ដោយ ឡុង សារេត
ភ្នំពេញ៖ រាជរដ្ឋាភិបាលកម្ពុជាបានដាក់ឱ្យអនុវត្តជាផ្លូវការនូវកម្មវិធីប័ណ្ណជំនាញ ដើម្បីពង្រឹងការអភិវឌ្ឍជំនាញ ពង្រីកឱកាស និងបង្កើនប្រាក់ចំណូលសម្រាប់កម្លាំងពលកម្មរបស់កម្ពុជា រួមទាំងអ្នកសេដ្ឋកិច្ចក្រៅប្រព័ន្ធកាលថ្ងៃទី១៩ ខែមករា ឆ្នាំ២០២៦។
ពិធីនេះត្រូវបានរៀបចំឡើងក្រោមអធិបតីភាព ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងមានការចូលរួមពីថ្នាក់ដឹកនាំក្នុងជួររាជរដ្ឋាភិបាល ដៃគូអភិវឌ្ឍន៍ និងតំណាងវិស័យឯកជន។
ឯកឧត្ដម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ បានមានប្រសាសន៍ថា ក្នុងការអភិវឌ្ឍសេដ្ឋកិច្ចក្រៅប្រព័ន្ធ ប្រព័ន្ធគាំពារសង្គម និងការបណ្តុះបណ្តាលជំនាញគឺជាមូលដ្ឋានគ្រឹះដ៏រឹងមាំ ដែលមានភាពប្រទាក់ក្រឡា និងបំពេញគ្នាទៅវិញទៅមក ក្នុងការចូលរួមលើកកម្ពស់ការអភិវឌ្ឍសេដ្ឋកិច្ចជាតិប្រកបដោយផលិតភាព ភាពប្រកួតប្រជែង និងសុខុមាលភាពនៃពលរដ្ឋគ្រប់រូប។
រាជរដ្ឋាភិបាលកម្ពុជាបាននិងកំពុងផ្តោតការយកចិត្តទុកដាក់លើការលើកកម្ពស់លទ្ធភាព និងប្រសិទ្ធភាពនៃសមាហរ័ណអ្នកសេដ្ឋកិច្ចក្រៅប្រព័ន្ធ ដើម្បីអាចរួមចំណែកយ៉ាងសកម្មក្នុងប្រព័ន្ធសេដ្ឋកិច្ចជាតិដោយចីរភាព។
ឯកឧត្ដមរដ្ឋមន្ត្រីបានបន្ថែមថា «ប្រភេទមុខរបរដូចជាសិប្បកម្ម ផលិតកម្ម ការកែច្នៃចំណីអាហារ កសិឧស្សាហកម្ម សុទ្ធតែទាមទារនូវការផ្ដល់បច្ចេកទេស និងការបណ្ដុះបណ្តាលជំនាញផ្សេងៗ ដើម្បីឈានទៅធ្វើអន្តរកាលជាសហគ្រាសធុនមីក្រូ តូច និងមធ្យម នៃសេដ្ឋកិច្ចក្នុងប្រព័ន្ធ។ ប័ណ្ណនេះចូលរួមចំណែកយ៉ាងសំខាន់ដល់ការពង្រឹង និងពង្រីកសមត្ថភាពអ្នកសេដ្ឋកិច្ចក្រៅប្រព័ន្ធ ដែលភាគច្រើនជាបុគ្គលស្វ័យនិយោជន៍ និងជាសហគ្រិនខ្នាតមីក្រូ ឱ្យទទួលបានជំនាញសមរម្យ និងមានឱកាសប្រែក្លាយ និងធ្វើសមាហរ័ណអាជីវកម្មរបស់ខ្លួនទៅក្នុងប្រព័ន្ធសេដ្ឋកិច្ច»។
យោងតាម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, អ្នកសេដ្ឋកិច្ចក្រៅប្រព័ន្ធដែលបានចុះឈ្មោះជោគជ័យ នឹងទទួលប័ណ្ណជំនាញអេឡិចត្រូនិចដោយស្វ័យប្រវត្តិ មានតម្លៃស្មើ៦០០ ០០០រៀល សម្រាប់សិក្សាជំនាញនៅតាមគ្រឹះស្ថានដៃគូរបស់មូលនិធិអភិវឌ្ឍន៍ជំនាញ។ ពួកគាត់អាចប្រើប្រាស់ប័ណ្ណនេះដោយគ្រាន់តែចូលទៅកាន់គេហទំព័រផ្លូវការរបស់មូលនិធិអភិវឌ្ឍន៍ជំនាញ ហើយជ្រើសរើសវគ្គបណ្តុះបណ្តាលណាមួយតាមតម្រូវការ។
គិតត្រឹមថ្ងៃទី១៦ ខែមករា ឆ្នាំ២០២៦ ថ្នាលឌីជីថលចុះឈ្មោះអ្នកសេដ្ឋកិច្ចក្រៅប្រព័ន្ធ បានទទួលពាក្យស្នើសុំចុះឈ្មោះចំនួន ២៧៤ ២២១សំណើ ដែលគ្របដណ្តប់លើបុគ្គលស្វ័យនិយោជន៍ សហគ្រាសធុនមីក្រូ បុគ្គលិកនៃសហគ្រាសធុនមីក្រូ និងកម្មករម្តងម្កាលនៅក្នុងសេដ្ឋកិច្ចក្រៅប្រព័ន្ធ។
អ្នកសេដ្ឋកិច្ចក្រៅប្រព័ន្ធ ដែលបានចុះឈ្មោះ អាចទទួលបានអត្ថប្រយោជន៍កាន់តែច្រើន និងកាន់តែទូលំទូលាយ រួមទាំងការលើកទឹកចិត្ត និងការលើកលែងផ្នែកពន្ធដារ លទ្ធភាពទទួលបានសេវាហិរញ្ញវត្ថុ និងសេវានានារបស់ស្ថាប័នរដ្ឋ និងឯកជន ដូចជាបេឡាជាតិរបបសន្តិសុខសង្គម និងសេវាគាំពារសង្គម។
អត្ថប្រយោជន៍ថ្មីៗបន្ថែម រួមមានដំណោះស្រាយឌីជីថលសម្រាប់សហគ្រាស ក្រោមកម្មវិធី Enterprise Go Digital អត្ថប្រយោជន៍ធានារ៉ាប់រង ដែលផ្តល់ដោយដៃគូក្នុងវិស័យឯកជន និងកម្មវិធីប័ណ្ណជំនាញទើបដាក់ឱ្យអនុវត្តនេះ ដែលជាអត្ថប្រយោជន៍ទាំងអស់ មានគោលដៅពង្រឹងសមត្ថភាព បង្កើនផលិតភាព និងគាំទ្រសមាហរ័ណអ្នកសេដ្ឋកិច្ចក្រៅប្រព័ន្ធទៅក្នុងប្រព័ន្ធសេដ្ឋកិច្ចជាតិ៕
