ដោយ អៀវ ឈៀងនី
ភ្នំពេញ៖ ផ្តើមចេញពីការធ្វើហូបជាលក្ខណៈគ្រួសារ ស្រ្តីខ្មែរមួយរូបបានកែច្នៃផលិតផលជាង ៣០មុខ ចេញពីវត្ថុធាតុដើមក្នុងវិស័យកសិកម្ម ដូចជា ម្ទេស ប៉េងបោះ ស្លឹកគ្រៃ រមៀត ខ្ជាយ ខ្ញី ដែលបានដាំដុះនៅក្នុងស្រុក និងរំដេងពីឃុំអូរសោមជាដើម។
អ្នកស្រី សែម សុជាតា ម្ចាស់សិប្បកម្មនាងរំដេង បានផលិតគ្រឿងទេស និងទឹកជ្រលក់ខ្មែរជាច្រើនមុខ រហូតដល់ជាង៣០មុខ ដោយអ្នកស្រីអះអាងប្រាប់ទូរទស្សន៍ ARDBថា គ្រឿងផ្សំទាំងអស់ អ្នកស្រីបានប្រមូលទិញពីតំបន់នានា ដែលបានដាំដុះនៅក្នុងស្រុក ជាពិសេសរំដេង អ្នកស្រីយកមកពីឃុំអូរសោម ដើម្បីទុកផលិតជាគ្រឿងទេស និងទឹកជ្រលក់ ទឹកម្ទេស ទឹកប៉េងបោះ ព្រមទាំងគ្រឿងទេសខ្មែរជាច្រើនមុខទៀត។
អ្នកស្រីថា អ្នកស្រីឧស្សាហ៍ធ្វើទុកញុំា ព្រោះផ្ទះអ្នកស្រីនៅឆ្ងាយ គឺនៅខេត្ត ជួនណាពីរអាទិត្យ ឬបីអាទិត្យ ទើបឡើងមកម្តង ដូច្នេះអ្នកស្រីធ្វើទុកនៅផ្ទះឱ្យកូន និងស្វាមីញុំា ហើយអ្វីដែលធ្លាប់ធ្វើ អ្នកស្រីតែងតែថ្លឹងគ្រឿងវាល់គ្រឿង និងតែងតែយកសំណាកទុក ដើម្បីដឹងថា ទុកបានរយៈពេលប៉ុន្មាន និងទទួលបានការគាំទ្រពីមិត្តភក្តិផងដែរ។
សិប្បកម្មផលិតផលិតផលខ្មែរ ជាផ្នែកសំខាន់មួយនៃសេដ្ឋកិច្ចក្នុងស្រុក និងការអភិរក្សវប្បធម៌ជាតិ ព្រមទាំងសេដ្ឋកិច្ចគ្រួសារ។ ផលិតផលខ្មែរទាំងអស់នោះមានដូចជា៖ ទឹកប្រឡាក់ ទឹកម្ទេស ទឹកប៉េងបោះ ទឹកត្រី ទឹកស៊ីអ៊ីវ និងអាហារកែច្នៃផ្សេងៗមួយចំនួនទៀត ហើយបច្ចុប្បន្ននេះ ផលិតផលទាំងនោះ ត្រូវបានសិប្បករខ្មែរផលិតឡើង ដោយប្រើវត្ថុធាតុដើមកសិកម្ម ដែលដាំដុះនៅក្នុងស្រុក។
កម្ពុជាកំពុងជំរុញការដាំដុះបន្លែ និងគ្រឿងទេសក្នុងស្រុក ដើម្បីកាត់បន្ថយការនាំចូល។ ផ្ទៃដីដាំដុះគ្រឿងទេសទាំងអស់នេះ មានការកើនឡើងជាលំដាប់ ជាពិសេសតាមរយៈការចងក្រងជាសហគមន៍កសិកម្ម។ ម្ទេស ជាគ្រឿងទេសដែលមានផ្ទៃដីដាំដុះធំជាងគេ ជាពិសេសនៅខេត្តកំពង់ចាម និងត្បូងឃ្មុំ។ ខ្ញី និងរមៀត ក៏មានផ្ទៃដីដាំដុះរាប់រយហិកតាផងដែរ ជាពិសេសនៅតំបន់ដីក្រហម។
