ដោយ ឡុង សារេត
រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) នៅព្រឹកថ្ងៃទី២៧ ខែវិច្ឆិកា ឆ្នាំ២០២៥ ឯកឧត្តម បាន លឹម អគ្គនាយករងធនាគារ ARDB បានដឹកនាំគណៈប្រតិភូធនាគារអភិវឌ្ឍន៍កសិកម្មប្រទេសចិន (ADBC) ទៅស្សនកិច្ចស្វែងយល់នៅកសិដ្ឋានប្រសិទ្ធមានទីតាំងស្ថិតនៅភូមិតាគោក ឃុំឃ្លាំង ស្រុកពញាឮ ខេត្តកណ្តាល និងក្រុមហ៊ុនព្រីម្លិះ កែច្នៃអង្ករនាំចេញមានទីតាំងក្នុងខេត្តកំពង់ស្ពឺ។
នៅក្នុងដំណើរទស្សនកិច្ចរបស់គណៈប្រតិភូធនាគារអភិវឌ្ឍន៍កសិកម្មប្រទេសចិន ទទួលបានស្វាគមន៍ពីលោកស្រី កៅ លីនដា ម្ចាស់កសិដ្ឋានប្រសិទ្ធប្រកបដោយភាពរុះរាយរាក់ទាក់ផងដែរ។
ក្នុងឱកាសនោះ លោកស្រី កៅ លីនដា ក៏បានចែករំលែកនូវព័ត៌មានអំពីកសិដ្ឋានមួយចំនួនតាមរយៈការធ្វើបទបង្ហាញដូចជាចំនួនផ្ទះសំណាញ់បច្ចុប្បន្ន, បច្ចេកទេសសាងសង់ផ្ទះសំណាញ់ឱ្យមានភាពងាយស្រួលក្នុងការផ្គត់ផ្គង់ធាតុចូល, ការជ្រើសរើសប្រភេទពូជបន្លែដាំនៅក្នុងផ្ទះសំណាញ់ ដើម្បីឆ្លើយតបតាមតម្រូវការក្នុងស្រុក និងចំនួនកម្លាំងពលកម្មដែលបាននិងកំពុងមានសកម្មភាពនាពេលបច្ចុប្បន្ន។
លោកស្រីបង្ហាញថា ជាទូទៅការផ្គត់ផ្គង់បន្លែរបស់កសិដ្ឋានទៅលើទីផ្សារប្រចាំថ្ងៃបានចន្លោះពី៥០០គីឡូក្រាមដល់១០០០គីឡូក្រាម ហើយការផ្គត់ផ្គង់បន្លែ គឺផ្តោតលើស្តង់ដារអនុវត្តកសិកម្មល្អ (Good Agriculture Practice) តាមការណែនាំរបស់ក្រសួងកសិកម្ម រុក្ខាប្រមាញ់ និងនេសាទ។
លោកស្រីបានសម្តែងនូវការអរគុណដល់គណៈប្រតិភូធនាគារអភិវឌ្ឍន៍កសិកម្មប្រទេសចិន ដែលបានចូលមកទស្សនកិច្ចនៅទីនេះ បានផ្តល់ឱកាសឱ្យលោកស្រីបង្ហាញពីផលិតផលក្នុងស្រុក ជាពិសេសផលិតផលខ្មែរធ្វើដោយដៃខ្លួនឯង តាមរយៈការប្រើប្រាស់បច្ចេកទេសដាំដុះបែបបុរាណ រួមផ្សំជាបច្ចេកទេសបែបទំនើប ដើម្បីចូលរួមលើកស្ទួយវិស័យកសិកម្មឱ្យមានការរីកចម្រើនពីមួយឆ្នាំទៅមួយឆ្នាំ។ ម្យ៉ាងទៀតចង់បង្ហាញទៅដល់កសិករក្នុងស្រុកបានស្វែងយល់បន្ថែមអំពីការដាំបន្លែនៅលើទីវាលកាលពីមុន តែបច្ចុប្បន្នបានផ្តោតលើការដាំបន្លែនៅក្នុងផ្ទះសំណាញជាគោល។
