ដោយ ឡុង សារេត
ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ សហការជាមួយអង្គការដៃគូ បានរៀបចំវេទិកា និងពិព័រណ៍កសិកម្មកម្ពុជា ឆ្នាំ២០២៥ ក្នុងគោលបំណងបង្កើតឱ្យមានការពិភាក្សាកម្រិតខ្ពស់ និងការដាក់តាំងបង្ហាញកសិផលសក្តានុពលរបស់កម្ពុជា ក៏ដូចជាផ្តល់ឱកាសជូនវិនិយោគិនស្វែងយល់ពីកាលានុវត្តភាពសម្រាប់ការវិនិយោគក្នុងវិស័យកសិកម្ម កសិពាណិជ្ជកម្ម និងកសិស្បៀងអាហារ។
ក្នុងពិធីបើកវេទិកា និងពិព័រណ៍កសិកម្មកម្ពុជា នៅថ្ងៃទី១៣ ខែវិច្ឆិកា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា វិស័យកសិកម្មកម្ពុជាបានបោះជំហ៊ានមកដល់ដំណាក់កាលថ្មី និងកំពុងជួបប្រទះបញ្ហាប្រឈមថ្មីមួយចំនួន ជាពិសេសនិរន្តរភាពនៃផលិតកម្ម និងតម្រូវការទីផ្សារ។
ថ្លៃដើមផលិតខ្ពស់ ទីផ្សារ និងការកែច្នៃផលិតផលនៅមានកម្រិក និងការប្រែប្រួលមិនអាចស្មានទុកបានជាមុន នៃតម្លៃកសិផលនៅលើទីផ្សារអន្តរជាតិ ដែលទាំងអស់នេះទាមទារឱ្យគ្រប់តួអង្គពាក់ព័ន្ធចូលរួមសហការ និងគាំទ្រថែមទៀត ក្នុងគោលបំណងបន្តរួមគ្នាដោះស្រាយបញ្ហា និងផ្តល់ក្តីសង្ឃឹមដល់ប្រជាកសិករ ដែលបាននិងកំពុងខិតខំប្រឹងប្រែងផលិតដើម្បីធានាសន្តិសុខស្បៀងផង លើកកម្ពស់ជីវភាពគ្រួសារផង និងទ្រទ្រង់កំណើនសេដ្ឋកិច្ចជាតិផង។
ឯកឧត្តមបន្តទៀតថា ដើម្បីសម្រេចបាននូវគោលដៅនេះ ថ្នាក់ដឹកនាំ និងមន្ត្រីរាជការគ្រប់លំណាប់ថ្នាក់នៃក្រសួងកសិកម្ម រុក្ខាប្រមាញ់ និងនេសាទ បាននិងកំពុងខិតខំប្រឹងប្រែងអនុវត្តគោលនយោបាយរបស់រាជរដ្ឋាភិបាល ជាពិសេសយុទ្ធសាស្ត្របញ្ជកោណដំណាក់កាលទី១ និងកម្មវិធីគោលនយោបាយអាទិភាពទី៥ និងទី៦។ យន្តការរក្សាលំនឹងតម្លៃកសិផលគន្លឹះ ជាពិសេសតម្លៃស្រូវត្រូវបានជំរុញឱ្យអនុវត្តយ៉ាងសកម្មជាច្រើនលើកប្រកបដោយជោគជ័យនិងមានប្រសិទ្ធភាពខ្ពស់។ ទន្ទឹមនិងនេះដែរ មន្ត្រីកសិកម្មឃុំចំនួន១៦០០នាក់ត្រូវបានជ្រើសរើសប្រកបដោយតម្លាភាព និងកំពុងតែចុះជួយផ្សព្វផ្សាយបច្ចេកទេសដល់កសិករ ប្រមូលទិន្នន័យផលិតកម្ម និងសម្របសម្រួលទីផ្សារសម្រាប់កសិផលរបស់ប្រជាកសិករនៅតាមឃុំសង្កាត់នៅទូទាំងប្រទេស។
ជាងនេះទៀត សហគមន៍កសិកម្មទំនើបមានប្រមាណ២៥សហគមន៍ ត្រូវបានបង្កើតឡើង ក្នុងគោលបំណងផ្តល់ការគាំទ្រដល់កសិករ ក្នុងការកាត់បន្ថយថ្លៃដើមផលិត ផ្សារភ្ជាប់ទៅនឹងទីផ្សារ ចុះកិច្ចសន្យាលក់ក្នុងតម្លៃសមស្របដើម្បីធានាប្រាក់ចំណេញសម្រាប់បងប្អូនកសិករ។
