វៀងច័ន្ទន៍៖ កាលថ្ងៃទី១៣ ខែវិច្ឆិកា ឆ្នាំ២០២៥ ឡាវ និងចិន បានពង្រីកកិច្ចសហប្រតិបត្តិការផ្នែកកសិកម្មរបស់ប្រទេសទាំងពីរបន្ទាប់ពីការពិភាក្សានៅទីក្រុងឆុងឈីង ក្នុងអំឡុងពេលកិច្ចប្រជុំសហប្រតិបត្តិការ រដ្ឋមន្ត្រីអាស៊ាន-ចិន លើកទី៩។
យោងតាមការផ្សាយរបស់សារព័ត៌មានឡាវ បានឱ្យដឹងថា ពិធីសារថ្មីស្តីពីអនាម័យ និងភូតគាមអនាម័យ ត្រូវបានចុះហត្ថលេខា រវាងអនុរដ្ឋមន្ត្រីក្រសួងកសិកម្ម និងបរិស្ថានឡាវ និងអនុរដ្ឋមន្ត្រីរដ្ឋបាលគយចិន។ កិច្ចព្រមព្រៀងនេះអនុញ្ញាតឱ្យនាំចេញផ្លែមៀនឡាវ ដែលជាកសិផលឡាវទី៤០ ត្រូវបានអនុញ្ញាតឱ្យនាំចូលទៅកាន់ទីផ្សារប្រទេសចិន។
មន្ត្រីជាន់ខ្ពស់ឡាវ និងចិន ក៏បានឯកភាពគ្នាបើកទីផ្សារចិនសម្រាប់នាំចូលផ្លែទុរេនឡាវផងដែរ ដែល អាជ្ញាធរឡាវ បានកត់សម្គាល់ថា កិច្ចព្រមព្រៀងទាំងនេះនឹងគាំទ្រឡាវក្នុងការធ្វើពិពិធកម្មផលិតផលនាំចេញរបស់ខ្លួនទៅកាន់ទីផ្សារចិន និងបង្កើនការចូលរួមនៅក្នុងវិស័យពាណិជ្ជកម្មក្នុងតំបន់ ស្របពេលអ្នកនាំចេញរបស់ឡាវត្រូវតែបំពេញតាមតម្រូវការគុណភាព និងសុវត្ថិភាពរបស់ប្រទេសចិន។
ឡាវ និងចិន បានសហការគ្នារួចហើយតាមរយៈគំនិតផ្តួចផ្តើមកសិកម្មជាច្រើន រួមទាំងកម្មវិធីរយៈពេល២៥ឆ្នាំ ដែលផ្តោតលើការដាំដុះ ការកែលម្អទិន្នផល ការកាត់បន្ថយថ្លៃដើម និងការប្រកួតប្រជែង ដើម្បីគាំទ្រដល់គោលបំណងរបស់ប្រទេសឡាវ ក្នុងការនាំចេញផ្លែទុរេន ចំនួន៤០០តោនទៅកាន់ប្រទេសចិន នៅឆ្នាំ២០២៦។
មន្ត្រីកសិកម្មឡាវ ក៏បានពិនិត្យឡើងវិញនូវការងារ ដែលកំពុងដំណើរការដើម្បីពង្រីការធ្វើកសិពាណិជ្ជកម្ម និងធ្វើឱ្យនីតិវិធីទាក់ទងនឹងការចូលទីផ្សារចិន មានភាពងាយស្រួល។ បច្ចុប្បន្ននេះ មានពិធីសារចំនួន៣៩ ដែលអនុញ្ញាតឱ្យនាំចេញផល អនុផលព្រៃឈើចំនួន៣៥មុខ និងផលិតផលសត្វចំនួន៤មុខ ពីប្រទេសឡាវទៅកាន់ប្រទេសចិន។
ការចរចានៅតែបន្តសម្រាប់ប្រភេទផលិតផលផ្សេងទៀត រួមទាំងសាច់គោបង្កក និងសាច់គោឆ្អិន ដែលប្រទេសចិនបានយល់ព្រមវាយតម្លៃបន្ថែមទៀត។
កាលពីពេលថ្មីៗកន្លងមកនេះ ប្រទេសឡាវបានចាប់ផ្តើមគម្រោងដាំទុរេន សម្រាប់ពង្រឹងការនាំចេញផ្លែទៅកាន់ប្រទេសចិន ដោយពង្រឹងទាំងគុណភាព និងបរិមាណនៃការផលិត ដើម្បីគាំទ្រដល់កសិករឡាវ តាមរយៈការងារមានស្ថេរភាព និងឱកាសចែករំលែកប្រាក់ចំណេញ។
គម្រោងដាំដំណាំទុរេនរយៈពេល២៥ឆ្នាំ ត្រូវបានរៀបចំឡើងក្នុងគោលបំណងពង្រីកផលិតកម្មផ្លែទុរេនសម្រាប់ផ្គត់ផ្កង់ទីផ្សារក្នុងស្រុក និងនាំចេញទៅក្រៅប្រទេស ដោយណែនាំពីបច្ចេកទេសដាំដុះតាមបែបវិទ្យាសាស្ត្រ ដើម្បីបង្កើនទិន្នផល និងកាត់បន្ថយថ្លៃដើមផលិតកម្ម។ កិច្ចខិតខំប្រឹងប្រែងនេះកើតឡើងដោយសារតម្រូវការដ៏ខ្លាំងរបស់ចិនសម្រាប់ផ្លែឈើត្រូពិច និងមានបំណងធ្វើឱ្យផ្លែទុរេនឡាវកាន់តែប្រកួតប្រជែងក្នុងពាណិជ្ជកម្មអន្តរជាតិ។
គម្រោងដាំទុរេននេះ គឺជាកិច្ចសហការរវាងវិទ្យាស្ថានស្រាវជ្រាវកសិកម្ម និងរុក្ខាប្រមាញ់ឡាវ និងក្រុមហ៊ុនឡាវ ដែលជាក្រុមហ៊ុនមានបទពិសោធន៍ក្នុងវិធីសាស្រ្តធ្វើកសិកម្មបែបទំនើប។ រីឯការដាំដុះនឹងត្រូវពឹងផ្អែកលើការស្រាវជ្រាវពីមជ្ឈមណ្ឌលស្រាវជ្រាវបន្លែ និងផ្លែឈើ។
យោងតាមតួលេខផ្លូវការរបស់ឡាវ បានឱ្យដឹងថា ផ្លូវដែកចិន-ឡាវ បានដឹកជញ្ជូនផ្លែទុរេនចំនួន១៥០ ០០០តោន នៅឆ្នាំ២០២៥នេះ គឺកើនឡើង៩១ភាគរយ បើធៀបនឹងឆ្នាំ២០២៤។ ការពង្រីកសេវាដឹកជញ្ជូនតាមខ្សែសង្វាក់ត្រជាក់ឥឡូវនេះ នាំឱ្យផ្លែទុរេនឡាវដឹកទៅដល់បណ្តាខេត្ត និងទីប្រជុំជនកាន់តែច្រើន នៅក្នុងប្រទេសចិន ដោយបង្កភាពងាយស្រួលក្នុងការចែកចាយផ្លែទុរេនសម្រាប់អ្នកនាំចេញ៕
