ម៉ានីល៖ ក្រសួងកសិកម្មហ្វីលីពីន នៅថ្ងៃទី១៤ ខែមីនា ឆ្នាំ២០២៦ បានធានាថា វិធានការកាត់បន្ថយផលប៉ះពាល់ ដែលអាចកើតមានករណីអាក្រក់បំផុតនៃការឡើងថ្លៃប្រេងឥន្ធនៈជាបន្តបន្ទាប់ ដោយសារសង្គ្រាមកំពុងបន្តនៅមជ្ឈិមបូព៌ា។
ក្នុងអំឡុងពេលសួរដេញដោលគណៈកម្មាធិការឆ្លើយតប និងត្រួតពិនិត្យសម្រាប់យុទ្ធសាស្ត្រដោះស្រាយវិបត្តិទាន់ពេលវេលា និងមានប្រសិទ្ធភាព រដ្ឋមន្ត្រីក្រសួងកសិកម្ម លោក ហ្វ្រេស៊ីស្កូ ធៀវ ឡូរ៉ែល (Francisco Tiu Laurel) បានមានប្រសាសន៍ថា កិច្ចខិតខំប្រឹងប្រែងកំពុងដំណើរការដើម្បីទប់ស្កាត់ផលប៉ះពាល់ដល់កសិករ អ្នកនេសាទ និងអ្នកប្រើប្រាស់នៅក្នុងប្រទេសហ្វីលីពីន។
លោកបានមានប្រសាសន៍ដូច្នេះថា សន្តិសុខស្បៀងមិនត្រឹមតែជាបញ្ហារបស់កសិកម្មប៉ុណ្ណោះទេ វាគឺជាស្ថិរភាពជាតិ។ ទោះបីជាតម្លៃបច្ចុប្បន្ននៃទំនិញកសិកម្មចាំបាច់មួយចំនួននៅក្នុងកម្រិតមុនជម្លោះក៏ដោយ ក៏ក្រសួងកសិកម្មបានព្យាករពីការកើនឡើងតម្លៃទំនិញ ប្រសិនបើតម្លៃប្រេងឆៅពិភពលោកឡើងដល់២០០ ដុល្លារក្នុងមួយធុងបារ៉ែល ហើយភាពតានតឹងនៅតែបន្តរហូតដល់១៨០ថ្ងៃទៀត។
លោក ហ្វ្រេស៊ីស្កូ ធៀវ ឡូរ៉ែល បានបន្ថែមថា ទីភ្នាក់ងារក្រសួងកសិកម្មហ្វីលីពីនមានវិធានចំនួនប្រាំមួយជំហាន ដើម្បីដោះស្រាយការកើនឡើងនៃថ្លៃប្រេងឥន្ធនៈ ជី ការដឹកជញ្ជូន និងថ្លៃភស្តុភារកម្មជាដើម។
លោកបានមានប្រសាសន៍ថា ការឆ្លើយតបរបស់យើងមានអាទិភាពចំនួនប្រាំមួយ។ ទីមួយ ពង្រឹងផលិតកម្មក្នុងស្រុកដោយគាំទ្រដល់ដំណាំសំខាន់ៗ ចែកចាយគ្រាប់ពូជដែល្អ និងធន់នឹងអាកាសធាតុ និងកែលម្អសេវាកម្មពង្រីក។ ទីពីរ កាត់បន្ថយការចំណាយលើធាតុចូល ដោយការឧបត្ថម្ភធនប្រេងឥន្ធនៈ ការប្រើប្រាស់ជីជីវៈ ជីសរីរាង្គ និងធ្វើពិពិធកម្មប្រភពជី។
ទាក់ទងនឹងភស្តុភារកម្ម ក្រសួងកសិកម្មហ្វីលីពីន បានលើកឡើងពីការវិនិយោគលើកន្លែងខ្សែសង្វាក់ត្រជាក់ ផ្លូវតភ្ជាប់ពីកសិដ្ឋានទៅទីផ្សារ និងតម្រូវការកំពង់ផែ និងក្រុមដឹកជញ្ជូន។ ក្រសួងក៏កំពុងសម្លឹងមើលការធ្វើពិពិធកម្មធាតុចូលកសិដ្ឋាន និងប្រភពស្បៀងអាហាររបស់ខ្លួនផងដែរ។
