ដោយ ឡុង សារេត
ភ្នំពេញ៖ នៅក្នុងរដូវកាលពិធីបុណ្យចូលឆ្នាំថ្មី ប្រពៃណីរបស់ជនជាតិចិន-វៀតណាមក្នុងឆ្នាំ២០២៦នេះ ត្រូវបានអ្នកជំនាញនៅក្នុងវិស័យចិញ្ចឹមសត្វក្នុងស្រុកសង្កេតឃើញថា អ្នកចិញ្ចឹមជ្រូកមានការសប្បាយរីករាយនៅពេលលក់សត្វចិញ្ចឹមរបស់ខ្លួនបានថ្លៃជាងពេលធម្មតា។
លោក លី ឡាវីល ប្រធានក្រុមប្រឹក្សាភិបាលនៃសមាគមអ្នកចិញ្ចឹមសត្វកម្ពុជា បានមានប្រសាសន៍ថា “យើងឃើញថា តម្រូវការជ្រូករស់នៅក្នុងរដូវកាលចូលឆ្នាំចិន-វៀតណាមនេះ ជាពេលវេលាមួយ ដែលកសិករប្រកបមុខរបរចិញ្ចឹមសត្វ ពិសេសអ្នកចិញ្ចឹមជ្រូកមានការសប្បាយរីករាយ ពីព្រោះមានតម្រូវការជ្រូករស់កើនឡើងខ្ពស់”។
លោកបន្តទៀតថា នៅរដូវចូលឆ្នាំចិននេះ ពិតជាមានតម្រូវការជ្រូករស់កើនឡើងច្រើនគួរសម ទាំងការបញ្ជាទិញជ្រូកខ្វៃ ជ្រូកធំ បានធ្វើឱ្យតម្លៃជ្រូករស់កើនឡើងផងដែរ។ តួយ៉ាងនៅដើមឆ្នាំ២០២៦មកនេះ តម្លៃជ្រូករស់របស់កសិករចាប់ផ្តើមហក់ឡើងជាសន្សឹមៗ បើប្រៀបធៀប និងពេលដូចគ្នា ឆ្នាំ២០២៥។
បើតាមប្រធានក្រុមប្រឹក្សាភិបាលសមាគមខាងលើ កសិករចិញ្ចឹមជ្រូក មិនសម្រាប់តែផ្គត់ផ្គង់នៅក្នុងរដូវកាលបុណ្យចូលឆ្នាំចិន-វៀតណាមទេ។ បានន័យថា សម្រាប់ឆ្លើយតបតម្រូវការនៅទូទាំងប្រទេស ក្នុងមួយថ្ងៃមានប្រមាណ១០ ០០០ក្បាល ប៉ុន្តែចូលមកដល់ជិតបុណ្យចូលឆ្នាំចិននេះ តម្រូវការជ្រូករស់អាចកើនដល់១២ ០០០ក្បាល។ ដូច្នេះទើបធ្វើឱ្យតម្លៃជ្រូករស់ឡើងថ្លៃដល់ជាង១០ ០០០រៀលក្នុងមួយគីឡូក្រាម ប៉ុន្តែក្រោយពីបុណ្យចូលឆ្នាំចិនបានបញ្ចប់ តម្លៃជ្រូកនឹងធ្លាក់មកវិញ ចន្លោះពី៩ ០០០រៀល ទៅ១០ ០០០រៀល។
លោក លី ឡាវីល បានលើកឡើងថា ក្នុងនាមក្រុមប្រឹក្សានៃសមាគមអ្នកចិញ្ចឹមសត្វ គឺលោកចង់ឱ្យវិស័យចិញ្ចឹមសត្វមានការរីកចម្រើន ហើយចង់ឃើញប្រជាពលរដ្ឋរស់នៅក្នុងប្រទេសជួយគាំទ្រ និងប្រើប្រាស់ផលិតផលសាច់ជ្រូក ដែលបានដាក់លក់នៅលើទីផ្សារ។
ចំណែកអ្នកស្រី ម៉ន ម៉ារិនី ម្ចាស់កសិដ្ឋានចិញ្ចឹមជ្រូកមួយកន្លែងនៅខេត្តកំពត បានឱ្យដឹងថា តម្រូវការជ្រូករស់នៅក្នុងរដូវកាលបុណ្យចូលឆ្នាំចិន-វៀតណាម គឺមានកំណើនខ្ពស់ ព្រោះគេយកទៅខ្វៃសម្រាប់ទុកសែន និងកាប់សាច់លក់ ដោយលក់បានថ្លៃ១៥០០០រៀលក្នុងមួយគីឡូក្រាម។
រីឯលោក ឯម សុខា ម្ចាស់អាជីវកម្ម សុខាជ្រូកខ្វៃ ទាខ្វៃពិសេស និងជ្រូកកណ្តុរធម្មជាតិ មានសាខានៅរាជធានីភ្នំពេញ និងខេត្តសៀមរាប បានប្រាប់ឱ្យដឹងថា នៅក្នុងរដូវបុណ្យចូលឆ្នាំចិនឆ្នាំនេះ លោកបានបញ្ជាទិញជ្រូកពីកសិករនៅតាមបណ្តាខេត្តនានានៅក្នុងប្រទេសប្រមាណជាង២០០ក្បាល សម្រាប់ខ្វៃផ្គត់ផ្គង់នារដូវកាលដ៏សំខាន់នេះ។
លោកមានក្តីរំពឹងថា នៅក្នុងឆ្នាំនេះនឹងមានតម្រូវការខ្ពស់ ព្រោះប្រជាជនខ្មែរជាប់សែស្រឡាយចិន និងវៀតណាម នឹងបញ្ជាទិញយកទៅសែនកុងម៉ា របស់ខ្លួននៅតាមគេហដ្ឋានច្រើន៕
