ត្បូងឃ្មុំ៖ នៅក្នុងឆ្នាំ២០២៥នេះ, សហគមន៍កសិកម្មទំនើបម្រេចមេមត់ត្បូងឃ្មុំសម្រេចបាននៅការប្រមូលផលរបស់ខ្លួនបានប្រមាណ១៤០តោន ពោលទាបជាងឆ្នាំ២០២៤។ ប៉ុន្តែនៅក្នុងរដូវប្រមូលផលម្រេចនៅឆ្នាំ២០២៦ខាងមុខនេះមានក្តីសង្ឃឹមថា បរិមាណផលម្រេចនឹងកើនឡើងទ្វេដងបើប្រៀបធៀបទៅនិងឆ្នាំ២០២៥។
អ្នកស្រី អេង រ៉ាណែត ប្រធានសហគមន៍កសិកម្មទំនើបម្រេចមេមត់ត្បូងឃ្មុំ បានឱ្យដឹងថា នៅឆ្នាំ២០២៥នេះកសិករ ដែលជាសមាជិកសហគមន៍ បានប្រមូលផលម្រេចចប់រួចរាល់ហើយ បានទិន្នផលប្រមាណ១៤០តោន ពោលតិចជាងឆ្នាំ២០២៤។ ប៉ុន្តែនៅក្នុងឆ្នាំ២០២៥ និងនៅក្នុងរដូវប្រមូលផលម្រេចឆ្នាំ២០២៦ខាងមុខ យើងអាចប្រៀបធៀបបាន ព្រោះយើងរំពឹងទុកថា ទិន្នផលនៅឆ្នាំ២០២៦ អាចនឹងកើនឡើងទ្វេដង ពី១៤០តោនកើនដល់២៨០តោន។
អ្នកស្រីបានបញ្ជាក់ថា “ការរំពឹងទិន្នផលម្រេចថា នឹងកើនឡើងទ្វេដងនៅឆ្នាំំ២០២៦ ដោយសារនៅក្នុងរដូវកាលនេះយើងមានថវិកាសម្រាប់ទិញធាតុចូលឱ្យកសិករប្រើប្រាស់បានទាន់ពេលវេលា។ តួយ៉ាងនៅប៉ុន្មានថ្ងៃកន្លងមកនេះខ្ញុំបានដើរចុះទៅពិនិត្យនៅតាមចម្ការរបស់សមាជិកសហគមន៍ឃើញថា ម្រេចរបស់កសិករមានការកើនផលជាងឆ្នាំទៅ រាប់តាំងពីផ្កា និងក្តឹបម្រេចល្អជាងឆ្នាំមុន”។
បើតាមប្រធានសហគមន៍កសិកម្មទំនើបខាងលើ, នៅឆ្នាំ២០២៥ សហគមន៍បានចុះកុងត្រាជាមួយក្រុមហ៊ុនទទួលទិញម្រេចពីកសិករសម្រាប់ម្រេចខ្មៅថ្លៃ៧ដុល្លារក្នុងមួយគីឡូក្រាម ពោលតម្លៃខ្ពស់ជាងឆ្នាំ២០២៤ កសិករភាគច្រើនលក់បានថ្លៃ១៤ ០០០រៀល។ ដោយឡែកចំពោះតម្លៃម្រេចនៅឆ្នាំ២០២៦ខាងមុខនេះ ខាងសហគមន៍គ្រោងធ្វើកុងត្រាជាមួយក្រុមហ៊ុនទទួលទិញនៅដើម ឬចុងខែវិច្ឆិកាខាងមុខ ហើយរំពឹងថា អាចបានថ្លៃ៧ដុល្លារក្នុងមួយគីឡូក្រាមផងដែរ។
អ្នកស្រី អេង រ៉ាណែត បានឱ្យដឹងទៀតថា “ក្នុងនាមជាប្រធានសហគមន៍កសិកម្មទំនើប ហ៊ានធានាជាក់លាក់ថា ការលក់ម្រេចរបស់កសិករទាំងត្រូវធ្វើតាមសហគមន៍ អ៊ីចឹងទិន្នផលទាំងអស់ខ្ញុំចង់ឃើញនៅថ្ងៃខាងមុខម្រេចកម្ពុជាអាចនាំចេញបាននិងមានតួលេខមួយជាក់លាក់ ហើយយើងព្យាយាមផ្សព្វផ្សាយដល់កសិករ ដែលមិនទាន់បានចូលរួមនៅក្នុងសហគមន៍ ឱ្យពួកគាត់ចូលរួមបានកាន់តែច្រើន ធ្វើឱ្យទីផ្សារយើងមានតម្លៃកាន់តែល្អ”។
សូមជម្រាបជូនផងដែរថា ថ្មីៗសហគមន៍កសិកម្មទំនើបម្រេចមេមត់ត្បូងឃ្មុំ បានចុះកិច្ចព្រមព្រៀងហិរញ្ញប្បទានបំពេញបន្ថែមជាមួយគម្រោងពិពិធកម្មកសិកម្មកម្ពុជា ដោយទទួលបានជំនួយឥតសំណងពីគម្រោងនៅថវិកាប្រមាណ១១ម៉ឺនដុល្លារ។
ទាក់ទងនិងហិរញ្ញប្បទានទំាងនេះ, សម្រាប់អ្នកស្រី អេង រ៉ាណែត មានផែនការដំឡើងសូឡាបូមទឹកជូនកសិករសម្រាប់ស្រោចស្រប់ដំណាំម្រេចចំនួន៦៥គ្រួសារឱ្យមានឱកាសរៀបចំចម្ការម្រេចរបស់ខ្លួនឡើងវិញ និងថវិកាមួយចំនួនផ្សេងទៀតយកទៅទិញសម្ភារៈប្រើប្រាស់នៅក្នុងសហគមន៍៕ ដោយ ឡុង សារេត
