ក្រុងវៀងចន្ទន៍៖ ផលិតផលត្រីទឹកសាប ដែលប្រជាកសិករឡាវចិញ្ចឹមត្រូវបាននាំចេញទៅកាន់ទីផ្សារក្នុងប្រទេសចិនជាលើកដំបូង ដែលជាការច្រកនាំចេញដ៏សំខាន់ក្នុងការធ្វើពាណិជ្ជកម្មជាមួយចិនក្រោមគំនិតផ្តួចផ្តើមខ្សែក្រវាត់ និងផ្លូវ។
យោងតាមការផ្សាយរបស់វិទ្យុជាតិឡាវ បានឱ្យដឹងថា ប្រភេទត្រីប្រាកទឹកសាប ដែលចិញ្ចឹម និងកែច្នៃវេចខ្ចបក្នុងប្រទេសឡាវ ត្រូវបានចូលប្រទេសចិនជាលើកដំបូង បន្ទាប់ពីឆ្លងកាត់ការត្រួតពិនិត្យ និងអនុញ្ញាតឲ្យនាំចូលពីរដ្ឋបាលគយចិន នៅទីក្រុង សេនចេន ខេត្តក្វាងទុង កាលពីថ្ងៃទី៣១ ខែមីនា ឆ្នាំ២០២៥។
ការនាំចេញនេះ គឺជាផលិតផលត្រីប្រា មានគុណភាពខ្ពស់ ដែលត្រូវបានចិញ្ចឹម និងកែច្នៃវេចខ្ចប់ នៅក្នុងកសិដ្ឋានចិញ្ចឹមត្រីប្រា អមដងទន្លេមេគង្គ ស្ថិតនៅក្នុងខេត្តចំប៉ាសាក់ របស់ប្រទេសឡាវ។
ទិន្នផលត្រីប្រានាំចេញនេះ បានមកពីគម្រោងកសិដ្ឋានចិញ្ចឹមត្រី ស្ថិតនៅតាមដងទន្លេមេគង្គ ដែលផ្តល់ទិន្នផលត្រីស្រស់រហូតដល់២០ពាន់តោន កែច្នៃបានទិន្នផលត្រីប្រមាណ១២ពាន់តោន និងអាចរកប្រាក់ចំណូលបានប្រហែល៤៤លានដុល្លារ។
ត្រីដែលមាននៅក្នុងការដឹកជញ្ជូនលើកដំបូងបានមកពីរោងចក្រកែច្នៃទឹក ដែលទើបសាងសង់ថ្មីនៅខាងក្នុងសួនឧស្សាហកម្ម ដែលត្រូវបានអនុញ្ញាតឱ្យលក់ត្រីទៅប្រទេសចិន និងដំណើរការដោយប្រើប្រាស់ប្រព័ន្ធសុវត្ថិភាព និងគុណភាពអាហារទំនើប។
ផលិតផលត្រីប្រានេះ ត្រូវបានឆ្លងកាត់ការត្រួតពិនិត្យយ៉ាងម៉ត់ចត់ពីសំណាក់អាជ្ញាអធរគយចិន ប្រចាំនៅកំពង់ផែ ហ្សេកូ ក្នុងទីក្រុង សេនចេន ខេត្ត ក្វាងទុង ហើយឥឡូវនេះ ផលិតផលត្រីនោះ បានទៅដល់ដៃប្រជាជនចិនទិញបរិភោគហើយ នៅក្នុងប្រវត្តិសាស្ត្រនៃពាណិជ្ជកម្មជលផលរវាងឡាវ និងចិន។
នេះជាលើកទីមួយហើយ ដែលផលិតផលត្រី នាំចេញពីប្រទេសឡាវ ត្រូវបានអនុញ្ញាតឱ្យនាំចូលទៅកាន់ទីផ្សារប្រទេសចិនដោយផ្ទាល់ បន្ទាប់ពីប្រើរយៈពេលងសបីឆ្នាំ នៃការអភិវឌ្ឍគម្រោងរួមគ្នា គាំទ្រដោយគំនិតផ្តួចផ្តើមខ្សែក្រវ៉ាត់ និងផ្លូវ។
