ហូជីមិញ៖ រលកកម្តៅ ដែលអូសបន្លាយពេលយូរបានបង្កឱ្យមានការខាតបង់យ៉ាងធ្ងន់ធ្ងរសម្រាប់កសិករវារីវប្បកម្ម នៅខេត្តទឹកខ្មៅ វៀតណាមហៅថា ខេត្តកាម៉ៅ នៃតំបន់ដីសណ្តទន្លេមេគង្គ ដោយបង្គា និងក្តាមបានងាប់ក្នុងទ្រង់ទ្រាយធំ ខណៈទឹកស្រះរីងស្ងួត និងកម្រិតប្រៃកើនឡើង ដោយសារបាតុភូតអែលនីណូ។
ក្នុងរយៈពេលប៉ុន្មានថ្ងៃកន្លងមកថ្មីៗនេះ ពាក់កណ្តាលនៃបង្គាមានអាយុ៧០ថ្ងៃ នៅក្នុងស្រះទឹកទំហំពីរហិកតា ដែលជាកម្មសិទ្ធិរបស់កសិករម្នាក់ បានងាប់អណ្តែតត្រៀបត្រាពេញស្រះ។
កម្តៅឡើងខ្លាំងធ្វើឱ្យរីងហួតទឹកលឿន ហើយការផ្លាស់ប្តូរបរិស្ថានភ្លាមៗ ធ្វើឱ្យបង្គាចុះខ្សោយ រហូតដល់ងាប់យ៉ាងច្រើនតែម្តង។
កសិកររូបនេះបាននិយាយថា “ប្រសិនបើលក្ខខណ្ឌអាកាសធាតុអំណោយផល ខ្ញុំអាចរកប្រាក់ចំណេញបានប្រហែល១ ៨៩៧ដុល្លារ ក្នុងរយៈពេលពីរខែទៀត។ ឥឡូវនេះ លុយថ្លៃដើមជិត១០លានដុង ឬស្មើនឹង២៨០ដុល្លាររបស់ខ្ញុំបានរលាយអស់ហើយ។”
កសិករចិញ្ចឹមបង្គា និងក្តាម ឈ្មោះ ដាង អានហ៊ុង (Dang An Hung) បាននិយាយថា ក្តាមចាប់ផ្តើមងាប់តាំងពីខែកុម្ភៈ ដោយសារក្នុងកម្តៅទឹកបានឡើងម្តងហើយម្តងទៀតអស់រយៈពេលពេញមួយឆ្នាំតែម្តង។ ប្រហែលមួយខែមុន ក្តាមចិញ្ចឹមនៅក្នុងអាងទំហំជាងបួនហិកតារបស់គាត់ បានចាប់ផ្តើមងាប់ជាបន្តបន្ទាប់ ដោយនៅទីបំផុតបានបាត់បង់ដើមទុនស្ទើរតែទាំងស្រុង និងខាតបង់ប្រាក់រាប់សិបលានដុង។
ប្រទេសវៀតណាមភាគខាងត្បូង បាននិងកំពុងប្រឈមនឹងអាកាសធាតុក្តៅខ្លាំងក្នុងរយៈពេលប៉ុន្មានសប្តាហ៍កន្លងមកនេះ ដោយសីតុណ្ហភាពនៅតាមបណ្តាខេត្តមួយចំនួន បានកើនឡើងលើសពី៣៧អង្សាសេ។
កសិករវៀតណាមបាននិយាយថា កម្តៅខ្លាំងបង្កើនល្បឿននៃការលូតលាស់សារាយសមុទ្រ។ នៅពេលសារាយងាប់ វាធ្វើឱ្យស្ថានភាពទឹកគ្មានស្ថិរភាព ងាយកើតជំងឺដល់ក្តាម និងបង្គា។
ស្ថានភាពនេះកំពុងកើតឡើងនៅស្ទើរទូទាំងខេត្តទឹកខ្មៅ ខណៈពេលឈានចូលដល់រដូវបង្កបង្កើនផល ដោយសារខេត្តនេះ គឺតំបន់វារីវប្បកម្មកំពុងរីកចម្រើនយ៉ាងឆាប់រហ័ស ដូចជាមុខរបរចិញ្ចឹមបង្គាឥឡូវនេះ មានផ្ទៃដីជាង៤២២ ០០០ហិកតា។
យោងតាមស្ថិតិបង្ហាញថា ចាប់តាំងពីដើមឆ្នាំ២០២៦រហូតមក វារីវប្បកម្មជាង១ ៣០០ហិកតា បានរងផលប៉ះពាល់ ដែលភាគច្រើនមានការខាតបង់លើសពី៧០ភាគរយ ដែលខ្ពស់ជាងរយៈពេលដូចគ្នាកាលពីឆ្នាំ២០២៥។ ក្នុងនោះរួមមានកសិដ្ឋានចិញ្ចឹមបង្គាបែបឧស្សាហកម្ម និងពាក់កណ្តាលឧស្សាហកម្ម មានផ្ទៃដីជិត២៤៧ហិកតា កសិដ្ឋានចិញ្ចឹមបង្គាបែបបុរាណប្រហែល៩៧ហិកតា និងកសិដ្ឋានចិញ្ចឹមក្តាមជាង៣៩០ហិកតា។ ប្រហែល៥៩ភាគរយ នៃការខូចខាតត្រូវបានសន្មតថា បណ្តាលមកពីអាកាសធាតុក្តៅខ្លាំងពេក ទើបបណ្តាលឱ្យកើតជំងឺលើបង្គា និងក្តាមចិញ្ចឹម។
មន្ទីរកសិកម្ម និងបរិស្ថាន ខេត្តទឹកខ្មៅរបស់វៀតណាម បានណែនាំអាជ្ញាធរមូលដ្ឋានឱ្យអនុវត្តវិធានការបង្ការ និងទប់ស្កាត់ជំងឺ ស្របពេលបញ្ជូនបុគ្គលិកជំនាញទៅប្រមូលសំណាក និងណែនាំកសិករអំពីការសម្អាតស្រះ ការសម្លាប់មេរោគ និងការដោះស្រាយបញ្ហាបំពុលបរិស្ថាន។
ចំណែកអាជ្ញាធរមូលដ្ឋានរបស់វៀតណាម ក៏បានផ្តល់អនុសាសន៍ឱ្យកែសម្រួលពេលវេលាចិញ្ចឹម និង យកគំរូធ្វើកសិកម្មច្រើនដំណាក់កាល ដើម្បីកាត់បន្ថយហានិភ័យ។
អាជ្ញាធរខេត្តទឹកខ្មៅ បានស្នើសុំរដ្ឋាភិបាលមជ្ឈឹមជួយផ្គត់ផ្គង់ក្លរីនចំនួន៥០តោនពីទុនបម្រុងរបស់ជាតិ ដើម្បីសម្អាតស្រះ និងទប់ស្កាត់ការផ្ទុះជំងឺឡើងវិញ៕ (ផាន់ អាណា)
