបស់ក្រុមហ៊ុន មិនឱ្យឡើងតម្លៃក៏ដោយ វាច្បាស់ណាស់ថា អតិផរណាអាហារនឹងកើនឡើងក្នុងរយៈពេលប៉ុន្មានខែខាងមុខ»។
ផលប៉ះពាល់ពីសង្គ្រាមមុនគេបំផុត គឺច្បាស់លាស់មកលើការចំណាយប្រចាំគ្រួសាររបស់ប្រជាជនអង់គ្លេស ដូចជានៅតាមស្ថានីយប្រេងឥន្ធនៈ ដែលតម្លៃថាមពលឡើងកាន់តែខ្ពស់ បានធ្វើឱ្យការចំណាយសម្រាប់អ្នកបើកបរឡើងខ្ពស់ពេកណាស់ទៅហើយ។
ចំណែកកសិករអង់គ្លេស ក៏បានព្រមានផងដែរ អំពីតម្លៃម្ហូបអាហារឡើងខ្ពស់ចាប់ពីខែក្រោយ ដោយចាប់ផ្តើមពីតម្លៃប៉េងប៉ោះ ត្រសក់ និងម្ទេស ដែលដាំនៅក្នុងផ្ទះកញ្ចក់។
ក្រុមហ៊ុនស្រាវជ្រាវនៅក្នុងប្រទេសអង់គ្លេស បានរាយការណ៍កាលពីដើមសប្តាហ៍មុនថា អតិផរណាគ្រឿងទេសនៅក្នុងប្រទេសអង់គ្លេស បានកើនឡើង៤,៣ភាគរយ ក្នុងរយៈពេលបួនសប្តាហ៍ ដល់ថ្ងៃទី២២ ខែមីនា ឆ្នាំ២០២៦នេះ៕
