ដោយ រស្មី
ភ្នំពេញ៖ ប្រជាពលរដ្ឋកម្ពុជា ដែលជាអ្នកដាំបន្លែនៅតាមតំបន់មួយចំនួនបានបង្ហាញការប្តេជ្ញាចិត្តខ្ពស់ថា នឹងខិតខំដាំបន្លែតាមផ្ទះសម្បែងរបស់ខ្លួនដើម្បីផ្គត់ផ្គង់បន្លែនៅតាមមូលដ្ឋាន ភូមិឃុំ សហគមន៍ ឱ្យបានគ្រប់គ្រាន់តាមតម្រូវការ និងស្របពេលដែលមន្រ្តីជាន់ខ្ពស់នៃក្រសួងកសិកម្មរុ ក្ខាប្រមាញ់ និងនេសាទ បានអះអាងថា បន្លែក្នុងស្រុកអាចផ្គត់ផ្គង់បានប្រមាណ៨០ភាគរយ ហើយនៅពេលខាងមុខនឹងឈប់ពឹងផ្អែកលើការនាំចូលបន្លេពីប្រទេសជិតខាងទាំងស្រុង។
បន្ទាប់ពីប្រទេសកម្ពុជាមានជម្លោះព្រំដែន ដោយការឈ្លានពានពីសំណាក់ប្រទេសថៃ ច្រកព្រំដែនទាំងអស់ត្រូវបានបិទជិតឈឹងជិតមួយឆ្នាំមកនេះ ប្រទេសកម្ពុជាដែលធ្លាប់តែនាំបន្លែបង្កាមួយចំនួនពីប្រទេសថៃ នាពេលនេះត្រូវបានបញ្ឈប់ទាំងស្រុង ម្ល៉ោះហើយបានកំពុងធ្វើឱ្យពលរដ្ឋកម្ពុជាមួយចំនួននាំគ្នាប្តេជ្ញាចិត្តដាំបន្លែក្នុងស្រុកជំនួសឱ្យការនាំចូលវិញ។
ទាក់ទងក្នុងរឿងនេះ អ្នកស្រី សន គង់ រស់នៅភូមិត្បែងប្រជាប់ ឃុំប្រាំបីមុំ ស្រុកថ្ពង ខេត្តកំពង់ស្ពឺ ឱ្យដឹងថា បន្ទាប់ពីមើលឃើញសារៈសំខាន់បន្លែ ជាពិសេសចង់រកចំណូលសម្រាប់ផ្គត់ផ្គង់គ្រួសារផង អ្នកស្រីជាមួយស្វាមីបាននាំគ្នាដាំបន្លែដើម្បីលក់ឱ្យអ្នកភូមិ និងលក់ឱ្យអ្នកធ្វើដំណើរទេសចរ។ ក្នុងការដាំបន្លែចាប់ពីជិតចុងឆ្នាំ២០២៥កន្លងមកពេលនេះ បានហុចផលយ៉ាងល្អប្រសើរ ក្នុងនេះគ្រួសារអ្នកស្រីអាចលក់បន្លែបានរៀងរាល់ថ្ងៃ។
ស្រ្តីរូបនេះបានបញ្ជាក់ប្រាប់ថា “ខ្ញុំដាំបន្លែលក់ឱ្យអ្នកភូមិគ្នាឯង ពេលខ្លះលក់ឱ្យអ្នកធ្វើដំណើរតាមផ្លូវ ជាពិសេសលក់ឱ្យអ្នកទេសចរតែម្តង។ ខ្ញុំឃើញថា ដំណាំដាំដោយខ្លួនឯងបែបនេះ គឺធានាសុខភាពពីព្រោះខ្ញុំដាំប្រើតែជីអាចម៍គោប៉ុណ្ណោះ ម្ល៉ោះហើយមិនភ័យព្រួយមានសារជាតិគីមីលាយឡំទេ»។
អ្នកស្រីបន្តថា «បើពលរដ្ឋយើងរួមគ្នាដាំបន្លែ កាន់តែច្រើនឡើងនោះ គឺកម្ពុជាយើងមិនចាំបាច់ត្រូវនាំចូលពីប្រទេសជិតខាងទៀតឡើយ។ យើងត្រូវរួមគ្នាដាំបន្លែឱ្យច្រើន យើងលក់ក្នុងស្រុកយើង បានចំណូលក្នុងក្រុមគ្រួសារយើងហើយនៅបានបរិភោគបន្លែ ដែលមានសុវត្តិភាពគ្មានសារជាតិគីមីផង»។
