ហាណូយ៖ តម្លៃអង្ករវៀតណាមប្រឈមនឹងការធ្លាក់ចុះយ៉ាងខ្លាំង បន្ទាប់ពីប្រទេសហ្វីលីពីនផ្អាកការនាំចូល នៅេពេលការប្រមូលផលស្រូវវៀតណាមនាពេលខាងមុខត្រូវបានគេរំពឹងថានឹងទទួលបានទិន្នផលប្រហែលបួនលានតោនថែមទៀត។
ថ្លែងនៅក្នុងកិច្ចពិភាក្សាជួបជាមួយកសិករវៀតណាម ប្រធានក្រុមហ៊ុននាំចេញអង្ករវៀតណាម អ៊ីនទីម៉ិក គ្រូប (Intimex Group) បាននិយាយថា ប្រទេសវៀតណាមរំពឹងថា នឹងនាំចេញអង្ករប្រហែលប្រាំបីលានតោន នៅឆ្នាំ២០២៥ ដែលអាចជាប់ចំណាត់ថ្នាក់លេខពីរ នៅលើពិភពលោក ហើយកំពុងជួបប្រទះបញ្ហាប្រឈមកាន់តែខ្លាំងឡើង។
លោកប្រធានក្រុមហ៊ុននាំចេញអង្ករ បាននិយាយថា ប្រទេសវៀតណាមបានដឹកជញ្ជូនអង្ករប្រហែលបីលានតោនទៅកាន់ប្រទេសហ្វីលីពីន នៅឆ្នាំ២០២៥នេះ ដែលធ្វើឱ្យហ្វីលីពីនក្លាយជាទីផ្សារនាំចេញអង្ករធំបំផុតរបស់ប្រទេសវៀតណាម។ ទោះបីជាយ៉ាងណាក៏ដោយ ប្រទេសហ្វីលីពីនបានផ្អាកការនាំចូលអង្ករអស់រយៈពេលបីខែកន្លងមក ហើយត្រូវបានគេរំពឹងថា នឹងចាប់ផ្តើមបើទីផ្សារឡើងវិញមួយរយៈខ្លីនៅក្នុងខែមករា ឆ្នាំ២០២៦ ដោយព្រមទទួលទិញអង្ករប្រហែល៣០០,០០០តោនប៉ុណ្ណោះ ហើយបញ្ឈប់ការនាំចូលម្តងទៀត។
ទន្ទឹមនឹងនេះ ប្រទេសវៀតណាមត្រូវបានគេរំពឹងថា នឹងទទួលបានទិន្នផលស្រូវប្រហែលបួនលានតោន នៅក្នុងរដូវប្រមូលផលខាងមុខនេះ។ ប្រសិនបើទីផ្សារហ្វីលីពីននៅតែបិទបន្តទៀត តម្លៃអង្ករក្នុងប្រទេសវៀតណាមអាចធ្លាក់ចុះថែមទៀត ហើយអ្នកនាំចេញអាចជួបការលំបាកក្នុងការស្វែងរកអ្នកទិញ។
លោកប្រធានក្រុមហ៊ុននាំចេញអង្កររូបនេះ បានជំរុញឱ្យរដ្ឋាភិបាលវៀតណាម ត្រូវខ្នះខ្នែងធ្វើការជាមួយរដ្ឋាភិបាលហ្វីលីពីន ដើម្បីបើកទីផ្សារអង្ករឡើងវិញ។ ព្រមជាមួយគ្នានេះដែរ លោកក៏បានអំពាវនាវឱ្យក្រុមហ៊ុនធំៗ និងក្រុមហ៊ុនរដ្ឋរបស់វៀតណាម ត្រូវសុំការអនុញ្ញាតប្រមូលទិញ និងរក្សាទុកស្រូវរហូតដល់រយៈពេលប្រាំមួយខែ ដើម្បីការពារការធ្លាក់ចុះតម្លៃបន្ថែមទៀត។
លោកបានស្នើឱ្យអ្នកនាំចេញយកចិត្តទុកដាក់ចំពោះទីផ្សារអង្ករនៅតំបន់អាស៊ីខាងលិច មានដូចជាប្រទេសអ៊ីរ៉ាក់ និងប្រទេសស៊ីរី ក៏ដូចជាប្រទេសនៅទ្វីបអាហ្វ្រិកមួយចំនួនផងដែរ។
យោងតាមនាយកដ្ឋានគយ វៀតណាម បានឱ្យដឹងថា វៀតណាមបាននាំចេញអង្ករជាង ៧,៥៣លានតោន ក្នុងរយៈពេល១១ខែនៃឆ្នាំ២០២៥ ដែលមានតម្លៃជាទឹកប្រាក់ចំនួន៣,៨៥ ពាន់លានដុល្លារ។ បើប្រៀបធៀបទៅនឹងរយៈពេលដូចគ្នា កាលពីឆ្នាំ២០២៤ បរិមាណអង្ករនាំចេញបានធ្លាក់ចុះ១០,៩ ភាគរយ ហើយប្រាក់ចំណូលពីការនាំចេញបានធ្លាក់ចុះ២៧,៤ភាគរយ។
ចំណែករបាយការណ៍របស់ក្រសួងកសិកម្ម និងបរិស្ថានវៀតណាម បានបង្ហាញថា ប្រទេសហ្វីលីពីននៅតែជាទីផ្សារអង្ករធំជាងគេបង្អស់របស់វៀតណាម ដែលមានចំណែក ៣៩,៨ ភាគរយនៃការនាំចេញ។ រីឯប្រទេសហ្គាណា និងកូតឌីវ័រ បានតាមពីក្រោយដោយមានចំណែក១២,៨ ភាគរយ និង១១,៥ ភាគរយ។
តម្លៃនាំចេញទៅកាន់ប្រទេសហ្វីលីពីន ក្នុងរយៈពេល១០ខែដំបូងនៃឆ្នាំ២០២៥ បានធ្លាក់ចុះយ៉ាងខ្លាំងរហូតដល់៣៤,៩ភាគរយ ធៀបនឹងឆ្នាំ២០២៤។ ចំណែកទីផ្សារផ្សេងទៀតក៏បានកត់ត្រាអំពីការធ្លាក់ចុះផងដែរ មានដូចជាទីផ្សារក្នុងប្រទេសឥណ្ឌូនេស៊ី ធ្លាក់ចុះជិត៩៦,៤ ភាគរយ និងម៉ាឡេស៊ីធ្លាក់ចុះ៣២,៥ ភាគរយ។
ផ្ទុយទៅវិញ ការនាំចេញទៅកាន់ប្រទេសហ្គាណា ក្នុងទ្វីបអាហ្វ្រិក បានកើនឡើង៥២,៦ ភាគរយ ប្រទេសចិនកើនឡើង១៦៥,១ភាគរយ បង់ក្លាដែសកើនឡើងជិត២៣៨,៥ភាគរយ និងសេណេហ្គាល់ កើនឡើងប្រហែល៧៣ភាគរយ៕
