កំពង់ធំ-កំពង់ចាម៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយក ធនាគារអភិវឌ្ឍន៍ជនបទ និងកសិកម្ម (ARDB) បានអញ្ជើញដឹកនាំគណៈប្រតិភូជាន់ខ្ពស់និងសហការីដោយមានការចូលរួមពី អភិបាលរងខេត្តកំពត អភិបាលរងខេត្តកំពង់ធំ អភិបាលរងខេត្តកំពង់ចាម មន្រ្តីខេត្តកែប មន្រី្តកសិកម្មឃុំ, ក្រុមហ៊ុនផ្គត់ផ្គង់ចំណីត្រី, វារីវប្បករ, និងក្រុមហ៊ុនធានាទិញផលវារីប្បកម្ម ចុះធ្វើទស្សនកិច្ចសិក្សាស្វែងយល់អំពីខ្សែច្រវាក់ផលិតកម្មចិញ្ចឹមត្រី ការបង្កាត់ពូជត្រី និងផលិតកម្មទាពង នៅក្នុងភូមិសាស្ត្រខេត្តកំពង់ធំ និងខេត្តកំពង់ចាម នាថ្ងៃទី២៩ ខែមិថុនា ឆ្នាំ២០២៦។
ក្នុងកម្មវិធីពេលព្រឹក ឯកឧត្តមបណ្ឌិត កៅ ថាច និងគណៈប្រតិភូ បានអញ្ជើញទៅកសិដ្ឋាន TP ចិញ្ចឹមត្រីរ៉ស់កំពង់ធំ របស់លោក តាន់ វណ្ណា ម្ចាស់កសិដ្ឋាន ស្ថិតនៅឃុំកំពង់ថ្ម ស្រុកសន្ទុក ខេត្តកំពង់ធំ ដែលមានស្រះចិញ្ចឹមត្រីរស់ជិត ១០០ ស្រះ និងអាចប្រមូលទិន្នផលត្រីបានចន្លោះពី ១៥ ទៅ២០ តោននៅក្នុងមួយថ្ងៃ និងជាកសិដ្ឋានចិញ្ចឹមត្រីរ៉ស់ទ្រង់ទ្រាយធំមួយនៅកម្ពុជា ដើម្បីស្វែងយល់ដោយផ្ទាល់អំពីដំណើរការចិញ្ចឹម ការគ្រប់គ្រងបច្ចេកទេសផលិតកម្ម ការថែទាំ ការគ្រប់គ្រងថ្លៃដើម និងការធ្វើទីផ្សារ។
ក្នុងឱកាសនោះដែរ លោក តាន់ វណ្ណា ក៏បានលើកឡើងជំរាបជូនគណៈប្រតិភូអំពីមហិច្ឆិតារបស់ខ្លួនក្នុងការពង្រីកស្រះចិញ្ចឹមត្រីបន្ថែមទៀត ដើម្បីរួមចំណែកផ្គត់ផ្គង់ទីផ្សារត្រីរស់នៅក្នុងស្រុក និងកាត់បន្ថយការនាំចូលពីក្រៅប្រទេស។
បន្ទាប់មក គណៈប្រតិភូបានបន្តដំណើរទៅកាន់ កសិដ្ឋានចិញ្ចឹមទា អិលស៊ីឌីស៊ី អេកូ ហ្គ្រីន (LCDC Eco Green) ដែលមានពាក្យស្លោក «កសិដ្ឋានបៃតង ដំណោះស្រាយបៃតង» ស្ថិតនៅភូមិស្តុកស្តម្ភ ឃុំជ្រាប់ ស្រុកសន្ទុក ខេត្តកំពង់ធំ ។ កសិដ្ឋាននេះជាកសិដ្ឋានចិញ្ចឹមទាយកពងប្រមាណ ២ម៉ឺនក្បាល និង ទ្រង់ទ្រាយធំមួយ ដែលអាចផ្គត់ផ្គង់ពងមានគុណភាពទៅកាន់ទីផ្សារក្នុងស្រុកប្រមាណ ១៧០០០ គ្រាប់ក្នុងមួយថ្ងៃ ។