គម្រោងនេះត្រូវបានដឹកនាំអនវុត្តដោយក្រុមហ៊ុនចិន ស្ថិតនៅក្នុងក្រុង សេនចេន ខេត្តក្វាងទុង ដោយមានការគាំទ្រយ៉ាងខ្លាំងពីគណៈកម្មការអភិវឌ្ឍន៍ និងកំណែទម្រង់នៃក្រុង សេនចេន។
កាលពីខែធ្នូ ឆ្នាំ២០២៤ រដ្ឋាភិបាលនៃប្រទេសឡាវ និងរដ្ឋាភិបាលចិន បានចុះហត្ថលេខាលើកិច្ចព្រមព្រៀង ស្តីពីការត្រួតពិនិត្យ និងតម្រូវការដាក់ឱ្យនៅដាច់ពីគេ សម្រាប់ផលិតផលជលផល ដែលត្រូវនាំចេញទៅប្រទេសចិន។ក្រោយមក មិនយូរប៉ុន្មាន រដ្ឋបាលទូទៅនៃគយចិន បានប្រកាសអនុញ្ញាតថា ឡាវបានទទួលសិទ្ធិនាំចូលទៅក្នុងទីផ្សាររបស់ចិន។
ផលិតផលត្រីប្រាខាងលើនេះ ត្រូវបានចិញ្ចឹម និងកែច្នៃនៅក្នុងសួនឧស្សាហកម្មចិញ្ចឹមត្រី ស្ថិតនៅអមដងមេគង្គ លើផ្ទៃដីទំហំ២ ៨៦៣ហិកតា ដែលជាកសិដ្ឋានចិញ្ចឹមត្រីទីមួយ និងធំជាងបំផុតនៅក្នុងប្រទេសឡាវ។
កសិដ្ឋាននេះ នៅពេលសាងសង់រួចរាល់ ផលិតបានត្រីកែច្នៃ ជាងប្រាំសែនតោនក្នុងមួយឆ្នាំ ជួយធានាដល់ការផ្គត់ផ្គង់ត្រីសម្រាប់នាំចេញទៅកាន់ទីផ្សារប្រទេសចិន។
គម្រោងនេះបានទទួលការគាំទ្រយ៉ាងខ្លាំងពីក្រសួងកសិកម្ម និងរុក្ខាប្រមាញ់ឡាវ តាមរយៈនាយកដ្ឋានបសុសត្វ និងនេសាទ។
នាពេលកន្លងមក មុនការអភិវឌ្ឍកសិដ្ឋានចិញ្ចឹមត្រីនេះ ប្រទេសឡាវមិនមានប្រព័ន្ធវារីវប្បកម្មទ្រង់ទ្រាយធំ ឬបែបពាណិជ្ជកម្មសម្រាប់ផលិតផលជលផលជាមួយប្រទេសចិនឡើយ។ ប៉ុន្តែគម្រោងនេះ ត្រូវបានបង្កើតឡើងជាខ្សែសង្វាក់ផ្គត់ផ្គង់ជាប្រព័ន្ធពីការចិញ្ចឹមត្រីរហូតដល់ការនាំចេញ។
ការបញ្ជូនផលិតផលត្រីប្រាឡាវ ដោយជោគជ័យទៅកាន់ទីក្រុង សេនចេន ត្រូវបានគេមើលឃើញថា ជាគំរូល្អនៃកិច្ចសហប្រតិបត្តិការ និងពាណិជ្ជកម្មជលផលសកល ដែលគាំទ្រដល់ការប្រើប្រាស់ធនធានធម្មជាតិប្រកបដោយនិរន្តរភាព និងផ្តល់នូវឱកាសថ្មីមួយទៀតសម្រាប់ការអភិវឌ្ឍវារីវប្បកម្ម នៅក្នុងប្រទេសឡា៕