អ្នកស្រី សន គង់ មានវ័យជិត៤០ឆ្នាំ បានប្រាប់ថា ក្នុងដំណាំនេះប្រើតែជីធម្មជាតិលាមកគោ ឬជីធម្មជាតិមួយចំនួនទៀត ហើយលទ្ធផលនោះដំណាំលូតលាស់ល្អណាស់។ ចំពោះតម្លៃវិញអ្នកស្រីលក់ទាបជាងនៅទីផ្សា គឺ ស្ពៃក្រញាញ់តម្លៃ២ ៥០០ ទៅ៣០០០រៀល ក្នុងមួយគីឡូក្រាម ស្ពៃតឿ ស្ពៃចង្កឹះ ពេលខ្លះលក់ថ្លៃតែ២០០០ ទៅដល់២៥០០រៀល ក្នុងមួយគីឡូក្រាម។
លើកឡើងស្រដៀងគ្នានេះ អ្នកស្រី ណុប កូឡាប រស់នៅភូមិកណ្តាល ឃុំ អន្លង់រាប ស្រុកវាលវែង ខេត្តពោធិ៍សាត់ បានឱ្យដឹងថា ក្នុងរយៈពេលជាងមួយឆ្នាំមកនេះ គឺបន្ទាប់ពីមានការឈ្លានពានពីសំណាក់កងទ័ពថៃ និងមានការបិទច្រកព្រំដែន គឺអ្នកស្រីបានដាំបន្លែកាន់តែច្រើនឡើងជាបន្តបន្ទាប់ សំដៅធ្វើយ៉ាងណា ដើម្បីផ្គត់ផ្គង់ទីផ្សារក្នុងមូលដ្ឋាន និងមួយចំនួននាំចេញទៅលក់នៅបណ្តាខេត្តផ្សេងៗទៀតក្នុងប្រទេសកម្ពុជា។
ទោះពេលខ្លះរំខានដោយសារគ្រាប់ផ្លោងសង្រ្គាមឈ្លានពានពីកងទ័ពថៃ មិនសូវបានដាំបន្លែដោយសាររវល់ជម្លៀសខ្លួនទៅកាន់ទីសុវត្តិភាព តែពេលនេះអ្នកស្រីបានសម្រុកដាំឡើងវិញដើម្បីលក់នៅក្នុងមូលដ្ឋានឱ្យបានច្រើន ហើយការដាំនេះមិនត្រឹមតែជួយផ្គត់ផ្គង់ទីផ្សារក្នុងស្រុកប៉ុណ្ណោះទេ តែក៏ជាបន្លែល្អ មានគុណភាពល្អ ពីព្រោះមិនមានសារជាតិគីមី ដែលអ្នកបរិភោគព្រួយបារម្ភឡើយ។
ដោយឡែក អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឃឹម ហ្វីណង់ នាថ្មីៗមកនេះបានបញ្ជាក់ប្រាប់ថា បច្ចុប្បន្នកម្ពុជាអាចផ្គត់ផ្គង់បន្លែក្នុងស្រុកបានប្រមាណ៨០ភាគរយ ហើយនៅពេលខាងមុខទៀតនេះកម្ពុជានឹងអាចផ្គត់ផ្គង់បន្លែទាំងស្រុងដោយខ្លួនឯង ដោយមិនចាំបាច់ពឹងផ្អែកការនាំចូលពីប្រទេសជិតខាងបន្តទៀតឡើយ។
ជាមួយគ្នានេះអ្នកនាំពាក្យក្រសួងកសិកម្ម្ម បានគូសបញ្ជាក់ដែរថា បច្ចុប្បន្ននេះក្នុងចំណោមសហគមន៍ទំនើបចំនួន៣០កន្លែង ដែលក្រសួងទើបបានបង្កើតឡើង មានសហគមន៍ដាំបន្លែចំនួន១០សហគមន៍។ សម្រាប់នាពេលខាងមុខក្រសួងគ្រោងនឹងបង្កើតសហគមន៍ដាំបន្លែ និងជំរុញដល់ពលរដ្ឋឱ្យបន្លែតាមផ្ទះសម្បែង ដើម្បីផ្គត់ផ្គង់តម្រូវការទីផ្សារក្នុងស្រុកទាំងស្រុងតែម្តង៕
