ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នៅព្រឹកថ្ងៃទី៤ ខែកក្កដាឆ្នាំ២០២៥នេះ បានអញ្ជើញប្រជុំសំណេះសំណាលជាមួយបុគ្គលិកប្រចាំឆមាសទី១ ឆ្នាំ២០២៥ នៃធនាគារអភិវឌ្ឍន៍ជនបទ និងកសិកម្ម ដើម្បីស្ងើចសរសើរ និងលើកទឹកចិត្តបុគ្កលិក។
កិច្ចប្រជុំសំណេះសំណាលនេះ ត្រូវបានរៀបចំឡើងនៅទីស្នាក់ការកណ្តាលនៃធនាគារ ARDBស្ថិតនៅសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ដោយមានអ្នកចូលរួមដោយផ្ទាល់ និងតាមរយៈអនឡាញសរុបចំនួន៣១៥នាក់។
នៅក្នុងកិច្ចប្រជុំនោះមានការអញ្ជើញចូលរួមពីអគ្គនាយករង ប្រធាន និងអនុប្រធាន នាយកដ្ឋាន ប្រធាន និងអនុប្រធានការិយាល័យ និងបុគ្គលិកសាខាចល័តតាមបណ្តាខេត្ត។
លោកស្រី អ៊ឹង ពិសិដ្ឋណាលីន ប្រធាននាយកដ្ឋានធនធានមនុស្សនៃធនាគារ ARDB បានជម្រាបជូនពីការរីកចម្រើនរបស់ធនាគារអភិវឌ្ឍន៍ជនបទ និងកសិកម្ម ដោយលោកស្រីលើកឡើងថា នាមឆ្នាំ២០១៤ ធនាគារ ARDB មានបុគ្គលិកចំនួន៦៧នាក់ប៉ុណ្នៅះ ប៉ុន្តែនៅឆ្នាំ២០២៥ មានបុគ្គលិកកើនឡើងរហូតដល់៣៩៣នាក់។
លោកស្រីប្រធាននាយកដ្ឋាន បានលើកឡើងទៀតថា ការរីកចម្រើននេះអាស្រ័យដោយធនាគារ ARDBមានថ្នាក់ដឹកនាំ ដែលមានគោលដៅ និងយុទ្ធសាស្រ្តច្បាស់លាស់ រួមនឹងបុគ្គលិក ដែលពោរពេញដោយសមត្ថភាព ជំនាញណ និងមានភាពទន់ភ្លន់ក្នុងការបំពេញការងារ។
មានប្រសាសន៍សំណេះសំណាលជាមួយបុគ្គលិកនាឱកាសនេះ ឯកឧត្តមបណ្ឌិត កៅ ថាច បានវាយតម្លៃខ្ពស់ចំពោះកិច្ចខិតខំប្រឹងរបស់បុគ្គលិកគ្រប់ជាន់ថ្នាក់ទាំងអស់ ដែលបានខិតខំប្រឹងប្រែងបំពេញការងារ និងភារកិច្ចយ៉ាងសកម្ម និងអស់ពីសមត្ថភាព ដើម្បីបម្រើធនាគារ។
ឯកឧត្តមបណ្ឌិត បានលើកទឹកចិត្តឱ្យបុគ្គលិកទាំងអស់ខិតខំបំពេញការងារបន្ថែមទៀត ស្របតាមគោលដៅរបស់ធនាគារ ដែលចង់ឱ្យទ្រព្យសកម្មឡើងរហូតដល់១០០០ ឬ២០០០លានដុល្លារ នៅពេលអនាគត។
ឆ្លៀតក្នុងឱកាសនេះដែរ ឯកឧត្តមប្រតិភូ សូមលើកទឹកចិត្តឲ្យបុគ្គលិកទាំងអស់ត្រូវបន្តខិតខំប្រឹងប្រែងពង្រឹងសមត្ថភាពបន្ថែមទៀត ប្រកបដោយគុណធម៌ សីលធម៌ សុជីវធម៌ និងគោរពវិន័យឲ្យបានជាប់ជាប្រចាំផងដែរ៕
