ហ្សាការតា៖ ក្រសួងកសិកម្មឥណ្ឌូណេស៊ី កំពុងស្វែងរកការវិនិយោគ ដើម្បីអភិវឌ្ឍកសិដ្ឋានចិញ្ចឹមគោខ្នាតធំ នៅខេត្តកាលីម៉ាន់តាន់ភាគកណ្តាល (Kalimantan) ដោយកំណត់គោលដៅបង្កើនសត្វគោរហូតដល់២០០ ០០០ក្បាល ដែលជាផ្នែកមួយនៃប្រព័ន្ធអេកូឡូស៊ីអាជីវកម្មរួមបញ្ចូលគ្នា ដើម្បីធានាបាននូវការផ្គត់ផ្គង់សាច់គោនៅក្នុងប្រទេស។
រដ្ឋមន្ត្រីក្រសួងកសិកម្ម ឥណ្ឌូណេស៊ី លោក អានឌី អាំរ៉ាន់ ស៊ូឡៃម៉ាន (Andi Amran Sulaiman) បាននិយាយនៅក្នុងសេចក្តីថ្លែងការណ៍មួយកាលពីសប្តាហ៍មុនថា ផែនការនេះ គាំទ្រដល់ការជំរុញរបស់ប្រទេសឥណ្ឌូណេស៊ី ក្នុងការទទួលបានភាពគ្រប់គ្រាន់ខាងសាច់ និងទឹកដោះគោ ខណៈពេលកំពុងសាងសង់មជ្ឈមណ្ឌលផលិតកម្មបសុសត្វដ៏ទំនើប ដែលពឹងផ្អែកទាំងស្រុកលើភាពជាដៃគូវិនិយោគ។
គម្រោងនេះនឹងបង្កើតនៅខេត្តកាលីម៉ាន់តាន់ ដែលកសិដ្ឋានចិញ្ចឹមគោចម្រុះ នឹងត្រូវបានអភិវឌ្ឍលើផ្ទៃដីប្រហែល៤០ ០០៦ហិកតា។ ចំនួនគោក្នុងស្តុកដំបូងនឹងចាប់ផ្តើមប្រហែល១ ០០០ក្បាល ដោយពង្រីកបន្តិចម្តងៗតាមគ្រោងទុក។
លោករដ្ឋមន្ត្រីក្រសួងកសិកម្ម បានមានប្រសាសន៍ថា គម្រោងនេះអនុវត្តតាមគំរូឧស្សាហកម្មចិញ្ចឹមគោរួមបញ្ចូលគ្នា ដែលរួមមានគោយកសាច់ គោះយកទឹកដោះ និងឧស្សាហកម្មកែច្នៃឡើងវិញ ក្នុងតំបន់ផលិតកម្មតែមួយ។
គំរូនេះ ក៏បានរួមបញ្ចូលការចិញ្ចឹមគោនៅតាមចម្ការដូងប្រេង ដោយលែងគោឱ្យដើរស៊ីស្មៅនៅក្នុងចម្ការ ដើម្បីកាត់បន្ថយបញ្ហាខ្វះខាតចំណី ព្រមទាំងបង្កើតឱ្យមានជីសរីរាង្គ និងបង្កើននិរន្តរភាពផងដែរ។
ការអភិវឌ្ឍនឹងពឹងផ្អែកលើប្រព័ន្ធស៊ីស្មៅបែបទំនើប គាំទ្រដោយការស្រាវជ្រាវលើពូជស្មៅ ដែលសមស្របនឹងស្ថានភាពដី រួមទាំងកន្លែងកែច្នៃសាច់ និងផលិតផលទឹកដោះគោ និងហេដ្ឋារចនាសម្ព័ន្ធគាំទ្រ ដើម្បីធានាបាននូវប្រតិបត្តិការប្រកបដោយប្រសិទ្ធភាព។
រដ្ឋមន្ត្រីក្រសួងកសិកម្ម ឥណ្ឌូណេស៊ី លោក អានឌី អាំរ៉ាន់ ស៊ូឡៃម៉ាន បានមានប្រសាសន៍ថា ធនធានធម្មជាតិដ៏សម្បូរបែបរបស់ប្រទេសឥណ្ឌូណេស៊ី ទាមទារឱ្យមានវិធីសាស្រ្តឯករាជ្យ និងប្រកបដោយនិរន្តរភាពបន្ថែមទៀត ដើម្បីអភិវឌ្ឍបសុសត្វ ជាពិសេស ដើម្បីកាត់បន្ថយការពឹងផ្អែកលើការនាំចូល។
លោកបានសង្កត់ធ្ងន់ថា ការរីកចម្រើនជឿនលឿន គឺអាស្រ័យលើបទប្បញ្ញត្តិមិនសូវតឹងតែង និងភាពប្រាកដប្រជាផ្នែកច្បាប់ ដោយលោកបន្ថែមថា រដ្ឋាភិបាលប្តេជ្ញាបង្កើតបរិយាកាសវិនិយោគ ដែលអនុញ្ញាតឱ្យធ្វើអាជីវកម្មផ្តោតលើការផលិត និងការកែច្នៃចែកចាយ។
លោករដ្ឋមន្ត្រី បានអំពាវនាវឱ្យមានការបណ្តាក់ទុនលើការចិញ្ចឹមគោរួមគ្នាជាទ្រង់ទ្រាយធំ ដែលអាចបង្កើនចំនួនសត្វគោជាតិយ៉ាងខ្លាំងតាមរយៈកិច្ចសហប្រតិបត្តិការជិតស្និទ្ធរវាងរដ្ឋាភិបាល និងវិនិយោគិនឯកជន។
លោកបានមានប្រសាសន៍ថា ប្រសិនបើវិនិយោគិនទទួលផលចំណេញ ពួកគេនឹងវិនិយោគបន្ថែមទៀត។ បើមិនដូច្នេះទេ ពួកគេអាចនឹងឈានជើងទៅមុខពីរជំហាន ថយក្រោយពីរជំហានវិញ ហើយក្នុងរយៈ១០ឆ្នាំទៀតហួសពេលអស់តែម្តង។ ដូច្នេះយើងត្រូវតែដោះស្រាយបញ្ហានេះឱ្យបាន។
ដើម្បីផ្សព្វផ្សាយអំពីអត្ថប្រយោជន៍សេដ្ឋកិច្ច រដ្ឋាភិបាលបានរៀបចំគម្រោងភាពជាដៃគូស្នូល ខ័រ-ប្លាស្មា (core-plasma) ដែលក្រុមហ៊ុនធំៗដើរតួជាប្រតិបត្តិករស្នូល ខណៈពេលកសិករខ្នាតតូចចូលរួមជាដៃគូ។
ការគាំទ្រហិរញ្ញប្បទាន តាមរយៈកម្ចីឥណទានពាណិជ្ជកម្មរបស់ប្រជាជន និងការធានារ៉ាប់រង ក៏នឹងត្រូវបានផ្តល់ផងដែរ ដើម្បីកាត់បន្ថយហានិភ័យ និងធានាបាននូវនិរន្តរភាព ដោយគម្រោងនេះ គេរំពឹងថា នឹងជំរុញការចិញ្ចឹមសត្វ បង្កើតការងារ និងជំរុញកំណើនសេដ្ឋកិច្ចក្នុងតំបន់ថែមទៀត៕