លោករដ្ឋមន្ត្រីក្រសួងកសិកម្ម បានមានប្រសាសន៍ថា សុវត្ថិភាព ការពារអ្នកប្រើប្រាស់ដោយការត្រួតពិនិត្យតម្លៃ ជំនួយស្បៀងអាហារចំគោលដៅ ការបញ្ចេញស្តុកបម្រុងជាយុទ្ធសាស្ត្រ និងដាក់កម្រិតតម្លៃនៅពេលចាំបាច់។
ចំណែកសម្រាប់យុទ្ធសាស្ត្ររយៈពេលវែង ក្រសួងកសិកម្មបាននិយាយថា ប្រទេសហ្វីលីពីននឹងជំរុញភាពធន់នៃវិស័យកសិកម្ម តាមរយៈការបង្រួបបង្រួមកសិដ្ឋាន ឌីជីថលភាវូបនីយកម្ម និងការសម្របខ្លួនទៅនឹងអាកាសធាតុ។
យោងតាមការព្យាករណ៍ “ករណីធ្ងន់ធ្ងរ” របស់ក្រសួងកសិកម្ម ផលិតកម្មស្រូវប្រាំងក្នុងស្រុកចំនួន១៩,៨៧លានតោន អាចនឹងធ្លាក់ចុះបន្តិច ដោយសារតម្លៃជីខ្ពស់។ សម្រាប់ឆមាសទី១ ឆ្នាំ២០២៦ ទិន្នផលស្រូវក្នុងស្រុកអាចនឹងធ្លាក់ចុះចំនួន១១ ៨៦៨តោន ហើយសម្រាប់ឆមាសទី២ អាចនឹងធ្លាក់ចុះមកនៅត្រឹម១១២ ៥២២តោន។
សម្រាប់តម្លៃលក់រាយ អង្ករអាចឡើងថ្លៃ៤៩ភាគរយ ដោយឡើងដល់១,១២ដុល្លារ ក្នុងមួយគីឡូក្រាម គឺឡើងពីតម្លៃ០,៧៥ដុល្លារ ក្នុងមួយគីឡូក្រាម។
ទោះជាយ៉ាងនេះក្តី លោកបានធានាថា តម្លៃអាចត្រូវបានធានាដោយការគាំទ្រគ្រប់គ្រាន់សម្រាប់អ្នកផលិតស្បៀងអាហារក្នុងស្រុក និងភាពបត់បែនក្នុងការធ្វើពិពិធកម្មប្រភពធាតុចូលកសិកម្ម និងទំនិញសម្រាប់សុខុមាលភាពរបស់កសិករ និងអ្នកប្រើប្រាស់។
តាមការព្យាករណ៍ករណីអាក្រក់បំផុត ក៏បានបង្ហាញផងដែរថា តម្លៃសាច់មាន់អាចកើនឡើងដល់៥,៤ដុល្លារ ក្នុងមួយគីឡូក្រាម គឺឡើងពី៣,៣៤ដុល្លារ ក្នុងមួយគីឡូក្រាម ចំណែកសាច់ជ្រូកនឹងឡើងដល់៩,៨១ដុល្លារ ក្នុងមួយគីឡូក្រាម។
លោករដ្ឋមន្ត្រីក្រសួងកសិកម្ម បានបញ្ជាក់ថា ឧស្សាហកម្មបសុបក្សីក្នុងស្រុកមានការផលិតលើសតម្រូវការបន្តិច ដែលនឹងជួយសម្រួលដល់តម្លៃមិនឱ្យឡើង។ សម្រាប់ស្តុកសាច់ជ្រូក មានបរិមាណគ្រប់គ្រាន់ ប៉ុន្តែតម្លៃអាចរងផលប៉ះពាល់ដោយអត្រាប្តូរប្រាក់ និងថ្លៃដឹកជញ្ជូន។
លោកបានអះអាងថា ទីភ្នាក់ងារត្រូវតែមានសមត្ថភាពក្នុងការធ្វើឱ្យមានតុល្យភាព ទាំងការគាំទ្រដល់កសិករក្នុងស្រុក និងអ្នកប្រើប្រាស់ តាមរយៈការធ្វើពិពិធកម្មប្រភពនាំចូល និងការបញ្ចុះពន្ធប្រសិនបើចាំបាច់៕