អ្នកស្រី សែម សុជាតា បានមានប្រសាសន៍ថា កក្តាដែលជំរុញឱ្យអ្នកស្រីផលិតនូវផលិតផលជាច្រើនមុខនេះឡើងដោយសារការចាប់ផ្តើមដំបូងអ្នកស្រីធ្វើទឹកផាកឡូវ ហើយទឹកផាកឡូវនេះទៀតមិត្តភក្តិចូលចិត្តញុំា “គាត់ចូលចិត្តញុំា គាត់ចេះតែឱ្យខ្ញុំធ្វើទឹកផាកឡូវ ហើយខ្ញុំចេះតែធ្វើទៅ គាត់ថា ទឹកផាកឡូវខ្ញុំឆ្ងាញ់ មិត្តភក្តិផ្សេងៗទៀតចេះតែកុម្ម៉ង់ទឹកផាកឡូវ ម្ទេសឆា គាត់ថាឆ្ងាញ់ ហើយជំរុញឱ្យខ្ញុំធ្វើលក់ទៅ”។
អ្នកស្រីបានមានប្រសាសន៍បន្តទៀតថា “ដោយសារខ្ញុំធ្វើគ្រឿងទាំងអស់ហ្នឹងទៅ ខ្ញុំចេះតែមានគំនិត ធ្វើអីបន្តទៀតទៅ។ ក្រោយមកមិត្តភក្តិខ្ញុំគាត់ឱ្យខ្ញុំធ្វើទឹកម្ទេសឱ្យគាត់ញុំា គាត់ថា ទិញគេពិបាកញុំាណាស់ ឃើញតែគេកូរដាក់ម្សៅ ដាក់ល័ក្ខអញ្ចឹងទៅណា ដាក់ក្លិន ដល់តែខ្ញុំធ្វើឱ្យគាត់ គាត់ថាឆ្ងាញ់ ខ្ញុំក៏ចាប់ផ្តើមធ្វើទឹកម្ទេស ធ្វើហើយខ្ញុំយកសំណាកទុក គឺទុកបានមួយឆ្នាំ មួយឆ្នាំ គឺឆ្ងាញ់តែម្តង ហើយបើលើសពីមួយឆ្នាំវារាងអន់គុណភាពបន្តិច តែក្នុងដឺឡេនេះខ្ញុំដាក់តែ ប្រាំបីខែទេ តែបើធ្វើទុកញុំាខ្លួនឯង ខ្ញុំទុកបានមួយឆ្នាំជាង”។
អ្នកស្រី សែម សុជាតា បានអំពាវនាវសុំឱ្យប្រជាពលរដ្ឋខ្មែរ គាំទ្រផលិតផលខ្មែរ ដើម្បីជំរុញការប្រើប្រាស់ផលិតផលក្នុងស្រុក ជំនួសផលិតផលនាំចូលពីបរទេស ហើយការប្រើប្រាស់ផលិតផលខ្មែរ មិនត្រឹមតែជាការគាំទ្រដល់អ្នកផលិតខ្មែរប៉ុណ្ណោះទេ ប៉ុន្តែបានបង្កើតឱកាសការងារដល់ប្រជាជនកម្ពុជាទៀតផង។
ផលិតផលក្នុងស្រុកជាច្រើន ត្រូវបានបង្កើតឡើងតាមរយៈការផលិត និងកែច្នៃវត្ថុធាតុដើម ដែលមានស្រាប់នៅតាមមូលដ្ឋាន ឱ្យក្លាយជាគ្រឿងឧបភោគបរិភោគជាច្រើនប្រភេទ។ ការច្នៃប្រឌិត ការរក្សាអត្តសញ្ញាណជាតិខ្មែរ និងការកំណត់តម្លៃជាមួយនឹងគុណភាពល្អ តម្លៃសមរម្យ និងបរិមាណគ្រប់គ្រាន់តាមតម្រូវការទីផ្សារ កំពុងក្លាយជាផលិតផល ដែលមានសក្តានុពលខ្ពស់ក្នុងការបំពេញតម្រូវការរបស់ប្រជាពលរដ្ឋ និងទីផ្សារទូទាំងប្រទេស និងបានជំរុញឱ្យប្រជាពលរដ្ឋប្តូរឥរិយាបថ និងបង្កើនទំនុកចិត្តលើផលិតផលខ្មែរកាន់តែខ្លាំងឡើងជាបន្តបន្ទាប់៕