នៅក្នុងកម្មវិធីនារសៀលថ្ងៃដដែល ឯកឧត្តមបណ្ឌិត និងគណៈប្រតិភូបានបន្តដំណើរទៅកាន់ខេត្តកំពង់ចាម ដើម្បីពិនិត្យ ខ្សែច្រវាក់ផលិតកម្មបង្កាត់ពូជត្រីប្រា និងប្រតិបត្តិការអាជីវកម្មរបស់ កសិដ្ឋានផលិតកូនត្រីទឹកឆា ដែលជាកម្មសិទ្ធិរបស់លោក ហួត ឆាយ។ កសិដ្ឋាននេះគឺជាមជ្ឈមណ្ឌលបង្កាត់ និងផ្គត់ផ្គង់ពូជត្រីដ៏សំខាន់មួយនៅក្នុងខេត្តកំពង់ចាម ដោយបានផ្គត់ផ្គង់កូនត្រីដែលមានគុណភាពដល់អ្នកចិញ្ចឹមត្រីក្នុងខេត្ត និងបណ្តាខេត្តជាច្រើនទៀត។
ក្នុងឱកាសនោះ គណៈប្រតិភូបានស្វែងយល់យ៉ាងលម្អិតអំពីដំណើរការបច្ចេកទេសនៃការបង្កាត់ពូជត្រីប្រា ការគ្រប់គ្រងគុណភាពកូនត្រីឱ្យមានអត្រារស់ខ្ពស់ ការរៀបចំប្រព័ន្ធចំណីអាហារ និងការថែទាំតាមស្តង់ដារ ព្រមទាំងប្រព័ន្ធភស្តុភារ និងបណ្តាញចែកចាយផលិតផលទៅកាន់ទីផ្សារ។
ដំណើរទស្សនកិច្ចសិក្សានេះ ត្រូវបានរៀបចំឡើងក្នុងគោលបំណងសំខាន់ៗ រួមមាន៖ សិក្សា និងវាយតម្លៃវឌ្ឍនភាពនៃខ្សែច្រវាក់ផលិតកម្មចិញ្ចឹមត្រី បង្កាត់ពូជត្រី និងផលិតកម្មទាពងនៅមូលដ្ឋាន។ លើកកម្ពស់ការផ្ទេរចំណេះដឹង បច្ចេកវិទ្យា និងបទពិសោធន៍ជាក់ស្តែងដល់កសិករ ។ ជំរុញការអភិវឌ្ឍវិស័យវារីវប្បកម្ម និងការចិញ្ចឹមសត្វឱ្យក្លាយជាកសិកម្មពាណិជ្ជកម្មប្រកបដោយប្រសិទ្ធភាព និងស្តង់ដារខ្ពស់។ ពង្រឹងសមត្ថភាពផលិត និងផ្គត់ផ្គង់ផលិតផលក្នុងស្រុក ដើម្បីឆ្លើយតបតម្រូវការទីផ្សារ និងកាត់បន្ថយការពឹងផ្អែកលើការនាំចូល។ និង រួមចំណែកលើកកម្ពស់សេដ្ឋកិច្ចជនបទ បង្កើតការងារ និងបង្កើនប្រាក់ចំណូលជូនប្រជាពលរដ្ឋប្រកបដោយចីរភាព។
ដំណើរទស្សនកិច្ចសិក្សានាពេលនេះ បានឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់ ធនាគារអភិវឌ្ឍន៍ជនបទ និងកសិកម្ម (ARDB) ក្នុងការបន្តគាំទ្រវិស័យកសិកម្ម និងវារីវប្បកម្ម តាមរយៈការផ្តល់ហិរញ្ញប្បទាន ការកាត់បន្ថយថ្លៃដើម ការលើកកម្ពស់ការផ្ទេរបច្ចេកវិទ្យា និងការតភ្ជាប់ទីផ្សារ ដើម្បីជំរុញការអភិវឌ្ឍខ្សែច្រវាក់ផលិតកម្មឱ្យកាន់តែរឹងមាំ មានស្តង់ដារ និងមានសមត្ថភាពប្រកួតប្រជែងខ្ពស់ ទាំងនៅទីផ្សារក្នុងស្រុក និងទីផ្សារអន្តរជាតិ ស្របតាមគោលនយោបាយអភិវឌ្ឍន៍វិស័យកសិកម្មរបស់រាជរដ្ឋាភិបាលកម្ពុជា៕
