ហ្សាការតា៖ ឥណ្ឌូណេស៊ីបានចាប់ផ្តើមនាំចេញជាលើកដំបូង និងដោយផ្ទាល់ទៅកាន់ប្រទេសចិន កាលពីថ្ងៃទី១៥ ខែធ្នូ ឆ្នាំ ២០២៥ នូវផ្លែទុរេនបង្កកមានបរិមាណចំនួន៤៨តោន និងគិតជាតម្លៃទឹកប្រាក់ចំនួន៣០៥,០០០ដុល្លារ។
ការនាំចេញផលិតផលផ្លែទុរេនបង្កក ដែលបានត្រូវកែច្នៃ និងវេចខ្ចប់នៅលើកោះជ្វាខាងលិច របស់ឥណ្ឌូណេស៊ីត្រូវដឹកជញ្ជូនពីកំពង់ផែភាគខាងជើងនៃទីក្រុងហ្សាការតា ឆ្ពោះទៅកាន់កំពង់ផែឈីងតាវ (Qingdao Port) ក្នុងប្រទេសចិន។
ប្រធានទីភ្នាក់ងារចត្តាឡីស័កកសិកម្ម បាននិយាយកាលពីថ្ងទី១៥ ខែធ្នូ ឆ្នាំ២០២៥នេះថា នេះគឺជាលទ្ធផលនៃការបំពេញនីតិវិធីដ៏ស្មុគស្មាញ ដែលចំណាយពេលវេលាច្រើន និងត្រូវការធនធានច្រើន ដោយ ចំណាយពេលជិតពីរឆ្នាំទើបចប់។
លោកបានបញ្ជាក់ថា ការនាំចេញផ្លែទុរេនបង្កកលើកទី១នេះ ត្រូវបានធ្វើឡើងបន្ទាប់ពីឃើញទីផ្សារ មានអ្នកប្រើប្រាស់ចិនត្រូវការយ៉ាងខ្លាំងចំពោះផ្លែទុរេន ដែលមានរសជាតិប្លែក ហើយប្រទេសឥណ្ឌូណេស៊ីជឿថា ខ្លួនអាចបំពេញតម្រូវការនេះបាន។
សព្វថ្ងៃនេះ ប្រជាជនចិនភាគច្រើនបានផ្លែទុរេនបរិភោគ ដោយសារការនាំចូលពីប្រទេសម៉ាឡេស៊ី វៀតណាម និងប្រទេសហ្វីលីពីន។
កន្លងមកអ្នកនាំចេញផ្លែទុរេនឥណ្ឌូណេស៊ីភាគច្រើន បានដើរតួជាអ្នកផ្គត់ផ្គង់ផ្លែទុរេនឱ្យទៅប្រទេសទាំងបីនេះ ដែលបន្ទាប់មកបានកែច្នៃ វេចខ្ចប់ និងនាំចេញផលិតផលសម្រេចទៅកាន់ទីផ្សារក្នុងប្រទេសចិន។ ដូច្នេះដើម្បីផ្លាស់ប្តូរទម្លាប់នេះ ទីភ្នាក់ងារចត្តាឡីស័កកសិកម្ម ឥណ្ឌូណេស៊ី បានផ្តួចផ្តើមឱ្យមានការពិភាក្សារវាងរដ្ឋាភិបាល និងរដ្ឋាភិបាល ជាមួយអគ្គនាយកដ្ឋានគយរបស់ប្រទេសចិន។
តាមរយៈកិច្ចពិភាក្សាទាំងនេះទើបប្រទេសចិន ចេញសេចក្តីព្រាងពិធីសារនាំចេញផ្លែទុរេនបង្កករបស់ឥណ្ឌូណេស៊ី ដែលត្រូវបានចុះហត្ថលេខា នៅថ្ងៃទី២៥ ខែឧសភា ឆ្នាំ២០២៥ ដើម្បីបើកផ្លូវសម្រាប់ការនាំចេញដោយផ្ទាល់ទៅកាន់ប្រទេសចិនតែម្តង។
លោកបាននិយាយទៀតថា ការតាមដានគឺជាទិដ្ឋភាពសំខាន់បំផុតមួយនៃដំណើរការអនុម័តនាំចេញ ជាពិសេសសម្រាប់សិប្បកម្មវេចខ្ចប់ផ្លែទុរេនបង្ករ។ រហូតមកដល់ពេលនេះ សិិប្បកម្មវេចខ្ចប់ផ្លែទុរេនបង្ក្កកចំនួនប្រាំបីកន្លែងបានបំពេញតាមតម្រូវការចាំបាច់ ដែលត្រូវកំណត់ជាកន្លែងចត្តាឡីស័ក ឬហៅថា កន្លែងប្រមូលផ្លែទុរេនមុនការនាំចេញ។
