ទីក្រុងហូជីមិញ៖ ផ្លែឈើរីដាំតាមផ្ទះសំណាញ់នៅក្នុងប្រទេសចិន កំពុងតែសម្រុកចូលទីផ្សារនៅក្នុងប្រទេសវៀតណាម ដោយសារលក់ក្នុងតម្លៃទាបជាងផ្លែឈើរីនាំចូលពីប្រទេសអូស្ត្រាលី ឬសហរដ្ឋអាមេរិក។
យោងតាមការចេញផ្សាយរបស់សារព័ត៌មាន វៀតណាម អេចប្រេស បានឱ្យដឹងថា ផ្លែឈើរីនាំចូលពីប្រទេសចិន មានគុណភាពល្អធម្មតាលក់ក្នុងតម្លៃ៥០០ ០០០ដុង ឬស្មើនឹង១៩ដុល្លារ ក្នុងមួយគីឡូក្រាម ខណៈផ្លែឈើរីល្អលេខ១ លក់ក្នុងតម្លៃត្រឹមតែ៦លានដុង ឬស្មើនឹង២៣ដុល្លារ ក្នុងមួយគីឡូក្រាម។ ផ្ទុយទៅវិញ ផ្លែឈើរីនាំចូលពីប្រទេសអូស្ត្រាលី និងសហរដ្ឋអាម៉េរិក មានតម្លៃខ្ពស់ជាងជិតពីរដង
ម្យ៉ាងវិញទៀត អ្វីដែលអ្នកចូលចិត្តទិញផ្លែឈើរីរបស់ចិន មកបរិភោគ គឺដោយសារផលិតផលផ្លែឈើប្រភេទនេះ ដាំនៅក្នុងផ្ទះសំណាញ់ ដែលមានការគ្រប់គ្រងយ៉ាងម៉ត់ចត់ មិនប្រើជីគីមី ឬសារធាតុអកម៉ូនឡើយ។
អ្នកលក់ផ្លែឈើរីនៅក្នុងផ្សារវៀតណាម បាននិយាយថា ផ្លែឈើរីរបស់ចិន ចាប់ផ្តើមពេញនិយមនៅតាមទីផ្សារផ្លែឈើរបស់វៀតណាម។ ផ្លែឈើរីរបស់ចិននេះ ក៏មានទំហំប្រហាក់ប្រហែលផ្លែឈើរីនាំចូលពីប្រទេសអូស្ត្រាលី ព្រមទាំងមានរសជាតិផ្អែម និងមានក្លិនឈ្ងុយឆ្ងាញ់ថែមទៀតផង។
អ្នកលក់នៅផ្លែឈើរិមា្នក់ នៅក្នុងទីក្រុងហូជីមិញ បាននិយាយថា ផ្លែឈើរីរបស់គាត់បេះមកពីកសិដ្ឋានផ្ទះសំណាញ់ រួចដឹកតាមយន្តហោះ មកដល់ប្រទេសវៀតណាមក្នុងរយៈពេលត្រឹមតែមួយ ឬពីរថ្ងៃប៉ុណ្ណោះ ដូច្នេះផ្លែនៅស្រស់ល្អណាស់។
ចំណែកអ្នកនាំចូលផ្លែឈើរី នៅក្នុងទីក្រុងហូជីមិញ បាននិយាយថា ក្រុមហ៊ុនរបស់គាត់បញ្ជាទិញផ្លែឈើរីទាំងនេះ បានត្រឹមតែប្រហែល១០០កេសប៉ុណ្ណោះ។
យោងតាមរបាយការណ៍ពីទីផ្សារលក់ដុំផ្នែកផលិតផលកសិកម្មរបស់វៀតណាម បានបង្ហាញថា ផ្លែឈើរីចិនដាំក្នុងផ្ទះសំណាញ់មិនទាន់ទទួលបានការអនុញ្ញាតឱ្យនាំចូលជាផ្លូវការនៅឡើយទេ ដោយសារមិនទាន់មានបរិមាណគ្រប់គ្រាន់។
ចំណែកទិន្នន័យអន្តរជាតិវិញ បានបង្ហាញថា ផ្លែឈើរីរបស់ចិននេះ ភាគច្រើនដាំនៅក្នុងខេត្ត សានទុង ដែលជាតំបន់អភិវឌ្ឍន៍សម្រាប់ដាំដំណាំហូបផ្លែផ្សេងៗ ជាពិសេសផ្លែឈើរីតែម្តង។
ផ្លែឈើរីលក់នៅក្នុងប្រទេសចិន ត្រឹមតម្លៃពី៤៥ ទៅ៥៥យន់ ឬស្មើនឹង៥ ទៅ៨ដុល្លារ ក្នុងមួយគីឡូក្រាម។ រីឯតំបន់ដំាឈើហូបផ្លែមួយកន្លែងទៀត នៅក្នុងប្រទេសចិន គឹខេត្ត តាលៀន ដែលមានផ្លែឈើរីល្អបំផុត ក្នុងឆ្នាំ២០២៥នេះ លក់ក្នុងតម្លៃ១៣០យន់ ឬស្មើនឹង១៨ដុល្លារ។
គិតត្រឹមឆ្នាំ២០២៥នេះ នៅទូទាំងប្រទេសចិន មានផ្ទៃដីដាំដំណាំឈើរីសរុបចំនួន១,៥លានហិកតា ក្នុងនោះ ប្រាំសែនហិកតាស្ថិតនៅក្នុងខេត្ត សានទុង ហើយភាគច្រើនជាកសិដ្ឋានផ្ទះសំណាញ់ ដែលអាចផ្តល់ទិន្នផលជាងមួយលានតោន។
យោងតាមរបាយការណ៍ស្ថិតិរបស់ចិន បានឱ្យដឹងថា អ្នកដាំឈើរីនៅក្នុងខេត្ត សានទុង មានចំនួនកើនឡើងជាបន្តបន្ទាប់ ដោយចំំំំណាយដើមទុនប្រមាណ១,៥យន់ ឬស្មើនឹងពីរម៉ឺនដុល្លារ សម្រាប់សាងសង់ផ្ទះសំណាញ់លើផ្ទៃដីទំហំមួយហិកតា។ ចំណែកកម្មករស៊ីឈ្នួលបេះផ្លែឈើរី ក្នុងមួយថ្ងៃទទួលបានប្រាក់ចំនួន២០០យន់ ឬស្មើនឹង២៨ដុល្លារ៕
