ឧត្តរមានជ័យ-បន្ទាយមានជ័យ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួកបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម និងលោក គឹម លាស់ ប្រធានក្រុមហ៊ុនហង្ស ហាវេស ដែលជាក្រុមហ៊ុននាំចេញដំឡូងមីដ៏ធំ ទៅទីផ្សារប្រទេសចិន នារសៀលថ្ងៃទី១៣ ខែកក្កដា ឆ្នាំ២០២៥នេះ បានអញ្ជើញពិនិត្យមើលទីលានហាល និងឃ្លាំងស្តុកទុកដំឡូងមីក្រៀម ដែលមានទីតាំងស្ថិតខេត្តឧត្តរមានជ័យ និងខេត្តបន្ទាយមានជ័យ។
បន្ទាប់ពីបានអញ្ជើញចុះពិនិត្យមើលទីតាំង ទីលានហាលដឡូងមី សំខាន់ៗ នៅខេត្តឧត្តរមានជ័យរួចមក ឯកឧត្តមបណ្ឌិត កៅ ថាច និងលោក គឹម លាស់ ប្រធានក្រុមហ៊ុនហង្ស ហាវេស បានបន្តពិនិត្យមើលសក្តានុពល និងការប្រមូលទិញដំឡូងមី របស់កសិករ ក្នុងស្រុកថ្មពួក និងស្រុកស្វាយចេក ខេត្តបន្ទាយមានជ័យ បន្ថែមទៀត។
ក្រោយការស្តាប់មតិលើកឡើង និងការបញ្ជាក់ពីប្រជាពលរដ្ឋ ព្រមទាំងម្ចាស់ទីលានហាល និងពាណិជ្ជករអ្នកប្រមូលទិញប្រមាណ១០ទីតាំងខាងលើ ឯកឧត្តមបណ្ឌិត កៅ ថាច បានណែនាំឲ្យម្ចាស់ឃ្លាំង និងក្រុមអ្នកប្រមូលទិញត្រូវ សហការជាមួយក្រុមហង្ស ហាវេស ដែលជាអ្នកនាំចេញដ៏ធំ និងធនាគារ ARDB លើផ្នែកឥណទាន ដែលមានអត្រាការប្រាក់អនុគ្រោះផងដែរ។
បន្ថែមពីនេះ ក្នុងនាមធនាគារ ARDB ឯកឧត្តមបណ្ឌិត កៅ ថាច បានអំពាវនាវដល់ពាណិជ្ជករ និងឈ្មួញកណ្តាល សូមបន្តប្រមូលទិញដំឡូមីពីបងប្អូនប្រជាកសិករបន្ថែមទៀត ហើយធនាគារ ARDB នៅតែបន្តគាំទ្រផ្នែកឥណទាន ដើម្បីដោះស្រាយបញ្ហាចំពោះមុខរបស់ប្រជាកសិករ និងចូលរួមលើកកម្ពស់សេដ្ឋកិច្ចជនបទ។
ទន្ទឹមនឹងនេះដែរ ឯកឧត្តមបណ្ឌិតប្រតិភូ ក៏បានស្នើឲ្យបងប្អូន ដែលធ្វើពាណិជ្ជកម្មដំឡូងមី ត្រូវប្រើប្រាស់រូបិយវត្ថុជាតិ គឺប្រាក់រៀល ក្នុងប្រតិបត្តិការទិញ-លក់កសិផល នៅតាមមូលដ្ឋានរាងៗខ្លួនដើម្បីកាត់បន្ថយនូវហានិភ័យនៃអត្រាប្តូរប្រាក់។
សូមជម្រាបថា នៅឆ្នាំ២០២៥ និងឆ្នាំ២០២៦នេះ ក្រុមហ៊ុន ហង្ស ហាវេស អេហ្រ្គីខលឈ័រ បាននិងកំពុងប្រមូលទិញដំឡូងមីក្រៀមសម្រាប់នាំចេញទៅប្រទេសចិន ក្នុងរង្វង់២០ម៉ឺនតោន។
