ភ្នំពេញ៖ លោក យូ ចន្ទប្រសិទ្ធ អនុប្រធាននាយកដ្ឋានអភិរក្សជលផលនៃរដ្ឋបាលជលផល បានបញ្ជាក់ប្រាប់ARDB TVថា កំពង់ប្រាក់បានបង្កើតជម្រកត្រីជាង២០០ កន្លែង ហើយក៏ជាទីជម្រកត្រីពូជដ៏មានសក្តានុពលផងដែរនៅក្នុងខេត្តពោធិ៍សាត់។
លោក យូ ចន្ទប្រសិទ្ធ បានលើកឡើងថា កំពង់ប្រាក់ វាជាជម្រកដ៏មានសារៈសំខាន់ណាស់សម្រាប់ត្រីជ្រកពួន ពេលមានព្យុះភ្លៀង ផ្គរ រន្ទះ អ្វីមួយកើតឡើង។ជម្រកនេះដែរប្រៀបដូចជាអ្នកយាមចាំជួយការពារពួកវា នៅពេលណាដែលមានការនេសាទខុសច្បាប់ វាអាចទៅសម្ងំលាក់ខ្លួនគេចរួចជីវិត។ដោយក្នុងនេះពួកវាអាចពួននៅពេលគេអូសអួនឬរាយមង ។ក្រៅពីនេះក៏ជាកន្លែងចំណីសម្រាប់ពួកវាស៊ីដោយ មានត្រីតូចៗឬប្រភេទសត្វក្នុងទឹក ដែលជាកន្លែងចំណីត្រីតាមធម្មជាតិ។
លោកបានបញ្ជាក់ឲ្យដឹងថា ក្រៅពីមានជម្រកការពារនេះតំបន់អភិរក្សត្រី មួយកន្លែងនេះ ក៏បានកិច្ចការពារយ៉ាងរឹងមាំដោយមានកងកម្លាំងការពារ២៤ម៉ោង ម្ល៉ោះហើយបច្ចុប្បន្នទីកន្លែងនេះបានក្លាយជាទីកន្លែងស្តុកត្រីដ៏សំខាន់។ដោយក្នុងនេះកំពង់ប្រាក់មាន កម្លាំងឈរជើងប្រចាំការជាប្រចាំក្នុងនោះរួមមាន មន្រ្តីជលផល អាវុធហត្ថ និងកងទ័ពជើងគោកយោធភូមិភាគ៥ជាដើម។
លោក អ៊ុក វិបុលប្រធាននាយកដ្ឋានអភិរក្សជលផលនៃរដ្ឋបានជលផលបានឱ្យដឹងថា ទីនេះក៏ជាកន្លែងអភិរក្សត្រីមេពូជ ហើយបច្ចុប្បន្ន កំពុងតែ ស្តុកត្រីចម្រុះប្រមាណជា៣០០តោន សម្រាប់បន្តពូជ ដែលមានតម្លៃសេដ្ឋកិច្ចខ្ពស់ ជាពិសេស ត្រីប្រម៉ា ត្រីកេស ត្រីគល់រាំងដែលកំពុងទទួលរងគ្រោះនិងក៏ដូចជាត្រីត្រសក់ជាដើម។
លោកបានអះអាងទៀតថា តាមការវាយតម្លៃនៅកំពង់ប្រាក់នេះ មានផលស្តុកត្រីប្រមាណជា២៥០តោន កាលពីឆ្នាំ២០២៣ ហើយ២០២៤ មានប្រមាណ ៣០០តោន ដែលមានការកើនឡើងប្រមាណជា៤០ ទៅ៥០តោន បើប្រៀបធៀបរយៈពេល២ឆ្នាំមកនេះ។
ដោយឡែក លោក ប៉ែន សុខុម ប្រធានសហគមន៍នេសាទកំពុងប្រាក់ ឱ្យដឹងដែរថា សត្វត្រីកំពុងរស់នៅតំបន់អភិរក្សនេះមានច្រើនប្រភេទតែក៏មិនសម្បូរច្រើនណាស់ណាដែរ ។សម្រាប់តំបន់ក្នុងការនេសាទវិញមានទំហំប្រមាណជិត ៥០០ហិកតា។
ដើម្បីអភិរក្សត្រីបានគង់វង្សយូរអង្វែងសម្រាប់សហគមន៍មូលដ្ឋាននោះ លោក ប៉ែន សុខុម បានសំណូមពរឱ្យរាជរដ្ឋាភិបាល ក៏ដូចជាអង្គការដៃគូ ចូលរួមអភិរក្ស និងពិសេសបង្រ្កាបទល្មើស ទើបទទួលបានជោគជ័យ។
នៅរដូវប្រាំងកន្លែងអភិរក្សជលផលកំពង់ប្រាក់ សម្បូរទៅដោយប្រភេទត្រីដែលមាន តម្លៃសេដ្ឋកិច្ចខ្ពស់ដូចជា ប្រម៉ា ត្រីកែស សណ្តាយ ត្រសក់ ស្កោក ក្រាយឍ ច្រកែង ក្រពាត់ ពោ និងត្រីកញ្ចុះជាដើម។ លើសពីនេះកន្លែងនេះក៏នៅមានត្រីត្រសក់ និងត្រីគល់រាំងដែលជាប្រភេទត្រីកំពុងរងគ្រោះជិតផុតពូជទៀតផង។
ការបង្កើតជម្រកត្រីក្នុងទីលំហនៃបឹងទន្លេសាបពិតជាបានផ្តល់នូវសារៈសំខាន់សម្រាប់ត្រី ពិសេសត្រីពូជសំខាន់ៗជ្រកពួននៅពេលជួបគ្រោះអាសន្នអ្វីមួយកើតឡើង។ជម្រកដែលមានឈើរាងបួនជ្រុង ហើយអម ដោយរបាំងការពារមាំទាំ ទាំងនេះប្រៀបដូចជាអ្នកយាមឥតចេះទារប្រាក់បៀវត្ស ដែលតែងតែជួយសង្រ្គោះត្រីនាគ្រាដែលមានអាសន្ន មកយាយីពួកវា។
ពង់ប្រាក់ មានទំហំដី២ ៧០០ហិកតា គឺស្ថិតក្នុង ចំណោមកន្លែងអភិរក្សជលផលចំនួន៣១កន្លែង នៅលើបឹងទន្លេសាប។កន្លែងអភិរក្សជលផលដ៏សំខាន់មួយកន្លែងនេះ មានបណ្តោយ ៧គីឡូម៉ែត្រ និងទទឹង ៣ គីឡូម៉ែត្រ ដោយលាតសន្ធឹងលើផ្ទៃទឹកជាប់ជាមួយភូមិចំនួន៣ ភូមិកំពង់ឡ ឃុំកំពង់ពោធិ៍ ភូមិអូរអាកល់ ឃុំអូរសណ្តាន់ និងភូមិកំពង់ប្រាក់ ឃុំស្នាអន្សារ ស្រុកក្រគរ ខេត្តពោធិ៍សាត់៕
