ញូវដេលី៖ នៅក្នុងការសម្រេចចិត្តរបស់បណ្តាប្រទេសម្ចាស់ហត្ថលេខីជាច្រើន នៅក្នុងសន្និសីទ នាទីក្រុងហ្សឺណែវ ប្រទេសស្វីស កាលពីសប្តាហ៍មុន បានឈានដល់ធ្វើកិច្ចព្រមព្រៀងលុបបំបាត់ការប្រើប្រាស់ថ្នាំពុលសម្លាប់សត្វល្អិត ដែលអាចបង្កគ្រោះថ្នាក់ដល់សុខភាពមនុស្ស និងបំផ្លាញបរិស្ថាន គឺថ្នាំពុលឈ្មោះ គ្លពីរីហ្វុស (Chlorpyrifos) ផលិតនៅសហរដ្ឋអាម៉េរិក ប៉ុន្តែសម្រាប់ប្រទេសឥណ្ឌា និងប្រទេសមួយចំនួនទៀត សុំប្រើប្រាស់បន្តទៀតសិន ព្រោះមិនទាន់មានថ្នាំពុលថ្មីមកជំនួស។
យោងតាមសារព័ត៌មានរបស់ឥណ្ឌា ចេញផ្សាយថ្ងៃទី៦ ខែឧសភា ឆ្នាំ២០២៥ បានឱ្យដឹងថា នៅដំណាក់កាលនេះ ប្រទេសឥណ្ឌានឹងបន្តប្រើថ្នាំពុលនេះរយៈពេលយ៉ាងហោចណាស់ប្រាំឆ្នាំទៀត ដើម្បីបាញ់សម្លាប់សត្វល្អិតចង្រៃស៊ីដំណាំជាង១០មុខ ដូចជា ស្រូវ ស្រូវសាលី អំពៅ សណ្តែកសៀង សណ្តែកបារាំង កប្បាស ត្រប់ ខ្ទឹមបារាំង ប៉ោម និងសណ្តែកដី ជាដើម។
លើពិភពសព្វថ្ងៃមានប្រទេសជាង៤០ រួមទាំងចក្រភពអង់គ្លេស និងសហរដ្ឋអាមេរិក បានហាមឃាត់ការប្រើប្រាស់ថ្នាំពុលសម្លាប់សត្វល្អិតឈ្មោះ គ្លពីរីហ្វុស នៅលើដំណាំគ្រប់ប្រភេទ។ ចំណែកប្រទេសឥណ្ឌា ក្នុងអំឡុងពេលការចរចា បានដាក់ពាក្យសុំការលើកលែង ដោយលើកហេតុផលពីតម្រូវការចាំបាច់សម្រាប់ការប្រើប្រាស់ថ្នាំពុលនេះ នៅលើដំណាំមួយចំនួន ព្រោះមិនទាន់មានថ្នាំពុលថ្មីអាចជំនួសបាននៅឡើយ។
ប្រទេសឥណ្ឌា រួមជាមួយប្រទេសផ្សេងទៀត ដូចជា រុស្ស៊ី កេនយ៉ា ហ្សំប៊ី ឥណ្ឌូណេស៊ី អារ៉ាប៊ីសាអូឌីត និងកូស្តារីកា ក៏បានសុំការអនុគ្រោះលើកលែងបណ្តោះអាសន្នសិន ដោយលើកហេតុថា ដើម្បីធានាដល់សន្តិសុខស្បៀងរបស់ខ្លួន។
ទោះបីជាប្រទេសឥណ្ឌា និងប្រទេសផ្សេងទៀត អាចបន្តប្រើប្រាស់ថ្នាំពុលប្រភេទនេះ ដើម្បីដោះស្រាយបញ្ហាសត្វល្អិតចង្រៃក៏ដោយ សេចក្តីសម្រេចនៅក្នុងសន្និសីទ នាទីក្រុងហ្សឺណែវ កាលពីសប្តាហ៍មុន នឹងចាប់បង្ខំអ្នកប្រើប្រាស់ថ្នាំពុលនេះ ឱ្យស្វែងរកជម្រើសផ្សេងទៀត មុននឹងឈានចូលដល់ដំណាក់ការលុបបំបាត់ទាំងស្រុងតែម្តង។