ក្នុងមួយឆ្នាំៗ គិតត្រឹមឆ្នាំ២០២៤ ដំឡូងមីកម្ពុជាត្រូវបានផលិតដោយកសិករលើផ្ទៃដីដាំដុះប្រមាណជាង៨៤ម៉ឺនហិកតា ដោយផ្តល់ទិន្នផលមើមដំឡូងស្រស់ប្រមាណ១៥លានតោន និងផ្តល់ប្រាក់ចំណូលប្រមាណ១,២៥៥លានដុល្លារ ចំណែកផ្ទៃដីដោះដុះពោតក្រហម មានទំហំប្រមាណជាង២៨ម៉ឺនហិកតា ដោយផ្តល់ទិន្នផលស្រស់ប្រមាណមួយលានតោន ដោយផ្តល់ប្រាក់ចំណូលប្រមាណជាង២០០លានដុល្លារ។
មុនពេលអញ្ជើញមកដល់ទឹកដីខេត្តបន្ទាយមានជ័យ ឯកឧត្តមបណ្ឌិតប្រតិភូ កៅ ថាច និងសហការី បានធ្វើដំណើរសួរសុខទុក្ខវិរកងទ័ពឈរជើងការពារព្រំដែន ក្នុងខេត្តព្រះវិហារ ព្រមទាំងឆ្លៀត
ពេលវេលា ចុះជួបផ្ទាល់ដល់ទីកន្លែងឃ្លាំងស្តុក និងបានសាកសួរពីស្ថានភាពទីផ្សារដំឡូងមី ការប្រមូលទិញ និងការផលិតពូជស្រូវចិនដែលបង្កាត់ថ្មី ព្រមទាំងស្រូវស្រង៉ែស្រាល នៅក្នងស្រុកត្រពាំងប្រាសាទ ខេត្តព្រះវិហារ ដែលជិតដល់ពេលប្រមូលផលឆាប់ៗខាងមុននេះ។
បន្ទាប់មកទៀត ឯកឧត្តមបណ្ឌិតប្រតិភូក៏បានអញ្ជើញទស្សនកិច្ចនៅទីតាំងចំការមួយកន្លែងពិនិត្យមើលសក្តានុពលនៃការដាំដុះដំណាំយុទ្ធសាស្ត្រមួយចំនួន ដូចជា ដួងក្រអូប ទុរេន សាវម៉ាវ តាង៉ែន ល្មើល ដែលកំពុងតែដាំដុះលើផ្ទៃដីប្រមាណ២ ពាន់ហិកតា ស្ថិតក្នុងស្រុកអន្លង់វែង ខេត្តឧត្ដរមានជ័យ។
ទន្ទឹមនោះ ឯកឧត្តមបណ្ឌិតប្រតិភូ បានបន្តចុះពិនិត្យមើលឃ្លាំងស្តុកទុកដំឡូងមីដ៏ធំមួយកន្លែងទៀត ស្ថិតក្នុងឃុំត្រពាំងតាវ ស្រុកអន្លង់វែង ដែលកំពុងប្រមូលទិញ និងស្តុកទុកដំឡូងមី ក្នុងរង្វង់១៨៨តោន។
ក្នុងនាមធនាគារអភិវឌ្ឍន៍ជនបទ និងកសិកម្មដែលជាធនាគារបម្រើយុទ្ធសាស្ត្ររបស់រាជរដ្ឋាភិបាល ឯកឧត្តមបណ្ឌិត កៅ ថាច បានអំពាវនាវដល់បងប្អូនជាម្ចាស់ឃ្លាំងស្តុកដំឡូងមីនៅខេត្តឧត្តរមានជ័យ និងព្រះវិហារត្រូវបង្កើនសមត្ថភាពប្រមូលទិញពីកន្លែងផ្សេងៗរបស់កសិករយកមកស្តុកទុកឲ្យបានកាន់តែច្រើនបន្ថែមទៀត ដើម្បីជំរុញឲ្យចរន្តទីផ្សារដំឡូងមីនៅតាមច្រកព្រំដែនមានសកម្មភាពកាន់តែសកម្មជាងមុន៕
