ភ្នំពេញ៖ លោកឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជាឲ្យដឹងនៅល្ងាចថ្ងៃទី១១ ខែកុម្ភៈ ឆ្នាំ២០២៦នេះថា ក្នុងរយៈពេលមួយខែ ដើមឆ្នាំ២០២៦ កម្ពុជានាំចេញអង្ករទៅកាន់ទីផ្សារអន្តរជាតិបានចំនួន ១១៥ ៧៨៤តោន មានកំណើន៤៨ភាគរយ បើធៀបនិងរយៈពេលដូចគ្នា កាលពីឆ្នាំ២០២៥។
លោកឧកញ៉ាបានមានប្រសាសន៍បញ្ជាក់ថា តាមពិតនៅដើមឆ្នាំ២០២៦នេះ ស្ថានភាពនៃការនាំចេញអង្កររបស់កម្ពុជាមានសន្ទុះកើនឡើង បូករួមនិងចុងអង្ករផង បើធៀបនិងឆ្នាំមុន គឺកម្ពុជានាំចេញបានចំនួន៥៩ ០០០តោន ។
ក្នុងនាមសហព័ន្ធស្រូវអង្ករកម្ពុជា លោកឧកញ៉ា ឡាយ ឈុនហួរ បានអំពាវនាវដល់កសិករទាំងអស់ ត្រូវនាំគ្នាដាំពូជស្រូវផ្ការំដួលចាប់ពីខែ៥ និងខែ៦ ខាងមុខនេះ និងពូជសែនក្រអូប សម្រាប់តម្រូវការទីផ្សារថ្មីមានដូចជា សហរដ្ឋអាម៉េរិក និងចិនជាដើម។ ពូជស្រូវទាំងនេះ បើធៀបនិងពូជស្រូវ OM មានទីផ្សារល្អជាង ប៉ុន្តែចំពោះពូជស្រូវស្រងែវិញ គឺជាជម្រើសដ៏ល្អសម្រាប់កសិករផងដែរ។
យោងតាមរបាយការណ៍ពីសហព័ន្ធស្រូវអង្ករកម្ពុជា បានបង្ហាញថា ការនាំចេញអង្ករ កឺតាមរយៈក្រុមហ៊ុននាំចេញអង្ករចំនួន៥០ក្រុមហ៊ុន ដោយនាំទៅកាន់គោលដៅចំនួន៤៥។ ក្នុងនេះការនាំចេញមានទៅកាន់បណ្តាប្រទេសនៅក្នុងតំបន់អឺរ៉ុបចំនួន ១៤ បានបរិមាណអង្ករចំនួន៣៨ ១៥៦តោន គិតជាទឹកប្រាក់ចំនួន២៦,៥៣លានដុល្លារ ចំណែកនាំចេញទៅកាន់ប្រទេសចិន និងហុងកុង បានចំនួន២៥ ៤១៦តោន គិតជាទឹកប្រាក់ចំនួន១៦,៧៥លានដុល្លារ។
ការនាំចេញទៅកាន់ប្រទេសក្នុងអាស៊ាន ចំនួនប្រាំប្រទេសបានបរិមាណចំនួន៤២ ០៩៧តោន គិតជាទឹកប្រាក់ចំនួន ១៨,៧៨លានដុល្លារ និងទៅកាន់គោលដៅ ១៤ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាម៉េរិក កាណាដា អូស្ត្រាលី និងញ៉ូហ្សេឡេន បានចំនួន ១០ ១១៥តោន គិតជាទឹកប្រាក់ចំនួន៨,៨៧លានដុល្លារ។
ចំពោះប្រភេទអង្ករ ដែលបាននាំចេញមាន អង្ករក្រអូបមាន៦៦,៣១ភាគរយ ប្រភេទអង្ករសគ្រាប់វែង០,១១ភាគរយ អង្ករចំហុយ ១,៥៥ភាគរយ អង្ករសរីរាង្គចំនួន០,៨៥ភាគរយ អង្ករបាក់គ្រប់ប្រភេទ មាន២៥,៩៤ភាគរយ និងអង្ករផ្សេងៗទៀត ចំនួន៥,២៤ភាគរយ។
ប្រទេសកម្ពុជាក៏បាននាំចេញស្រូវសើមចំនួន៣២២ ៤៨៨តោន ដែលគិតជាទឹកប្រាក់ប្រមាណចំនួន ៧២,៥៦លានដុល្លារ៕
