ញូវដេលី៖ ទិន្នន័យរបស់ក្រសួងពាណិជ្ជកម្មឥណ្ឌា បានឱ្យដឹងថា ផលិតផលអាហារសមុទ្រ គឺស្ថិតក្នុងចំណោមទំនិញសំខាន់ៗសម្រាប់នាំចេញរបស់ប្រទេសឥណ្ឌា ទៅកាន់ទីផ្សារបរទេស ដែលគិតត្រឹមខែមីនា ឆ្នាំ២០២៥ ឥណ្ឌាបាននាំចេញជិត១៧លានតោន ដែលមានតម្លៃជាទឹកប្រាក់ចំនួន៧,៤៥ពាន់លានដុល្លារ។
ដោយសារតែពឹងផ្អែកខ្លាំងលើទីផ្សារសហរដ្ឋអាម៉េរិកពេក អ្នកនាំចេញអាហារសមុទ្ររបស់ឥណ្ឌា នៅក្នុងឆ្នាំ២០២៥ កំពុងប្រឈមមុខនឹងការខាតឡុងចុង ព្រោះសហរដ្ឋអាម៉េរិក ដែលកាលពីចុងឆ្នាំ២០២៤ និងដើមឆ្នាំ២០២៥ បានទិញផលិតផលអាហារសមុទ្ររបស់ឥណ្ឌារហូតដល់ជិត៣៥ភាគរយនៃការនាំចេញអាហារសមុទ្រសរុប។ ប៉ុន្តែរហូតមកដល់ដើមខែសីហា ឆ្នាំ២០២៥ អ្នកនាំចេញគ្រឿងសមុទ្ររបស់ឥណ្ឌាបានជួបនូវការដំឡើងពន្ធ១០ភាគរយសម្រាប់ការនាំចូលទីផ្សារអាម៉េរិក។
បង្គាក្លាសេ គឺជាមុខទំនិញនាំចេញដ៏ធំបំផុតមួយទាំងក្នុងបរិមាណ ក៏ដូចជាតម្លៃ ដែលស្មើនឹងពីរភាគបីនៃការនាំចេញអាហារសមុទ្រសរុបរបស់ឥណ្ឌា។ នៅចុងឆ្នាំ២០២៤ និងដើមឆ្នាំ២០២៥ សហរដ្ឋអាម៉េរិកបាននាំចូលបង្គាពីប្រទេសឥណ្ឌាមានតម្លៃជាទឹកប្រាក់ចំនួន២,៤ពាន់លានដុល្លារ។ ពន្ធខ្ពស់បានធ្វើឱ្យបង្គាឥណ្ឌាមិនអាចប្រកួតប្រជែងនៅក្នុងទីផ្សារអាម៉េរិកទៀតឡើយ។
យោងតាមការវាយតម្លៃ បរិមាណនាំចេញបង្គារបស់ឥណ្ឌាត្រូវបានគេរំពឹងថា នឹងធ្លាក់ចុះពី១៥ភាគរយ ទៅ១៨ភាគរយ នាពេលខាងមុខ បើប្រៀបធៀបនឹងចុងឆ្នាំ២០២៤ និងដើមឆ្នាំ២០២៥ ដោយសារពន្ធរបស់សហរដ្ឋអាម៉េរិក។
ការវាយតម្លៃ បានលើកឡើងថា «ការដំឡើងពន្ធលើសពី៥០ភាគរយ ធ្វើឱ្យប្រទេសឥណ្ឌាមិនអាចប្រកួតប្រជែងជាមួយផលិផលរបស់ប្រទេសផ្សេងទៀត មានដូចជា អេក្វាឌ័រ វៀតណាម និងឥណ្ឌូនេស៊ី ដែលភាគច្រើនមានពន្ធតិចជាងឥណ្ឌាពាក់កណ្តាល។ ជាលទ្ធផល ការនាំចេញបង្គារបស់ឥណ្ឌាទៅកាន់ទីផ្សារសហរដ្ឋអាម៉េរិកនឹងដាំក្បាលធ្លាក់ចុះយ៉ាងខ្លាំងតែម្តង»។
រដ្ឋាភិបាលឥណ្ឌា បានស្នើឲ្យក្រុមហ៊ុននាំចេញអាហារសមុទ្រ ខិតខំស្វែងរកទីផ្សារជំនួសអាម៉េរិក។ រដ្ឋាភិបាលបានកំណត់យកទីផ្សារប្រទេសរុស្ស៊ី ចក្រភពអង់គ្លេស សហភាពអឺរ៉ុប ន័រវេស ស្វីស មជ្ឈិមបូព៌ា និងកូរ៉េខាងត្បូងជាដើម សម្រាប់នាំចេញផលិតផលអាហារសមុទ្ររបស់ប្រទេសឥណ្ឌា។
កន្លងមកក្រុមហ៊ុននាំចេញបង្គាឥណ្ឌារីករាយនឹងអត្ថប្រយោជន៍នៃការរីកចម្រើនផ្នែកហេដ្ឋារចនាសម្ព័ន្ធក្នុងស្រុក និងបណ្តាញចែកចាយដ៏រឹងមាំនៅក្នុងសហរដ្ឋអាម៉េរិក ខណៈពេលផលិតកម្មនៅក្នុងប្រទេសផ្សេងទៀត។
ការវាយតម្លៃដដែល បាននិយាយថា សមត្ថភាពរបស់អ្នកកែច្នៃឥណ្ឌាដើម្បីបង្វែរការនាំចេញបង្គាទៅកាន់ទីផ្សារផ្សេង ដូចជាចក្រភពអង់គ្លេស ដោយសារមានកិច្ចព្រមព្រៀងពាណិជ្ជកម្មសេរីឥណ្ឌា-ចក្រភពអង់គ្លេសរួចរាល់ហើយ។ ចំណែកប្រទេសចិន និងប្រទេសរុស្ស៊ី នឹងគាំទ្រផលិតផលឥណ្ឌាក្នុងបរិមាណណាមួយ នៅចុងឆ្នាំ២០២៥នេះ។
អគ្គលេខាធិការនៃសហព័ន្ធឧស្សាហកម្មជំរុញបែបជីវសាស្ត្ររបស់ឥណ្ឌា បាននិយាយថា រដ្ឋាភិបាលឥណ្ឌាអាចការពារផលប្រយោជន៍របស់កសិករ និងធានាបាននូវការប្រកួតប្រជែងជាសកលតាមរយៈវិធានការពន្ធ ដែលបានកំណត់។
លោកបានមានប្រសាសន៍ទៀតថា «ប្រទេសឥណ្ឌា ដែលមានឆ្នេរសមុទ្រសម្បូរបែប មានផ្កាថ្មច្រើន និងធនធានកសិ-ធម្មជាតិ កំពុងតែត្រៀមខ្លួនក្លាយជាមជ្ឈមណ្ឌលសកលសម្រាប់សារធាតុជំរុញបែបជីវសាស្ត្រ។ តាមរយៈការទទួលយកសារ៉ាយសមុទ្រ យូមិកអាស៊ីត និងអាស៊ីតអាមីណូពីសណ្តែកសៀង និងពោត យើងអាចពង្រឹងកសិកររបស់យើង ជំរុញការនាំចេញ និងនាំមុខគេផ្នែកការធ្វើកសិកម្មប្រកបដោយនិរន្តរភាព៕
