ក្រុងម៉ាកាសា៖ រដ្ឋមន្ត្រីក្រសួងកសិកម្មឥណ្ឌូណេស៊ី លោក អានឌី អាំរ៉ាន ស៊ូឡៃម៉ាន (Andi Amran Sulaiman) បានថ្លែងថា ប្រទេសចំនួនបីបានស្នើសុំការនាំចូលជីអ៊ុយរ៉េពីប្រទេសឥណ្ឌូណេស៊ី ចំពេលមានការបិទច្រកសមុទ្រហ័រមូស (Hormuz) របស់ប្រទេសអ៊ីរ៉ង់។
លោករដ្ឋមន្ត្រី “យើងនឹងនាំចេញជីអ៊ុយរ៉េ ព្រោះយើងជាអ្នកផលិត ហើយប្រទេសមួយចំនួនបានស្នើសុំទិញជីអ៊ុយរ៉េ”។
ទោះបីជាយ៉ាងណាក៏ដោយ លោករដ្ឋមន្ត្រីមិនបានបង្ហាញពីឈ្មោះប្រទេស ដែលស្នើសុំទិញជីនោះទេ ដោយសារការចរចានៅតែបន្ត ហើយលោកសង្ឃឹមថា កិច្ចព្រមព្រៀងនេះនឹងផ្តល់នូវតម្លៃបន្ថែម និងអត្ថប្រយោជន៍ដ៏ល្អប្រសើរសម្រាប់ប្រទេសឥណ្ឌូណេស៊ី។
លោក អានឌី អាំរ៉ាន ស៊ូឡៃម៉ាន បានមានប្រសាសន៍ដូច្នេះថា “វានៅតែជាការចរចា ដូច្នេះតម្លៃរបស់យើងនឹងល្អប្រសើរជាងនេះបន្តិច។”
លោកបានបន្តឲ្យដឹងថា រដ្ឋាភិបាលក៏បានធានាការផ្គត់ផ្គង់ជីផងដែរ ចាប់តាំងពីដើមឆ្នាំរហូតមក តាមរយៈការទិញវត្ថុធាតុដើម ដើម្បីធានាឲ្យមានជី។ ជំហានយុទ្ធសាស្ត្រនេះ គឺជាផ្នែកមួយនៃគោលនយោបាយចក្ខុវិស័យរបស់ប្រធានាធិបតី ឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាន់តូ (Prabowo Subianto) សម្រាប់ការរក្សាភាពធន់នៃវិស័យកសិកម្ម។
លោកក៏បានសង្កត់ធ្ងន់ផងដែរថា ភាពតានតឹងផ្នែកនយោបាយនៅមជ្ឈិមបូព៌ាមិនបានជះឥទ្ធិពលខ្លាំងដល់តម្លៃស្បៀងអាហារនៅក្នុងប្រទេសឥណ្ឌូណេស៊ីទេ ដោយសារតែការផ្គត់ផ្គង់អង្ករក្នុងស្រុកមានសុវត្ថិភាព។
ស្តុកអង្ករឥណ្ឌូណេស៊ី បានកើនឡើងរហូតដល់៤,៥លានតោន ដែលគ្រប់គ្រាន់សម្រាប់ផ្គត់ផ្គង់តម្រូវការរយៈពេល១១ខែខាងមុខ។
កន្លងមកប្រធានក្រុមហ៊ុន ពូពុក ឥណ្ឌូណេស៊ី (Pupuk Indonesia) លោក រ៉ះម៉ាដ ព្រីបាឌី (Rahmad Pribadi)បានថ្លែងថា ការនាំចេញជីអ៊ុយរ៉េនឹងនៅតែបន្ត បន្ទាប់ពីតម្រូវការក្នុងស្រុកទទួលបានគ្រប់គ្រាន់។
លោកបានថ្លែងដូច្នេះបន្ទាប់ពីកិច្ចប្រជុំការងារជាមួយគណៈកម្មការសភាតំណាងរាស្រ្តឥណ្ឌូណេស៊ី នៅទីក្រុងហ្សាការតា កាលពីថ្ងៃទី២ ខែមេសាថា “អ្វីដែលសំខាន់ គឺឥណ្ឌូណេស៊ីត្រូវមានសុវត្ថិភាពជីជាមុនសិន ទើបយើងអាចនាំជីចេញបាន”។
ក្រោមលក្ខខណ្ឌបច្ចុប្បន្ន ប្រទេសឥណ្ឌូណេស៊ីនៅតែអាចនាំចេញជីអ៊ុយរ៉េ ដើម្បីជួយបំពេញតម្រូវការរបស់ប្រទេសជិតខាង ដែលកំពុងជួបប្រទះឧបសគ្គក្នុងការផ្គត់ផ្គង់ជី។
ការបិទច្រកសមុទ្រ ហ័រមូស ដោយសារសង្គ្រាមក្នុងតំបន់មជ្ឈឹមបូព៌ា បានបណ្តាលឱ្យប្រទេសជាច្រើនជួបប្រទះឧបសគ្គក្នុងការទិញទំនិញមួយចំនួនដូចជាប្រេង និងជី។
លោកប្រធានក្រុមហ៊ុនផលិតជី បានលើកឡើងទៀតថា ទិសដៅនាំចេញជីអ៊ុយរ៉េរបស់ឥណ្ឌូណេស៊ី កន្លងមករួមមាន ប្រទេសអូស្ត្រាលី ឥណ្ឌា និងប្រទេសហ្វីលីពីន។
លោកក៏បានបញ្ជាក់ផងដែរថា សមត្ថភាពផលិតជីអ៊ុយរ៉េរបស់ឥណ្ឌូណេស៊ី បានឈានពីបរិមាណ៨,៨លានតោន អាចឈានដល់បរិមាណ៩,៤លានតោន។
ទោះបីជាតម្លៃអ៊ុយរ៉េនៅលើសកលលោក បានកើនឡើងយ៉ាងខ្លាំងពីប្រហែល៤០០ដុល្លារ ដល់៨០០ដុល្លារ ក្នុងមួយតោនក៏ដោយ ក៏ប្រទេសឥណ្ឌូណេស៊ីនៅតែមានសុវត្ថិភាពដោយសារផលិតកម្មក្នុងស្រុក។
ទាក់ទងនឹងកូតានាំជីចេញវិញ ក្រុមហ៊ុន ពូពុក ឥណ្ឌូណេស៊ី បានឲ្យដឹងថា បរិមាណជីសរុបមានប្រហែល១,៥លានតោន ប៉ុន្តែការចែកចាយនៅតែមានភាពបត់បែន អាស្រ័យលើការផ្គត់ផ្គង់ក្នុងស្រុក៕
