ទីក្រុងវ៉ាសូវី៖ ក្រុមហ៊ុនផលិតជីរបស់រដ្ឋប៉ូឡូញ បានបញ្ឈប់ជាបណ្តោះអាសន្ននូវការបញ្ជាទិញថ្មី ចំពេលមានការកើនឡើងភាពតានតឹងនៅមជ្ឈិមបូព៌ា និងតម្លៃឧស្ម័នឡើងថ្លៃ។
ក្រុមហ៊ុន ហ្រ្គូប៉ា អាហ្សូទីសា (Grupa Azoty SA) គឺជាក្រុមហ៊ុនផលិតជីអាសូត និងល្បាយជីធំជាងគេទីពីរនៅក្នុងសហភាពអឺរ៉ុប ហើយការសម្រេចចិត្តរបស់ក្រុមហ៊ុននេះ បានបង្កឱ្យមានការព្រួយបារម្ភអំពីអាជីវកម្មផ្សេងទៀតអាចសម្រេចចិត្តស្រដៀងគ្នានេះដែរ។
ក្រុមហ៊ុនបានឱ្យដឹងថា ខ្លួននឹងបន្តផលិតកម្មឡើងវិញ ហើយការសម្រេចចិត្តនេះ អនុវត្តចំពោះការបញ្ជាទិញថ្មីក្នុងខែមីនា សម្រាប់តែជីអាសូតប៉ុណ្ណោះ។
បើយោងតាមសេចក្តីថ្លែងការណ៍របស់ក្រុមហ៊ុន បានលើកឡើងថា “មូលហេតុនៃការសម្រេចចិត្តនេះ គឺស្ថានភាពភូមិសាស្ត្រនយោបាយមិនស្ថិតស្ថេរនៅមជ្ឈិមបូព៌ា”។
តម្លៃឧស្ម័នធម្មជាតិនៅអឺរ៉ុប បានកើនឡើងដល់៣៤ភាគរយ នៅក្នុងវគ្គជួញដូរ កាលពីថ្ងៃទី៣ ខែមីនា ឆ្នាំ២០២៦ ធ្វើឱ្យតម្លៃឧស្ម័នបានហក់ឡើងយ៉ាងខ្លាំង ចំពេលមានភាពមិនច្បាស់លាស់ថា តើការរំខានដល់ដំណើរការនាំចេញនឹងអូសបន្លាយអស់រយៈពេលប៉ុន្មានសម្រាប់រោងចក្រផលិតឧស្ម័នដ៏ធំបំផុតរបស់ពិភពលោក នៅក្នុងប្រទេសកាតា និងបង្កផលប៉ះពាល់ដល់ការផ្គត់ផ្គង់ថាមពលសកល។
យោងតាមទីភ្នាក់ងារព័ត៌មាន ប្លូមប៊ើក (Bloomberg) បានឱ្យដឹងថា តម្លៃប្រេងឆៅបានកើនឡើងក្នុងរយៈពេលពីរថ្ងៃជាប់ៗគ្នា ខណៈពេលប្រទេសចិន ដែលជាប្រទេសនាំចូលឧស្ម័នធំជាងគេរបស់ពិភពលោក បានអំពាវនាវឱ្យភាគីជម្លោះជាមួយប្រទេសអ៊ីរ៉ង់ ធានាឱ្យមានការឆ្លងកាត់ដោយសុវត្ថិភាពនៃកប៉ាល់ឆ្លងកាត់តាមច្រកសមុទ្រហ័រមូស (Hormuz) នៃដែនទឹកអ៊ីរ៉ង់។
សង្គ្រាមនៅប្រទេសអ៊ីរ៉ង់ បានរំខានដល់លំហូរការដឹកជញ្ជូនឆ្លងកាត់ឈូងសមុទ្រពែក្ស ដែលជាមជ្ឈមណ្ឌលដឹកជញ្ជូនជីដ៏សំខាន់ ដែលជំរុញឱ្យតម្លៃកើនឡើង នៅពេលកសិករនៅតំបន់អឌ្ឍគោលខាងជើង កំពុងរៀបចំដាក់ជីក្នុងស្រែរបស់ពួកគេ។ ទន្ទឹមនឹងនេះ ការកើនឡើងនៃតម្លៃឧស្ម័ន ក៏នឹងប៉ះពាល់ដល់អ្នកផលិតជីនៅក្នុងតំបន់ផ្សេងទៀត ដែលនឹងបង្កើនថ្លៃដើមបន្ថែមទៀត។
សេចក្តីថ្លែងការណ៍បានបន្ថែមថា “ការទទួលយកបញ្ជាទិញក្នុងលក្ខខណ្ឌបច្ចុប្បន្ន ចំពេលមានការកើនឡើងយ៉ាងខ្លាំងនៃថ្លៃដើមផលិត នឹងធ្វើឱ្យក្រុមហ៊ុនប្រឈមនឹងផលវិបាកអវិជ្ជមាន។ មិនដូចដៃគូប្រកួតប្រជែងមួយចំនួនទេ ក្រុមហ៊ុន អាហ្សូទី មិនទាន់បានបង្កើនតម្លៃផលិតផលរបស់ខ្លួនក៏ដោយ”។
យោងតាមក្រុមហ៊ុនអាហ្សូទី បានឱ្យដឹងទៀតថា អ្នកផលិតជី ដែលមិនមែនជាសមាជិកសហភាពអឺរ៉ុប ដូចជានៅប្រទេសអេហ្ស៊ីប អាល់ហ្សេរី ចិន និងសហរដ្ឋអាម៉េរិក បានសម្រេចចិត្តដំឡើងថ្លៃភ្លាមៗពី៤៥ ទៅ៧០ដុល្លារ ក្នុងមួយតោន។ ដូច្នេះក្រុមហ៊ុនបានសម្រេចចិត្តមិនចំណាយខ្ពស់បែបនេះដល់ដៃគូរបស់ខ្លួនឡើយ។
ក្រុមហ៊ុន ហ្រ្គូប៉ា អាហ្សូទីសា ប្រឈមនឹងការប្រកួតប្រជែងយ៉ាងខ្លាំងពីជីប្រទេសរុស្ស៊ី និងរបស់បេឡារុស។ កាលពីខែមុន ក្រុមហ៊ុនបានដាក់ផែនការរៀបចំរចនាសម្ព័ន្ធឡើងវិញ ដើម្បីដោះស្រាយបំណុលប្រហែល១៧ភាគរយ ដែលកើតឡើងពីការសាងសង់សំណង់ប្រូពីឡែន និងប៉ូលីប្រូពីឡែនដ៏ធំបំផុត នៅអឺរ៉ុបកណ្តាល និងអឺរ៉បខាងកើត។
កាលពីថ្ងៃទី៥ ខែមីនា ឆ្នាំ២០២៦នេះ ភាគហ៊ុនរបស់ក្រុមហ៊ុន អាហ្សូទី បានធ្លាក់ចុះជិតបួនភាគរយ នៅក្នុងការជួញដូរនៅផ្សារហ៊ុនទីក្រុងវ៉ាសូវី នៃប្រទេសប៉ូឡូញ៕
