ហាណូយ៖ ព្យុះទីហ្វុង កាជីគី (Kajiki) ដែលជាព្យុះទី៥ បោកបក់មកលើប្រទេសវៀតណាម ក្នុងឆ្នាំ២០២៥នេះ បានបង្កការខូចខាតគិតជាទឹកប្រាក់អស់ប្រមាណ១០៩,៨លានដុល្លារ នៅតាមបណ្តាខេត្តភាគខាងជើង និងភាគកណ្តាល។
សារព័ត៌មានវៀតណាម អេចប្រេស បានដកស្រង់សម្តីអនុប្រធាននាយកដ្ឋានគ្រប់គ្រងទំនប់ទឹក និងបង្ការគ្រោះមហន្តរាយធម្មជាតិនៃក្រសួងកសិកម្ម និងបរិស្ថានវៀតណាម បានឱ្យដឹងថា កាលពីថ្ងៃទី២៥ ខែសីហា ខ្យល់ព្យុះ កាជីគី បានឆក់យកជីវិតមនុស្សអស់ប្រាំបីនាក់ បាត់ខ្លួនម្នាក់ និងមនុស្ស៧៧នាក់ផ្សេងទៀតរងរបួស។
ឥទ្ធិពលព្យុះទីហ្វុង កាជីគី នាំឱ្យមានភ្លៀងធ្លាក់ខ្លាំងជាបន្តបន្ទាប់រហូតបង្កឱ្យរអិលបំផ្លាញផ្ទះអស់ជាង ៣៨៦ ០០០ខ្នង ក្នុងនោះមានផ្ទះចំនួន៥១០ខ្នងបានដួលរលំ។ ចំណែកផ្ទៃដីស្រែចម្ការជាង១០៤ ០០០ហិកតា និងដំណាំជាង១៧ ២០០ហិកតាត្រូវបានជន់លិច ខណៈព្រៃឈើទំហំ១១ ៧០០ហិកតា បានដួលរលំរាបដល់ដី។
សត្វពាហនៈ និងបសុបក្សីជាង១៥៤ ០០០ក្បាល បានបាត់ ឬងាប់នៅក្នុងទឹកជំនន់ ខណៈផ្ទៃស្រះវារីវប្បកម្មមានទំហំជាង៨ ០០០ហិកតា ត្រូវបានលិចទឹក។ ព្យុះទីហ្វុង កាជីគី នៅក្នុងប្រទេសវៀតណាម ក៏បានពន្លិច ឬបំផ្លាញទូក និងកប៉ាល់អស់ចំនួន១០២គ្រឿងផងដែរ។
ទឹកជំនន់បង្កឱ្យបាក់ទំនប់អស់ចំនួន១១កន្លែង បំផ្លាញច្រាំងទន្លេអស់ប្រវែង២,៧គីឡូម៉ែត្រ និងបំផ្លាញច្រាំងប្រឡាយអស់ប្រវែង៥,៣គីឡូម៉ែត្រ និងរអិលបាក់ដីចំនួន៦៦៧កន្លែង។
ភ្លៀងធ្លាក់ខ្លាំង និងកម្ពស់ទឹកជំនន់ បានប៉ះពាល់ដល់តំបន់ទំនាប និងតំបន់ទីក្រុង រួមទាំងផ្នែកខ្លះនៃទីក្រុងហាណូយផងដែរ។ ផ្ទះរាប់ពាន់ខ្នងនៅជាយក្រុងហាណូយ ត្រូវទឹកជំនន់ជាន់លិច។ ព្យុះទីហ្វុង កាជីគី ក៏បានបណ្តាលឱ្យដាច់ចរន្តអគ្គិសនីយ៉ាងច្រើនផងដែរ ដែលប៉ះពាល់ដល់ប្រជាជនជាង២,៥លាននាក់ ដោយសារបង្គោលភ្លើងជាង៣ ៥០០ដើម បានដួលរលំនៅចន្លោះថ្ងៃទី២៥-២៦ ខែសីហា ឆ្នាំ២០២៥នេះ។
ព្យុះទីហ្វុង កាជីគី ដែលកើតនៅលើសមុទ្រចិនខាងត្បូង កាលពីថ្ងៃទី២៣ ខែសីហា បានបង្កើនឥទ្ធិពល ល្បឿនខ្យល់អតិបរមាពី១៦៦ ដល់១៨៣គីឡូម៉ែត្រក្នុងមួយម៉ោង ព្រមទាំងមានខ្យល់កន្ត្រាក់បក់រហូតដល់២២០គីឡូម៉ែត្រក្នុងមួយម៉ោង នៅជិតឆ្នេរសមុទ្រកណ្តាលប្រទេសវៀតណាម។ ព្យុះនេះបោកបក់ខ្លាំងប្រហាក់ប្រហែលទៅនឹងព្យុះទីហ្វុង យ៉ាគី (Yagi) ដែលកើតឡើងក្នុងឆ្នាំ២០២៤ និងខ្លាំងជាងព្យុះទីហ្វុង ដុកសស៊ូរ៊ី (Doksuri) ក្នុងឆ្នាំ២០១៧។
ភ្លៀងធ្លាក់ខ្លាំងដោយសារឥទ្ធិពលនៃព្យុះនេះ បានបណ្តាលឱ្យមានទឹកជំនន់ល្ហរល្ហាចនៅភាគកណ្តាលប្រទេសវៀតណាម និងផ្នែកខ្លះនៃភាគខាងជើងនៃប្រទេសវៀតណាម រួមទាំងទីក្រុងហាណូយ ដែលផ្នែកជាច្រើនត្រូវបានជន់លិចអស់រយៈពេល១០ម៉ោង កាលពីថ្ងៃទី២៦ ខែសីហា។
មជ្ឈមណ្ឌលជាតិសម្រាប់ការព្យាករណ៍ធនធានជលសាស្ត្ររបស់វៀតណាម បានព្យាករណ៍ថា នៅមានខ្យល់ព្យុះពីប្រាំ ទៅប្រាំពីរទៀតនឹងកើតឡើងនៅសមុទ្រចិនខាងត្បូង នៅមុនដំណាច់ឆ្នាំ២០២៥នេះ ក្នុងនេះនឹងមានខ្យល់ព្យុះពីរបីទៀតអាចវាយប្រហារលើដីគោក ដោយនាំមកនូវការធ្លាក់ភ្លៀងយ៉ាងខ្លាំង និងបង្កឱ្យមានគ្រោះទឹកជំនន់ធ្ងន់ធ្ងរផងដែរ៕
