សិង្ហបុរី៖ ទីភ្នាក់ងារសុវត្ថិភាពចំណីអាហារ និងទីភ្នាក់ងារទប់ស្កាត់ជំងឺឆ្លងរបស់ប្រទេសសិង្ហបុរី បានប្រកាសកាលពីថ្ងៃទី១៨ ខែមីនា ឆ្នាំ២០២៦ថា ខ្លួនបានរកឃើញម៉ាកម្សៅទឹកដោះគោពីរឡូដិ៍មានផ្ទុកសារធាតុពុល សេរឺលីដ (Cereulide )ហើយត្រូវបានប្រមូលយកមកវិញ ដោយមិនបណ្តោយឱ្យលក់ចែកចាយឡើយ។
បើតាមការចុះផ្សាយរបស់សារព័ត៌មាន Channel News Asia ជាតិពុលនេះអាចបង្កឱ្យមានអាការៈចង់ក្អួត និងចង្អោរ។ វាត្រូវបានគេរកឃើញនៅក្នុងម្សៅទឹកដោះគោ ម៉ាក Nestle NAN HA2 សម្រាប់ទារក និងម្សៅទឹកដោះគោ Nature One Dairy Premium Toddler សម្រាប់កុមារអាយុលើសពីមួយឆ្នាំ។
ម្សៅទឹកដោះគោម៉ាក់ Nestle នឹងផុតសុពលភាពប្រើប្រាស់នៅថ្ងៃទី៣១ ខែតុលា ឆ្នាំ២០២៧ រីឯម្សៅទឹកដោះគោ Nature One Dairy កាលបរិច្ឆេទផុតកំណត់នៅថ្ងៃទី១០ ឬថ្ងៃទី១១ ខែវិច្ឆិកា ឆ្នាំ២០២៧។
ចាប់តាំងពីថ្ងៃទី៨ ខែមករា ឆ្នាំ២០២៦ ផលិតផលម្សៅទឹកដោះគោ ដែលត្រូវបានប្រមូលមកវិញដោយសាររកឃើញជាតិពុល រួមមានផលិតផលម៉ាក Nestle NAN, Nature One Dairy និង Dumex Dulac។
ចាប់តាំងពីការធ្វើបច្ចុប្បន្នភាពចុងក្រោយ កាលពីថ្ងៃទី៣០ ខែមករា ឆ្នាំ២០២៦ ទីភ្នាក់ងារសុវត្ថិភាពចំណីអាហារ និងទីភ្នាក់ងារទប់ស្កាត់ជំងឺឆ្លងរបស់ប្រទេសសិង្ហបុរី បានបន្ថែមថា មិនទាន់មានករណីថ្មីនៃមនុស្ស ដែលមានរោគសញ្ញាស្រាលៗដោយសារប៉ះពាល់សារធាតុពុល សេរឺលីដ បន្ទាប់ពីបានប្រើប្រាស់ផលិតផលទាំងនេះ។
អាជ្ញាធរបានបញ្ជាក់ថា នាពេលបច្ចុប្បន្ននេះ មិនទាន់មានការធ្វើតេស្តមន្ទីរពិសោធន៍វេជ្ជសាស្ត្រច្បាស់លាស់ណាមួយដើម្បីបញ្ជាក់ពីការពុលសារធាតុ សេរឺលីដ នៅឡើយទេ។
ភ្នាក់ងារសុវត្ថិភាពចំណីអាហារ និងទីភ្នាក់ងារទប់ស្កាត់ជំងឺឆ្លងរបស់ប្រទេសសិង្ហបុរី បាននិយាយថា អ្នកបានទិញផលិតផលមានជាតិពុលមិនគួរឲ្យកូនៗរបស់ពួកគេញ៉ាំវាទេ ហើយអ្នកមានកូនៗបានប្រើប្រាស់ផលិតផលទាំងនោះ ហើយមិនស្រួលខ្លួនគួរតែជួបពិភាក្សាជាមួយគ្រូពេទ្យជាបន្ទាន់។ ពួកគេបានបន្ថែមថា អ្នកប្រើប្រាស់អាចទាក់ទងកន្លែងទិញរបស់ពួកគេ ដើម្បីសាកសួរអំពីផលិតផលទាំងនោះ។
អាជ្ញាធរសិង្ហបុរី បាននិយាយថា ផលិតផលទឹកដោះគោសម្រាប់ទារក ដែលនាំចូលប្រមាណប្រាំភាគរយនៃការផ្គត់ផ្គង់នាំចូលរបស់ប្រទេសសិង្ហបុរី។ ចំពោះផលិតផលទឹកដោះគោម្សៅ ដែលពាក់ព័ន្ធសម្រាប់កុមារអាយុលើសពីមួយឆ្នាំ ពួកវាតំណាងឱ្យចំណែកតិចតួចនៃការផ្គត់ផ្គង់ទីផ្សារទាំងមូល ដោយមានជម្រើសជំនួសជាច្រើនអាចរកបានយ៉ាងងាយស្រួល៕
