ហាណូយ៖ ការផ្លាស់ប្តូរនៃការប្រើប្រាស់ភេសជ្ជៈជាសកល និងការកើនឡើងនៃការប្រើប្រាស់គ្រឿងផ្សំមានប្រភពពីផ្លែឈើតំបន់ត្រូពិច កំពុងផ្តល់ផលជាវិជ្ជមានលើខ្សែសង្វាក់ផ្គត់ផ្គង់ និងផ្តល់ឱកាសសម្រាប់ប្រទេសវៀតណាម ដែលមានផលិតផលផ្លែឈើពេញមួយឆ្នាំ។
ក្នុងបរិបទនេះ ផលិតផលកសិកម្មនៅតំបន់ត្រូពិចរបស់វៀតណាម កាន់តែមានតម្លៃក្នុងខ្សែសង្វាក់ផលិតកម្មភេសជ្ជៈលើសកលលោក។
យោងតាមអង្គការស្បៀងអាហារ និងកសិកម្មរបស់អង្គការសហប្រជាជាតិ បានឱ្យដឹងថា ការប្រើប្រាស់ផលិតផលដែលមានប្រភពពីរុក្ខជាតិ ដូចជាផ្លែឈើ នៅតែបន្តកើនឡើងនៅតាមបណ្តាប្រទេសមួយចំនួនក្នុងតំបន់មជ្ឈិមបូព៌ា។ ង្វះខាតធនធានសម្រាប់ដាំដុះ និងមិនសម្បូរប្រភពទឹកនៅស្រោចស្រព មានន័យថា តំបន់មជ្ឈឹមបូព៌ា ត្រូវនាំចូលជាង៨០ភាគរយនៃតម្រូវការស្បៀងអាហាររបស់ខ្លួន ដោយពឹងផ្អែកភាគច្រើនលើអ្នកផ្គត់ផ្គង់ពីខាងក្រៅប្រទេស។
ប្រទេសវៀតណាម កំពុងពង្រីកតួនាទីរបស់ខ្លួននៅក្នុងបរិយាកាសបែបនេះ ដែលគាំទ្រដោយអាកាសធាតុត្រូពិច និងមានមូលដ្ឋានផលិតកម្មរឹងមាំ។ ទិន្នន័យពីក្រសួងកសិកម្ម និងបរិស្ថានវៀតណាម បានបង្ហាញថា ប្រាក់ចំណូលបានមកពីការនាំចេញផលិតផលកសិកម្ម រុក្ខាប្រមាញ់ និងនេសាទ បានកើនឡើងលើសពី៥៣ពាន់លានដុល្លារ ក្នុងឆ្នាំ២០២៤។ ចំណែកផ្លែឈើ និងផលិតផលផ្លែឈើកែច្នៃ មានកំណើនពីរខ្ទង់ ដែលនេះឆ្លុះបញ្ចាំងពីការផ្លាស់ប្តូរឆ្ពោះទៅរកការកែច្នៃជាភេសជ្ជៈ។
អាកាសធាតុមូសុងត្រូពិចរបស់ប្រទេសវៀតណាម បានផ្តល់អំណោយផលដល់ការផលិតផ្លែឈើពេញមួយឆ្នាំនៅទូទាំងតំបន់ដាំដុះសំខាន់ៗ ដូចជានៅតាមតំបន់ដីសណ្តទន្លេមេគង្គ។ នៅឆ្នាំ២០២៤ ផ្ទៃដីដាំផ្លែឈើរបស់វៀតណាម មានទំហំលើសពី១,២លានហិកតា និងផ្តល់ទិន្នផលប្រចាំឆ្នាំជាង១៣លានតោន។ ដំណាំផ្លែឈើសំខាន់ៗ រួមមានស្វាយ ម្នាស់ ផាសិន ចេក និងដូង គឺជាវត្ថុធាតុដើមយ៉ាងសំខាន់នៅក្នុងការផលិតទឹកផ្លែឈើ ទឹកក្រឡុក និងភេសជ្ជៈ។
ផ្អែកតាមតម្រូវការ កំណើនភេសជ្ជៈមិនមានជាតិអាល់កុល និងភេសជ្ជៈផលិតពីរុក្ខជាតិ កំពុងគាំទ្រដល់តម្រូវការគ្រឿងផ្សំជាច្រើនពីផ្លែឈើកែច្នៃ។ គេការព្យាករណ៍ថា ទីផ្សារភេសជ្ជៈមិនមានជាតិអាល់កុល នឹងកើនលើសពី១,២ទ្រីលានដុល្លារ នៅឆ្នាំ២០២៧ ដោយមានមជ្ឈិមបូព៌ា ជាចំណោមប្រទេសស្ថិតក្នុងតំបន់ ដែលមានកំណើនលឿនបំផុត។
ការផ្លាស់ប្តូរនេះ ក៏ត្រូវបានគេមើលឃើញផងដែរ តាមរយៈក្រុមហ៊ុនវៀតណាមឈ្មោះ ថាប៊ីកូ (THABICO) ចូលរួមតាំងពិព័រណ៍ម្ហូបអាហារក្នុងទីក្រុងឌូបៃ (Gulfood Dubai) ឆ្នាំ២០២៦ ដែលនឹងប្រព្រឹត្តទៅចាប់ពីថ្ងៃទី២៦ ដល់ថ្ងៃទី៣០ ខែមករា នៅមជ្ឈមណ្ឌលពាណិជ្ជកម្មពិភពលោក ទីក្រុងឌូបៃ។ ផលិតផលតាំងពិព័រណ៍នោះ មានដូចជា ទឹកផ្លែឈើ NFC, ផ្លែឈើសុទ្ធ, ផលិតផល IQF និងគ្រឿងផ្សំធ្វើពីដូងសម្រាប់ការបង្កើតភេសជ្ជៈ ដែលស្របតាមស្តង់ដារ HACCP, ISO និងហាឡាល់។
ការកើនឡើងនៃវត្តមានរបស់អ្នកកែច្នៃផលិតផលរបស់វៀតណាម ក្នុងព្រឹត្តិការណ៍ពាណិជ្ជកម្មអន្តរជាតិនេះ បានឆ្លុះបញ្ចាំងពីការធ្វើសមាហរណកម្មកាន់តែខ្លាំងឡើង ទៅក្នុងខ្សែសង្វាក់ផ្គត់ផ្គង់ភេសជ្ជៈជាសកល តាមរយៈសមត្ថភាពកែច្នៃ ភាពស៊ីសង្វាក់គ្នា និងតម្រូវការអនុលោមភាព៕
