ដោយ ឡុង សារេត
ភ្នំពេញ៖ កសិករដាំបន្លែ និងជាប្រធានសហគមន៍កសិកម្មទំនប “បន្លែផ្ទះសំណាញ់ត្រាំកក់”បានសម្តែងការគាំទ្រ និងពេញជាខ្លាំងចំពោះរាជរដ្ឋាភិបាលកម្ពុជា ដែលបង្កើតឱ្យមានសហគមន៍កសិកម្មទំនើបឡើង ហើយតាមរយៈវត្តមានសហគមន៍ថ្មីនេះ បានជួយឱ្យកសិករមានការផ្តាស់ប្តូរឥរិយាបទលើមុខរបរដាំបន្លែរបស់ខ្លួន ពីការដាំបន្លែតាមគ្នា ងាកមកដាំតាមផែនការ ឬដាំបន្លែឆ្លាស់គ្នាចៀសវាងជួបបញ្ហាទីផ្សារ។
លោក អ៊ុន អឿន ប្រធានសហគមន៍កសិកម្មទំនើប លើកឡើងបែបនេះនៅក្នុងឱកាសអញ្ចើញចូលរួមជាវាគ្មិនក្នុងកម្មវិធីបទសម្ភាសពិសេសរបស់ទូរទស្សន៍អនឡាញ ARDB កាលពីពេលថ្មីៗកន្លងមកនេះ។
លោកបានឱ្យដឹងថា ក្នុងនាមជាប្រធានសហគមន៍ ដែលធ្វើការផ្ទាល់ជាមួយគម្រោងដៃគូ ក៏ដូចជារាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ ដែលបានរៀបចំបង្កើតឱ្យមានសហគមន៍កសិកម្មទំនើប បន្លែផ្ទះសំណាញ់ត្រាំកក់នេះ បង្ហាញឱ្យឃើញថា រាជរដ្ឋាភិបាលបានយកចិត្តទុកដាក់មកលើកសិករ។
លោកប្រធានសហគមន៍បានបន្តថា បន្ទាប់ពីសហគមន៍កសិកម្មកសិកម្មទំនើប បន្លែផ្ទះសំណាញ់បានដំណើរការជាផ្លូវការ យើងមើលឃើញថា មានភាពប្រសើរឡើង ដោយកសិករដាំបន្លែមិនមានផែនការច្បាស់លាស់ ដាំបន្លែតែមួយមុខដូចគ្នាជាហេតុធ្វើឱ្យមានបញ្ហាទីផ្សារកើតឡើងនៅពេលប្រមូលផល។ ប៉ុន្តែក្រោយពីមានសហគមន៍ថ្មីនេះកើតឡើង យើងសង្កេតឃើញថា ប្រជាកសិករប្រកបរបរដាំបន្លែមានការផ្លាស់ប្តូរឥរិយាបទរបស់ខ្លួន និងទទួលយកបច្ចេកទេសថ្មីៗដូចជាការដាំដំណាំឆ្លាស់, ដាំដំណាំឱ្យបានច្រើនមុខ មិនដាំតែមួយមុខៗនាំឱ្យកកស្ទះលើទីផ្សារដូចមុនទៀតឡើយ។
លោកបានបន្តថា “រាជរដ្ឋាភិបាលបង្កើតឱ្យមានសហគមន៍កសិកម្មទំនើបនេះឡើង ខ្ញុំអបអរសាទរ និងសូមគាំទ្រទាំងស្រុងនូវលទ្ធផល ដែលរាជរដ្ឋាភិបាលសម្រេចកន្លងមក។ ការបង្កើតឱ្យមានសហគមន៍កសិកម្មទំនើប ខ្ញុំគិតថា ជាការផ្តល់លទ្ធភាពដល់សហគមន៍ទទួលបានប្រភពទុនជួយឱ្យកសិករងើបឈរឡើងដើម្បីបង្កបង្កើនផល សម្រាប់អភិវឌ្ឍន៍គ្រួសារនិងសហគមន៍ផងដែរ”។