សិប្បកម្មទាំងនេះត្រូវបានអនុញ្ញាតឱ្យត្រួតពិនិត្យផ្នែកភូតគាមអនាម័យ និងបម្រើជាមជ្ឈមណ្ឌលនាំចេញផ្លែទុរេនបង្កកទៅកាន់ប្រទេសចិន ដែលបានចុះបញ្ជីនៅក្នុងប្រព័ន្ធសហគ្រាសនាំចូលម្ហូបអាហាររបស់ចិន។ ចំណែកអគ្គលេខាធិការសមាគមចម្ការទុរេនឥណ្ឌូណេស៊ី បាននិយាយថា អ្នកជំនួញឥណ្ឌូណេស៊ីបានស្វាគមន៍ចំពោះការបើកទីផ្សារទុរេននៅក្នុងប្រទេសចិន។
លោកបានមានប្រសាសន៍ថា ទីផ្សារចិន គឺធំសម្រាប់អ្នកនាំចេញផ្លែទុរេន ដែលតម្រូវការប្រចាំឆ្នាំរបស់ប្រជាជនចិន ទទួលបានជាទឹកប្រាក់កើនឡើងរហូតដល់៨ ០០០លានដុល្លារ។
តាមរយៈពូជទុរេនល្អៗ ប្រទេសឥណ្ឌូណេស៊ី កំពុងកំណត់គោលដៅចាប់យកចំណែកទីផ្សារពីប្រាំទៅ១០ភាគរយ ដែលអាចបង្កើនប្រាក់ចំណូលរាប់លានដុល្លារជារៀងរាល់ឆ្នាំ។
លោកបានបន្ថែមថា ការនាំចេញផ្លែទុរេនដោយផ្ទាល់ទៅកាន់ប្រទេសចិន ក៏បានជួយកាត់បន្ថយថ្លៃដើមដឹកជញ្ជូនយ៉ាងច្រើន និងផ្តល់ប្រាក់ចំណេញខ្ពស់ជាងមុនផងដែរ ដោយសារតម្លៃផ្លែទុរេននៅក្នុងប្រទេសចិនបច្ចុប្បន្នខ្ពស់ជាងតម្លៃ នៅក្នុងប្រទេសឥណ្ឌូណេស៊ីពីប្រាំទៅប្រាំពីរដង។
អ្នកជំនួញផ្លែទុរេន ដោយនិយាយថា កន្លងមកអ្នកនាំចេញឥណ្ឌូណេស៊ី ធ្លាប់ដឹកជញ្ជូនទុរេនបង្ក្កកឆ្លងកាត់ប្រទេសថៃ ដោយត្រូវបង់ក្នុងតម្លៃប្រហែល១ ៨០០០ដុល្លារ ក្នុងមួយកុងតឺន័រ។ ដូច្នេះ ការនាំចេញដោយផ្ទាល់ក្រោមពិធីសារថ្មីនេះ បានកាត់បន្ថយថ្លៃដើមដឹកជញ្ជូនមកនៅត្រឹមពី១០ ០០០ដុល្លារ ទៅ១១ ០០០ដុល្លារក្នុងមួយកុងតឺន័រ ដែលសន្សំបានប្រាក់ចំណេញប្រហែល៨ ០០០ដុល្លារ ក្នុងមួយកុងតឺន័រ។
ក្រោមពិធីសារនេះ ផលិតផលទុរេនបង្កក ដែលអាចនាំចេញបាន រួមមានសាច់ទុរេនសុទ្ធ និងផ្លែទរេនទាំងមូលផងដែរ។ យោងតាមទិន្នន័យរបស់ទីភ្នាក់ងារចត្តាឡីស័កកសិកម្ម បានបង្ហាញថា ប្រទេសឥណ្ឌូណេស៊ី បាននាំចេញផ្លែទុរេនចំនួន១០,១៦២តោន ក្នុងចន្លោះខែមករា និងខែវិច្ឆិកា ឆ្នាំ២០២៥។ គោលដៅនាំចេញសំខាន់ៗ រួមមានប្រទេសថៃចំនួន៦,០០៣តោន ប្រទេសចិនចំនួន២,៥៧៤តោន និងម៉ាឡេស៊ីចំនួន១,៥៣២ តោន រួមជាមួយនឹងការដឹកជញ្ជូនតូចៗ ទៅកាន់ទីក្រុងហុងកុង ប្រទេសអាល្លឺម៉ង់ និងទីផ្សារផ្សេងៗទៀត៕