ការសម្រេចបែបនេះ ត្រូវបានធ្វើឡើងនៅក្នុងសន្និសីទរបស់ភាគីម្ចាស់ហត្ថលេខីលើអនុសញ្ញា ស្តីពីការគ្រប់គ្រងសារធាតុគីមីគ្រោះថ្នាក់ និងកាកសំណល់បំពុលបរិស្ថាន ដែលត្រូវបានរៀបចំឡើង ដើម្បីពង្រឹងកិច្ចខិតខំប្រឹងប្រែងជាសកល។
អ្នកជំនាញ ដែលបាននិងកំពុងតាមដានការវិវឌ្ឍន៍នៃការប្រើប្រាស់ថ្នាំពុលសម្លាប់សត្វល្អិត បានស្វាគមន៍ចំពោះការចុះបញ្ជី ថ្នាំពុល គ្លពីរីហ្វុស ចូលក្នុងឧបសម្ព័ន្ធនៃឈ្មោះថ្នាំពុលត្រូវលុបបំបាត់តាមអនុសញ្ញា ប៉ុន្តែបានសម្តែងការព្រួយបារម្ភចំពោះការសុំលើកលែងមានច្រើនប្រទេសពេក។
ថ្នាំពុល គ្លពីរីហ្វុស (Chlorpyrifos) ឬហៅមួយបែបទៀតថា គ្លពីរីហ្វុស មេទីល (Chlorpyrifos Methyl) គឺជាថ្នាំសរីរាង្គផូស្វ័រសម្លាប់សត្វល្អិត ដោយប្រើបាញ់លើដំណាំ លើសត្វ បាញ់ក្នុងអគារ និងនៅក្នុងទីកន្លែងផ្សេងទៀត ដើម្បីសម្លាប់សត្វល្អិតចង្រៃជាច្រើនប្រភេទ រួមទាំងកណ្តៀ និងដង្កូវជាដើម។ ថ្នាំពុល គ្លពីរីហ្វុស ត្រូវបានចុះបញ្ជីប៉ាតង់ នៅឆ្នាំ១៩៦៦ ជាកម្មសិទ្ធិផលិតផលរបស់ក្រុមហ៊ុនអាម៉េរិក។
ថ្នាំពុល គ្លពីរីហ្វុស ត្រូវបានចាត់ទុកដោយអង្គការសុខភាពពិភពលោកថា មានគ្រោះថ្នាក់ដល់សុខភាពមនុស្ស។ ការប៉ះពាល់ថ្នាំពុលនេះលើសពីកម្រិតបច្ចេកទេសណែនាំ នឹងបង្កផលប៉ះពាល់លើឥទ្ធិពលសរសៃប្រសាទ នាំឱ្យកើតជំងឺវិកលចរិតជាដើម។ ចំណែកអំឡុងពេលមានផ្ទៃពោះវិញ ថ្នាំពុលនេះអាចបង្កផលប៉ះពាល់ដល់ការលូតលាស់ផ្នែកខួរក្បាលរបស់ទារកក្នុងផ្ទៃ។
នៅចក្រភពអង់គ្លេស ការប្រើប្រាស់ថ្នាំពុល គ្លពីរីហ្វុស ត្រូវបានហាមឃាត់ នៅថ្ងៃទី០១ ខែមេសា ឆ្នាំ២០១៦ ដោយមានករណីលើកលែងតិចតួចបំផុត។ បើគិតត្រឹមឆ្នាំ២០២០ ថ្នាំពុល គ្លពីរីហ្វុស ត្រូវបានហាមឃាត់ពាសពេញប្រទេសជាសមាជិតសហភាពអឺរ៉ុប ដោយមិនអាចប្រើប្រាស់ថ្នាំពុលនេះបានទៀតទេ។
ចំណែកនៅថ្ងៃទី១៨ ខែសីហា ឆ្នាំ២០២១ ទីភ្នាក់ងារការពារបរិស្ថានរបស់សហរដ្ឋអាមេរិក បានប្រកាសហាមឃាត់ការប្រើប្រាស់ថ្នាំពុល គ្លពីរីហ្វុស លើដំណាំទាំងអស់ នៅក្នុងសហរដ្ឋអាមេរិក៕
