ទិន្នផលខ្ទឹមសរបស់ប្រទេសប៉េរូ បានកើនឡើងនៅរដូវប្រមូលផលចុងឆ្នាំ២០២៥នេះ ប៉ុន្តែប្រឈមមុខនឹងសម្ពាធយ៉ាងខ្លាំងចំពោះតម្លៃនៅលើទីផ្សារអន្តរជាតិ ដោយសារខ្ទឹមសរបស់ប្រទេសចិន និងការផ្លាស់ប្តូរច្បាប់ទម្លាប់នៅក្នុងទីផ្សារផងដែរ។
យោងតាមអ្នកគ្រប់គ្រងកសិពាណិជ្ជកម្មក្នុងប្រទេសប៉េរូ បានឱ្យដឹងថា ទិន្នផលខ្ទឹមសបានកើនឡើងប្រហែល២៥ភាគរយ បើប្រៀបធៀបទៅនឹងទិន្នផលក្នុងឆ្នាំ២០២៤ ដោយសារអាកាសធាតុត្រជាក់ល្អផ្តល់អំណោយផល។
លោកបានមានប្រសាសន៍ថា «តម្លៃខ្ទឹមសនៅដើមរដូវប្រមូលផលក្នុងខែកញ្ញា និងខែតុលា នៅតែល្អសោះ។ ប៉ុន្តែ ទោះបីជាយ៉ាងណាក៏ដោយ អ្វីៗបានផ្លាស់ប្តូរយ៉ាងឆាប់រហ័ស។ ចាប់ពីចន្លោះខែវិច្ឆិកា និងខែធ្នូ តម្លៃខ្ទឹមសបានធ្លាក់ចុះយ៉ាងខ្លាំងដោយសារតែការផ្គត់ផ្គង់លើសតម្រូវការនៅក្នុងប្រទេសអាហ្សង់ទីន និងប្រទេសឈីលី ដែលប្រទះអាកាសធាតុអំណោយផល និងផ្តល់ទិន្នផលខ្ពស់។ ការកើនឡើងនៃបរិមាណនេះ បានដាក់សម្ពាធលើទីផ្សារក្នុងតំបន់ ខណៈពេលខ្ទឹមសនាំចូលពីប្រទេសចិនកំពុងតែបញ្ចុះតម្លៃឱ្យកាន់តែទាបថែមទៀត»។
កសិពាណិជ្ជករដដែលនេះ បានមានប្រសាសន៍ទៀតថា «ខ្ទឹមសរបស់ប្រទេសចិនបានក្លាយជាតួអង្គបង្ខូចតម្លៃទីផ្សារខ្ទឹម។ ខណៈពេលខ្ទឹមសរបស់ប្រទេសប៉េរូ អាហ្សង់ទីន និងប្រទេសឈីលី អាចលក់ខ្ទឹមសមួយកញ្ចប់ទម្ងន់១០គីឡូក្រាម ក្នុងតម្លៃ២៨ដុល្លារ ២៣ដុល្លារ និង២២ដុល្លារ ស្រាប់តែខ្ទឹមសនាំចូលពីប្រទេសចិនបែរជាលក់ក្នុងតម្លៃត្រឹមតែ១១ដុល្លារប៉ុណ្ណោះ។ គម្លាតតម្លៃដ៏ធំនេះ បានជំរុញឱ្យតម្លៃខ្តឹមលើទីផ្សារអន្តរជាតិធ្លាក់ចុះ និងធ្វើឱ្យប៉ះពាល់ដល់ការប្រកួតប្រជែងរបស់ទីផ្សារអាម៉េរិកឡាទីនទាំងមូល។
ប្រទេសប្រេស៊ីល គឺជាទីផ្សារមួយក្នុងចំណោមទីផ្សារ ដែលរងផលប៉ះពាល់ខ្លាំងបំផុតដោយខ្ទឹមសរបស់ចិននេះ។ ប្រទេសអាហ្សង់ទីន ដែលមានផ្ទៃដីដាំខ្ទឹមសប្រហែល១៧ ០០០ហិកតា គឺសម្រាប់លក់ឱ្យទីផ្សារប្រេស៊ីល។ ទោះបីជាយ៉ាងណាក៏ដោយ វិធានការថ្មីមួយ ដែលអនុវត្តដោយរដ្ឋាភិបាលប្រេស៊ីល នៅចុងឆ្នាំ២០២៥នេះ បានអនុគ្រោះដល់ខ្ទឹមសរបស់ចិនតាមរយៈការកាត់បន្ថយពន្ធ និងកំណត់តម្លៃប្រហែល១៧ដុល្លារ ក្នុងមួយកញ្ចប់។ ចំណែកខ្ទឹមសនាំចូលពីប្រទេសចិន អាចលក់បានក្នុងតម្លៃទាបជាងនេះ ហើយនៅតែរក្សាបានប្រាក់ចំណេញយ៉ាងច្រើន។ ផ្ទុយទៅវិញ ខ្ទឹមសនៅតំបន់អាម៉េរិកឡាទីន ដែលមិនមានការឧបត្ថម្ភធន មិនអាចប្រកួតប្រជែងក្នុងកម្រិតតម្លៃទាំងនោះបានទេ។
ដោយប្រកួតប្រជែងមិនឈ្នះខ្ទឹមសចិន ប្រទេសអាហ្សង់ទីន និងប្រទេសឈីលី បានប្តូរទីផ្សាររបស់ខ្លួន ដោយនាំចេញខ្ទឹមសទៅកាន់ប្រទេសម៉ិកស៊ិក ដែលជាទីផ្សាររបស់ខ្ទឹមសប្រទេសប៉េរូ។ នៅក្នុងឆ្នាំ២០២៥នេះ ជាង៨៥ភាគរយនៃការនាំចេញខ្ទឹមសរបស់ប្រទេសប៉េរូ គឺទៅកាន់ប្រទេសម៉ិកស៊ិក ស្របពេលមានតម្រូវការខ្ពស់នៅសហរដ្ឋអាម៉េរិក អឺរ៉ុប និងអាស៊ី ហើយត្រូវប្រកួតប្រជែងជាមួយខ្ទឹមសនាំចូលពីប្រទេសចិនដដែល។ ទោះបីជាយ៉ាងណាក៏ដោយ លោកបានព្រមានថា «ទីផ្សារក្នុងប្រទេសម៉ិកស៊ិក មានបញ្ហាប្រឈមមួយចំនួនផងដែរ គឺការកើនឡើងនៃការរត់ពន្ធខ្ទឹមសរបស់ចិន ដែលនាំចូលមកក្នុងតម្លៃទាបជាងតម្លៃនៅលើទីផ្សារ ដែលបង្កឱ្យមានការធ្លាក់តម្លៃបន្ថែមទៀត»។
ចំណែកការដឹកជញ្ជូនវិញ លោកបានគូសបញ្ជាក់ថា ការដឹកតាមសមុទ្រទៅកាន់ប្រទេសម៉ិកស៊ិក ត្រូវចំណាយពេលប្រហែលប្រាំពីរថ្ងៃ ដោយមកដល់លឿនជាងខ្ទឹមសឈីលី ឬអាហ្សង់ទីន។ ទោះបីជាយ៉ាងណាក៏ដោយ ការផ្គត់ផ្គង់លើសតម្រូវការក៏បង្កឱ្យមានការប្រកួតប្រជែងខ្លាំង និងធ្វើឱ្យតម្លៃខ្ទឹមសគ្មានស្ថេរភាព។
ក្រុមហ៊ុននាំចេញខ្ទឹមសនៅតំបន់អាម៉េរិកឡាទីន បានបង្កើនបរិមាណប្រហែល៣០ភាគរយ បើប្រៀបធៀបទៅនឹងឆ្នាំ២០២៤ ហើយបានចាប់ផ្តើមដឹកជញ្ជូនខ្ទឹមសទៅកាន់ទីផ្សារសហរដ្ឋអាម៉េរិក ដែលមានតម្លៃបន្ថែមខ្ពស់ និងប៉ះពាល់តិចតួច។
នៅពេលរដូវបុណ្យណូអែលខិតជិតមកដល់ អ្នកផ្គត់ផ្គង់ខ្ទឹមសទាំងអស់កំពុងព្យាយាមលក់ផលិតផលរបស់ខ្លួនឱ្យបានលឿន ប៉ុន្តែអ្នកគ្រប់គ្រងបានព្រមានថា ខ្ទឹមសនៅតែបន្តធ្លាក់តម្លៃជារៀងរាល់ថ្ងៃ ដែលឆ្លុះបញ្ចាំងពីស្ថានភាពស្មុគស្មាញនៅក្នុងទីផ្សារ ដែលគ្របដណ្ដប់ដោយខ្ទឹមសនាំចូលពីប្រទេសចិន និងមានតម្លៃទាបជាងគេ៕