លោកស្រីលើកឡើងថា ការដាំបន្លែនៅលើទីវាល និងការដាំបន្លែនៅក្នុងផ្ទះសំណាញ់សព្វថ្ងៃ វាខុសប្លែកពីគ្នាបែបណា? ការដាំបន្លែនៅក្នុងផ្ទះសំណាញ់ខុសគ្នាត្រង់ថា ការប្រើប្រាស់ធាតុចូលមួយចំនួនត្រូវកាត់បន្ថយបានច្រើន ហើយបន្លែមានសុវត្ថិភាពខ្ពស់សម្រាប់អ្នកប្រើប្រាស់ចុងក្រោយផ្ទាល់។ លើសពីនេះការដាំបន្លែនៅក្នុងផ្ទះសំណាញ់ក្នុងមួយឆ្នាំមាន១២ អាចផលិតបន្លែបានទៀងទាត់ជាជាងការដាំបន្លែនៅក្រៅផ្ទះសំណាញ់។
ក្នុងឱកាសនេះផងដែរ ឯកឧត្តម បាន លឹម អគ្គនាយករងធនាគារ ARDBមានប្រសាសន៍លើកឡើងថា «ការដាំបន្លែនៅក្នុងផ្ទះសំណាញ់បច្ចុប្បន្ន យើងចង់បង្ហាញការធ្វើកសិកម្មគំរូបែបនេះជូនដល់ប្រជាកសិកររបស់យើង ក្នុងការផលិតបន្លែ ដែលមានគុណភាពសម្រាប់ទីផ្សារក្នុងស្រុក។ ដូច្នេះនេះ គឺជាបេសកម្មចម្បងរបស់ធនាគារអភិវឌ្ឍន៍ជនបទ និងកសិកម្ម ដែលផ្តល់ឥណទានជូនដល់កសិករក្នុងការរៀបចំដាំបន្លែសុវត្ថិភាពក្នុងផ្ទះសំណាញ់ ជាជាងយកទៅដាំនៅខាងក្រៅ ដែលពឹងផ្អែកទៅលើអាកាសធាតុ»។
ឯកឧត្តមមានប្រសាសន៍គូសបញ្ជាក់ទៀតថា «ធនាគារ ARDB បាននិងកំពុងខិតខំក្នុងការពង្រីកការដាំដុះបន្លែប្រភេទនេះទៅតាមបណ្តាខេត្តមួយចំនួនផ្សេងទៀត ដើម្បីផ្គត់ផ្គង់ទៅទីផ្សារក្នុងស្រុក ដែលកំពុងមានតម្រូវការ ហើយការចូលរួមចំណែកមួយទៀត គឺការបង្កើតការងារ ដោយយើងឃើញថា កសិដ្ឋានដាំបន្លែនីមូយៗមានតម្រូវការកម្លាំងពលកម្មច្រើន ហើយពលកម្មទាំងនោះ គឺធ្វើពេញមួយឆ្នាំ វាខុសពីកម្លាំងពលកម្ម ដែលយើងធ្វើនៅខាងក្រៅ វាទៅតាមរដូវកាល»។
នៅក្នុងថ្ងៃដដែលនេះដែរ ឯកឧត្តម បាន លឹម អគ្គនាយករងធនាគារ អភិវឌ្ឍន៍ជនបទ និងកសិកម្ម បានបន្តដឹកនាំគណៈប្រតិភូធនាគារអភិវឌ្ឍន៍កសិកម្មប្រទេសចិន (ADBC)ទៅទស្សនកិច្ចស្វែងយល់នៅក្រុមហ៊ុនព្រីម្លិះនៅខេត្តកំពង់ស្ពឺ។
នៅក្នុងកំឡុងពេលនេះដែរ តំណាងក្រុមហ៊ុនក៏បានចែករំលែកព័ត៌មានអំពីផលិតផលរបស់ក្រុមហ៊ុន និងបានចូលទស្សនាដោយផ្ទាល់ពីដំណើរការផលិតកែច្នៃអង្ករសម្រាប់ធ្វើការនាំចេញផងដែរ។
បើតាមតំណាងខាងលើ ក្រុមហ៊ុន ព្រីម្លិះបានបង្កើតឡើងនៅឆ្នាំ២០១៣ គិតមកទល់បច្ចុប្បន្ននេះមានអាយុកាល១២ឆ្នាំហើយក្នុងបច្ចុប្បន្នក្រុមហ៊ុនមានស្រូវក្នុងស្តុកជាង២០ពាន់តោន និងអង្ករប្រមាណ១៤ពាន់តោន។ លើសពីនេះក្នុងរយៈពេល១០ខែ ក្នុងឆ្នាំ២០២៥នេះ ក្រុមហ៊ុនបាននាំចេញអង្ករជាង៦០ពាន់តោនកើនឡើង៧០ភាគរយ បើប្រៀបធៀបនិងរយៈពេលដូចគ្នាឆ្នាំ២០២៤ ហើយអង្ករ ដែលក្រុមហ៊ុនបាននាំចេញមានទៅទីផ្សារអឺរ៉ុប, អាស៊ី, អាហ្វ្រីក និងប្រទេសអូស្ត្រាលី៕
