ដោយ នៅ ស៊ីវុត្ថា
ភ្នំពេញ៖ ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទបានជួយសម្របសម្រួលជាមួយភាគីវៀតណាមរួចរាល់ហើយ ដើម្បីឱ្យមានការនាំចូលដំឡូងមីtតាមរដ្ឋថយន្តប្រមាណ៧០០គ្រឿង បន្ទាប់ពីមានការកកស្ទះយ៉ាងខ្លាំងនៅច្រកព្រំដែន កាលពីចុងខែមករា ឆ្នាំ២០២៦។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានប្រាប់ទូរទស្សន៍អនឡាញ ARDB នៅថ្ងៃទី២ ខែកុម្ភៈ ឆ្នាំ២០២៦ថា ក្រោយពេលទទួលបានព័ត៌មានពីករណីកកស្ទះរថយន្តដឹកដំឡូងមី នៅច្រកទ្វារព្រំដែនអន្តរជាតិ ម៉ឺនជ័យ ក្នុងខេត្តព្រៃវែង ខាងកម្ពុជា និងច្រកតឹនណាមខេត្តតៃនិញ ខាងវៀតណាម ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ បានចាត់មន្ត្រីជំនាញចុះទៅដល់ទីតាំង និងសម្របសម្រួលជាមួយនឹងភាគីវៀតណាមឱ្យមានការនាំចេញភ្លាមៗជាបណ្តោះអាសន្នដោយមិនឱ្យបង្អង់យូរនោះទេ។
ឯកឧតុ្តមបានបន្តថា ទាក់ទងនឹងបញ្ហាកកស្ទះចរាចរណ៍រថយន្តដឹកដំឡូងមីនេះ មិនពាក់ព័ន្ធនឹងការចេញវិញ្ញាបនបត្របញ្ជាក់ប្រភពដើមមុខទំនិញ ពីក្រសួងពាណិជ្ជកម្ម និងវិញ្ញាបនបត្រអនាម័យ និងភូតគាមអនាម័យ ពីក្រសួងកសិកម្ម រុក្ខាប្រមាញ់ និងនេសាទនោះទេ ។
លើសពីនេះ ឯកឧត្តមអ្នកនាំពាក្យបានបន្ថែមថា បញ្ហាសំខាន់ គឺខាងភាគីវៀតណាមបានរិតបន្តឹងលើ “សុវត្ថិភាពចំណីអាហារ” បន្ទាប់ពីមានការលេចឡើងនូវជំងឺផ្លូវដង្ហើមនីប៉ាហ៍ ដែលកំពុងរីករាលដាលនៅក្នុងតំបន់អាស៊ី។ ក្រោយពីមានការសម្របសម្រួល ភាគីវៀតណាម បានសម្រេចអនុញ្ញាតឱ្យដឹកចូលទៅក្នុងប្រទេសរបស់ខ្លួន ស្របតាមអនុស្សារណៈយោគយល់គ្នារវាងសហព័ន្ធដំឡូងមីកម្ពុជា និងសមាគមដំឡូងមីវៀតណាម ដែលបានទទួលទិញដំឡូងមីពីប្រទេសកម្ពុជាប្រមាណពី៩លាន ទៅ១០លានតោន ក្នុងមួយឆ្នាំ សម្រាប់រយៈពេលប្រាំឆ្នាំ។
ទាក់ទិននឹងបញ្ហានេះ លោក អិល ឈិញ ប្រធានសមគមកសិករដំឡូងមីខ្មែរ ប្រាប់ទូរទស្សន៍ ARDB ដោយបានទទួលស្គាល់ដែរថា តាមរយៈការសម្របសម្រួលរបស់ក្រសួងទាំងពីរខាងលើនេះ ភាគីវៀតណាមក៏បានអនុញ្ញាតឱ្យដឹកចូលទៅកាន់ប្រទេសខ្លួនវិញ បន្ទាប់មកបានតម្រូវឱ្យធ្វើលិខិតបញ្ជាក់ជាមួយមន្ត្រីជំនាញកម្ពុជា ដែលកំពុងសម្របសម្រួលនៅកន្លែងច្រកព្រំដែននេះតែម្តង ។
បើតាមលោក អិល ឈិញ, នៅក្នុងមួយឆ្នាំៗកម្ពុជាបាននាំដំឡូងមីស្រស់ចេញទៅកាន់ប្រទេសវៀតណាមប្រមាណពី៧ទៅ ៨លានតោន ដែលទទួលបានតម្លៃប្រមាណពី៤ ០០ ទៅ៥០០រៀលក្នុងមួយគីឡូ ។ ប៉ុន្តែសម្រាប់តម្លៃដំឡូងមី ដែលឈ្មួញទិញនៅក្នុងស្រុក ដូចជានៅខេត្តកំពង់ចាម និងខេត្តស្ទឹងត្រែង មានតម្លៃ តម្លៃ៣០០រៀល និងនៅខេត្តឧត្តរមានជ័យ និងព្រះវិហារមានតម្លៃប្រមាណតែជាង១០០រៀលប៉ុណ្ណោះ។
យោងតាមសារព័ត៌មានវៀតណាមបានចុះផ្សាយថា រដ្ឋាភិបាលវៀតណាម នៅថ្ងៃទី២៦ ខែមករា ឆ្នាំ២០២៦ បានចេញបទប្បញ្ញត្តិ និងវិធានការមួយចំនួនសម្រាប់ការរៀបចំ និងណែនាំការអនុវត្តច្បាប់សុវត្ថិភាពចំណីអាហារ ចូលទៅក្នុងប្រទេសវៀតណាម ។
មាត្រា២១ និងឧបសម្ព័ន្ធទី៣ នៃបទបញ្ញ្ញតិនេះ បានចែងថា បន្លែ និងផ្លែឈើស្រស់ៗ ត្រូវឆ្លងកាត់ការត្រួតពិនិត្យសុវត្ថិភាពចំណីអាហារ ហើយត្រូវបានត្រួតពិនិត្យដោយប្រើវិធីសាស្ត្រស្តង់ដារ រួមមាន៖ ការពិនិត្យឯកសារ ការត្រួតពិនិត្យរូបវន្តនៃទំនិញ និងការយកគំរូសម្រាប់ធ្វើតេស្តសូចនាករគុណភាព និងសុវត្ថិភាពចំណីអាហារ ជាមួយនឹងពេលវេលារង់ចាំលទ្ធផលចាប់ពី៧ ទៅ១៥ថ្ងៃ អាស្រ័យលើសូចនាករ។
ទោះជាយ៉ាងណា បើយោងតាមគណៈកម្មាធិការប្រជាជនខេត្តតៃនិញរបស់វៀតណាម ការធ្វើបែបនេះមិនសមរម្យសម្រាប់ផលិតផលកសិកម្មស្រស់ៗ ដូចជា ដំឡូងមី អង្ករ អំពៅ និងផ្លែឈើស្រស់នោះទេ ព្រោះវានឹងត្រូវខូចក្នុងពេលរង់ចាំលទ្ធផលតេស្ត៕
