ស្រុកស្អាង ខេត្តកណ្តាល៖ នៅព្រឹកថ្ងៃសុក្រ ១៤រោច ខែពិសាខ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី១៥ ខែឧសភា ឆ្នាំ២០២៦ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ន (ARDB) បានអញ្ជើញជួបសំណេះសំណាល និងសួរសុខទុក្ខប្រជាកសិករ ស្ថិតក្នុងស្រុកស្អាង ខេត្តកណ្តាល។
នៅក្នុងពិធីសំណេះសំណាល និងសួរសុខទុក្ខប្រជាកសិករ ដោយមានការចូលរួមពី លោក ឃុត ផល្លា អភិបាលរងនៃគណៈអភិបាលស្រុកស្អាង,មន្ត្រីមន្ទីរកសិកម្មខេត្ត, លោកមេឃុំ មន្រ្តីកសិកម្មឃុំ ព្រមទាំងប្រជាកសិករសរុបចំនួន៦១០នាក់។
ក្នុងឱកាសជួបសំណេះសំណាលនេះ ឯកឧត្តមបណ្ឌិត កៅ ថាច បានមានប្រសាសន៍ផ្តាំផ្ញើដល់កសិករថា ការជួបជុំនៅថ្ងៃនេះ ធ្វើឡើងក្នុងគោលបំណងធំ២ ទី១ ណែនាំពីសមាគមបណ្តាញកសិករតេជោ ជាខែលការពារកសិករមិនឱ្យរងា ក្នុងករណីមានការរំលោភបំពានដោយខុសច្បាប់ណាមួយ។ សមាគមបណ្តាញកសិករតេជោ ជាស្ពានហិរញ្ញវត្ថុ ពាក់ព័ន្ធនិងកម្ចីកសិកម្មក្នុងវិស័យដាំដុះ និងចិញ្ចឹមសត្វ ដែលមានធនាគារ ARDB ចាំជួយសម្របសម្រួលកសិករគ្រប់ពេល ទាំងផ្នែកហិរញ្ញវត្ថុ បច្ចេកទេស និងទីផ្សារ។ គោលបំណងទី២ គឺការធ្វើកសិកម្មយ៉ាងណាឱ្យចំណេញ ដោយជួយកសិករឱ្យដឹងពីរបៀបរកថ្លៃដើមផលិត ចេះសម្រេចចិត្តត្រឹមត្រូវក្នុងការលក់កសិផលថា ចំណេញ ឬខាត។
ឯកឧត្តមបណ្ឌិតប្រតិភូ បានមានប្រសាសន៍ថា កម្ពុជាមិនអាចគេចចេញពីវិស័យកសិកម្មបានទេ ក្នុងគ្រាដែលពិភពលោកកំពុងបាត់បង់សណ្តាប់ធ្នាប់ និងភាពមិនច្បាស់លាស់ផ្នែកសេដ្ឋកិច្ចសកល ដូច្នេះ កសិកម្ម គឺជាឆ្នាំងបាយមិនត្រឹមតែសម្រាប់កម្ពុជាប៉ុណ្ណោះទេ ប៉ុន្តែក៏ជាឆ្នាំងបាយសម្រាប់ពិភពលោកផងដែរ។
ឯកឧត្ដមបណ្ឌិត បានមានប្រសាសន៍បន្តថា ខណៈដែលពិភពលោកកំពុងប្រឈមនិងបញ្ហាតម្លៃប្រេងឥន្ធនៈ និងជីឡើងថ្លៃ ធ្វើឲ្យថ្លៃដើមផលិតក្នុងវិស័យកសិកម្មបានហក់ឡើងខ្ពស់ ដូច្នេះសូមកសិករពិចារណក្នុងការស្វែងយល់ដោយខ្លួនឯង ក្នុងការប្រើប្រាស់ជីដែលចំណេញដល់ការធ្វើកសិកម្ម។ ប្រសិនបើតម្លៃជីថ្លៃពេក ឯកឧត្តមបណ្ឌិត បានណែនាំកសិករអាចប្រើជីគីមីពាក់កណ្តាល និងជីកំប៉ុសពាក់កណ្តាល។ ឯកឧត្តមបណ្ឌិតបណ្ឌិតក៏ណែនាំឱ្យបងប្អូនប្រជាកសិករ គួរនាំគ្នាផលិតជីធម្មជាតិ និងជីកំប៉ុស ដោយខ្លួនឯងក្នុងសហគមន៍ឱ្យបានច្រើន ដើម្បីធានាគុណភាព និងសុវត្ថិភាពដល់អ្នកបរិភោគ។
ឯកឧត្តមបណ្ឌិត ក៏បានមានប្រសាសន៍ថា ការផលិតជីកំប៉ុស បើយើងអាចផលិតបាន គឺជួយកាត់បន្ថយថ្លៃដើម ដែលនាំទៅដល់ការធ្វើកសិកម្មទទួលបានផលចំណេញច្រើន។
ឯកឧត្ដមបណ្ឌិត ក៏បានណែនាំកសិករពិចារណាក្នុងការប្រើប្រាស់ថ្នាំបណ្តេញសត្វល្អិត ធ្វើពីទឹកខ្មេះធ្យូងអង្កាមផងដែរ ដែលអង្គាមចំនួន៦០គីឡូក្រាម អាចដុតបានទឹកខ្មេះ មួយលីត្រ ហើយការចំណាយអស់តិច បានទាំងផេះអង្កាមសម្រាប់លាយធ្វើជាជីកំប៉ុស្តិ៍ និងទឹកខ្មេះធ្យូងអង្កាមសម្រាប់បណ្តេញសត្វល្អិត។
ឯកឧត្តមបណ្ឌិតក៏មានប្រសាសន៍បន្តទៀតថា បញ្ហាប្រឈមនាពេលបច្ចុប្បន្ន គឺជាឱកាសល្អសម្រាប់ការធ្វើកសិកម្ម ជាមុខរបរដែលកំពុងពេញនិយម ហើយយើងត្រូវតែបង្កើនការផលិត ផលិតផលកសិកម្ម ដែលមានគុណភាពខ្ពស់ គិតគូរពីសុខភាពរបស់អ្នកប្រើប្រាស់ ដើម្បីឈានទៅដល់ការផ្គត់ផ្គង់ក្នុងស្រុកជំនួសការនាំចូល។
ឯកឧត្តមបណ្ឌិតប្រតិភូ បានមានប្រសាសន៍បន្ថែមថា សមាគមបណ្តាញកសិករតេជោ មានតួនាទីសំខាន់ធ្វើជាស្ពានចម្លងដ៏រឹងមាំ តភ្ជាប់កសិករទៅប្រភពហិរញ្ញវត្ថុ (ឥណទាន) ការភ្ជាប់ទៅបច្ចេកទេស ទីផ្សារ និងអ្នកជំនាញជួយកសិករឱ្យទទួលបាននូវបច្ចេកវិទ្យាកសិកម្ម ដោះស្រាយបញ្ហាកង្វល់កសិករផលិតបានហើយគ្មានទីផ្សារលែងជាបញ្ហា។
ទន្ទឹមនឹងនេះ ឯកឧត្តមបណ្ឌិត កៅ ថាច បានជំរុញឱ្យកសិករចូលជាសមាជិកសមាគមបណ្តាញកសិករតេជោ ដើម្បីផលប្រយោជន៍របស់កសិករ និងបានសំណូមពរដល់ថ្នាក់ដឹកនាំ និងអាជ្ញាធរពាក់ព័ន្ធ ជួយសម្របសម្រួលឱ្យកសិករអាចចូលជាសមាជិកបានលឿនផងដែរ៕