លោកលើកឡើងថា តាមរយៈសហគមន៍កសិកម្មទំនើបថ្មីនេះ សង្ឃឹមថា ប្រជាកសិករនឹងរួមគ្នា ប្រៀបដូចជាចង្កឹះមួយបាច់នៅថ្ងៃអនាគត ដើម្បីជាឧត្តមប្រយោជន៍ និងដើម្បីក្លាយខ្លួនជាអ្នកផលិតបន្លែ ដែលមានទីផ្សារច្បាស់លាស់ ខិតខំពង្រឹងខ្លួនជាបណ្តើរៗជួយជ្រោងសេដ្ឋកិច្ច និងសង្គម។
គួរជម្រាបជូនផងដែរថា នៅក្នុងសមាជព្រឹទ្ធសភា និងរដ្ឋសភាលើកទី១ កាលថ្ងៃទី៣ ខែមិថុនា ឆ្នាំ២០២៥ កន្លងទៅនេះ, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ ចំពោះការអភិវឌ្ឍន៍សហគមន៍កសិកម្មទំនើប រាជរដ្ឋាភិបាលសម្រេចបានលទ្ធផលសំខាន់ៗ ដោយបានបង្កើតសហគមន៍កសិកម្មទំនើបចំនួន១២ បន្ថែមលើសហគមន៍កសិកម្ម ដែលមានស្រាប់ចំនួន២ ៦០១ បានចុះបញ្ជីទទួលស្គាល់ជាផ្លូវការនៅក្នុងខេត្តចំនួនប្រាំពីរ មានខេត្តសៀមរាប កំពង់ធំ តាកែវ កំពង់ឆ្នាំង កណ្តាល ត្បូងឃ្មុំ និងខេត្តពោធិ៍សាត់ ដោយផ្តោតលើមុខដំណាំយុទ្ធសាស្ត្រចំនួន៤មុខ មានដំណាំស្រូវ បន្លែ ស្វាយចន្ទី និងម្រេច ដែលគ្របដណ្តប់លើផ្ទៃដីប្រមាណ ១១ ៤២១ហិកតា និងមានផលិតភាពប្រចាំឆ្នាំចំនួន១៩,៧៧លានដុល្លារ។
សម្តេចធិបតីនាយករដ្ឋមន្ត្រីបានគូសបញ្ជាក់ថា “សហគមន៍កសិកម្មទំនើបចំនួនប្រាំមួយកំពុងទទួលបានការគាំទ្រពីរាជរដ្ឋាភិបាលជាប្រាក់កម្ចី ដែលមានអត្រាការប្រាក់ទាបក្នុងរង្វង់ប្រាំពីរភាគរយក្នុងមួយឆ្នាំ សម្រាប់ធ្វើជាទុនបង្វិល ដែលមានទំហំទឹកប្រាក់១,៩លានដុល្លារ”។
សម្តេចធិបតី ហ៊ុន ម៉ាណែត មានប្រសាសន៍គូសបញ្ជាក់ថា រាជរដ្ឋាភិបាលបានសម្រេចជាគោលការណ៍ដោយត្រៀមកញ្ចប់ថវិកាពិសេសចំនួន៣៥លានដុល្លារបន្ថែមទៀត ដើម្បីគាំទ្រដល់ការផ្តល់ប្រាក់កម្ចីមានអត្រាការប្រាក់ទាបជូនដល់សហគមន៍កសិកម្មទំនើបនៅក្នុងរយៈពេលបីឆ្នាំទៀត ចាប់ពីឆ្នាំ២០២៥ ដល់២០២៧។ ទន្ទឹមនឹងនេះដែរ រាជរដ្ឋាភិបាលក៏បាននិងពង្រីកការអភិវឌ្ឍសហគមន៍កសិកម្មទំនើបនៅតាមបណ្តាខេត្ត និងគ្របដណ្តប់លើដំណាំដែលមានសក្តានុពលខ្ពស់ផ្សេងទៀត ដូចជា ស្វាយចន្ទី កៅស៊ូ និងផ្លែទុរេនជាដើម៕
