ខេត្តបាត់ដំបង៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម បានស្នើម្ចាស់រោងម៉ាស៊ីនកិនស្រូវ និងក្រុមហ៊ុននាំចេញអង្ករ ជុំវិញខេត្តពោធិ៍សាត់ បាត់ដំបង និងបន្ទាយមានជ័យ សូមបន្តប្រមូលទិញស្រូវឲ្យអស់លទ្ធភាពពីប្រជាកសិករបានកាន់តែច្រើន និងជាប្រចាំថ្ងៃ ដើម្បីជួយសម្រួលដល់ជីវភាពកសិករ។
ការស្នើរបស់ឯកឧត្តមបណ្ឌិត កៅ ថាច បែបនេះ ធ្វើឡើងកាលពីព្រឹកថ្ងៃទី២៣ ខែសីហា ឆ្នាំ២០២៥ ក្នុងឱកាសអញ្ជើញចូលរួមជាអធិបតីភាពក្នុងកិច្ចប្រជុំជាមួយតំណាងម្ចាស់រោងម៉ាស៊ីន និងក្រុមហ៊ុននាំចេញអង្ករ ដែលបានអញ្ញើញមកពី ខេត្តពោធិ៍សាត់ បាត់ដំបង និងបន្ទាយមានជ័យ។
គោលបំណងនៃកិច្ចជុំនេះ គឺដើម្បីពិភាក្សាស្វែងរកដំណោះស្រាយ ដាក់ទិសដៅ និងពិនិត្យតាមដានវាយតម្លៃ ដោយផ្តោតលើ៖
១)-អំពីស្ថានភាពតម្លៃស្រូវសើម ដែលដឹកមកលក់ដល់រោងម៉ាស៊ីនមានការធ្លាក់ចុះក្នុងរដូវប្រមូលផលធំនេះ ដូចជាប្រភេទ OM ៥៤៥១/IR, សែនក្រអូប, ស្រូវស្រងែ ធៀបនឹងឆ្នាំមុន
២)-អំពីបញ្ហាប្រឈមរបស់រោងម៉ាស៊ីនកិនស្រូវ ក្នុងស្ថានភាពភាពប្រមូលទិញស្រូវពីកសិករ ក្នុងរដូវប្រមូលផលថ្មីមកដល់ និងបញ្ហាសន្និធិស្តុកស្រូវ-អង្ករសល់ពីឆ្នាំចាស់ ដែលមិនទាន់បានបញ្ចេញអស់
៣)-អំពីស្ថានភាពការនាំចេញអង្ករ ទៅទីផ្សារអន្តរជាតិ និងភាពមិនទាន់ច្បាស់លាស់ចំពោះការបញ្ជាទិញអង្ករពីកម្ពុជា ពីទីផ្សារអន្តរជាតិ
៤)-អំពីនិន្នាការទីផ្សារអង្ករអន្តរជាតិ និងអំពីបញ្ហាប្រឈមនានា ពាក់ព័ន្ធវិស័យស្រូវអង្ករ និងសំណូមពរនានា។
ក្នុងឱកាសនេះ ឯកឧត្តមប្រតិភូ ក៏បានសម្តែងនូវចំណាប់អារម្មណ៍ថា ភាពជាដៃគូរវាងកសិករ និងរោងម៉ាស៊ីនកិនស្រូវគឺមិនអាចខ្វះបាន ពីព្រោះភាពជោគជ័យរបស់កសិករ ក៏ជាភាពជោគជ័យយូរអង្វែងរបស់រោងម៉ាស៊ីនផងដែរ។
បន្ថែមលើនេះ ឯកឧត្តមប្រតិភូ បន្តជំរុញឱ្យរោងម៉ាស៊ីនកិនស្រូវទាំងអស់ប្រើប្រាស់ឥណទានក្រោមកម្មវិធីហិរញ្ញប្បទានពិសេសរបស់រាជរដ្ឋាភិបាល ដែលទទួលពីរាជរដ្ឋាភិបាលតាមរយៈធនាគារ ARDB ឲ្យបានចំគោលដៅ និងមានប្រសិទ្ធភាពខ្ពស់បំផុត ដើម្បីលើកស្ទួយផលិតផលកសិកម្ម រកទីផ្សារ និងរក្សាលំនឹងថ្លៃកសិផល ហើយក្នុងករណីម្ចាស់រោងម៉ាស៊ីនកិនស្រូវ មានតម្រូវការឥណទានបន្ថែមសម្រាប់ទិញស្រូវ អាចធ្វើការទំនាក់ទំនងមកធនាគារ ARDB ។
បន្ថែមលើនេះ ឯកឧត្តមបណ្ឌិត បានសូមសំណូមពរដល់ម្ចាស់រោងម៉ាស៊ីនបន្តប្រមូលទិញស្រូវឲ្យអស់លទ្ធភាពពីប្រជាកសិករបានកាន់តែច្រើន និងជាប្រចាំថ្ងៃ ដើម្បីជួយសម្រួលដល់ជីវភាពកសិករ៕