ឯកឧត្តមរដ្ឋលេខាធិការ បានមានប្រសាសន៍ទៀតថា ដើម្បីរួមចំណែកបង្កើនការស្រូបយកកសិផលក្នុងស្រុកមកកែច្នៃជាផលិតផលក្នុងស្រុក និងបង្កើតទីផ្សារបន្ថែម ក្រសួងកសិកម្ម ក្រោមគំនិតផ្តួចផ្តើមប្រកបដោយចក្ខុវិស័យរបស់ថ្នាក់ដឹកនាំ បានរៀបចំវេទិកា និងពិព័រណ៍កសិកម្មនេះឡើងក្នុងគោលបំណងបង្កើតឱ្យមានការពិភាក្សាកម្រិតខ្ពស់ និងដាក់តាំងបង្ហាញកសិផលសក្តានុពលរបស់កម្ពុជា តាមរយៈនេះវិស័យឯកជនទាំងក្នុង និងក្រៅប្រទេស ជាពិសេសវិនិយោគិន និងធុរជននឹងមានឱកាសស្វែងយល់ពីកាលានុវត្តភាព វិនិយោគក្នុងវិស័យកសិកម្ម កសិពាណិជ្ជកម្ម និងកសិស្បៀងអាហារ។
ឯកឧត្តមសង្កត់ធ្ងន់ថា «ខ្ញុំជឿជាក់ថា វេទិកា និងពិព័រណ៍កសិកម្មកម្ពុជា ឆ្នាំ២០២៥នេះ នឹងក្លាយជាចំណុចចាប់ផ្តើមដ៏ល្អមួយថែមទៀតសម្រាប់បង្កើតភាពជាដៃគូរវាងវិនិយោគិន ធុរជន និងកសិករ ដែលនិងចូលរួមចំណែកបង្កើតទីផ្សារបន្ថែមទៀតសម្រាប់កសិផលកម្ពុជា និងលើកកម្ពស់ជីវភាពរបស់ប្រជាកសិករ ដែលជាអ្នកផលិត”។
ក្នុងឱកាសនេះផងដែរ ឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជាតំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ថា វេទិកា និងពិព័រណ៍កសិកម្មកម្ពុជា ឆ្នាំ២០២៥ គឺជាគំនិតផ្តួចផ្តើមមួយ ដែលតួអង្គពាក់ព័ន្ធទាំងអស់ក្នុងខ្សែច្រវាក់ផលិតកម្មកសិកម្មមានឱកាសជួបប្រាស្រ័យទាក់ទងគ្នា ផ្លាស់ប្តូរមតិយោបល់ បង្កើតភាពជាដៃគូ និងស្វែងរកឱកាសថ្មីៗ សម្រាប់ការធ្វើពាណិជ្ជកម្ម និងការវិនិយោគ។
ដើម្បីសម្រេចនូវគោលដៅនេះ ឯកឧត្តមបណ្ឌិតសភាចារ្យ ផ្តល់អនុសាសន៍មួយចំនួនដល់តួអង្គពាក់ព័ន្ធ រួមមានក្រសួងស្ថាប័ន ដៃគូអភិវឌ្ឍន៍ និងវិស័យឯកជនដើម្បីជំរុញការធ្វើពាណិជ្ជកម្ម និងការវិនិយោគក្នុងវិស័យកសិកម្ម៖
១) ការអនុវត្តសហគមន៍កសិកម្មទំនើបដើម្បីតម្រង់ទិស និងដើម្បីធានានិរន្តរភាពនៃផលិតកម្ម ស្របតាមតម្រូវការនៃទីផ្សារ កាត់បន្ថយថ្លៃដើមផលិតដើម្បីបង្កើនភាពប្រកួតប្រជែង និងផ្សារភ្ជាប់ផលិតកម្មទៅនឹងទីផ្សារ តាមរយៈផលិតកម្មកសិកម្មតាមកិច្ចសន្យាជាមួយតម្លៃសមរម្យ ដើម្បីធានាប្រាក់ចំណេញសម្រាប់ប្រជាកសិករ ក្រោមយន្តការភាពជាដៃគូកាន់តែរឹងមាំរវាងរដ្ឋ ឯកជន ដៃគូអភិវឌ្ឍន៍ និងសហគមន៍កសិកម្មទំនើប។
២) បង្កើនការលើកទឹកចិត្ត ការគាំទ្រ ការប្រើប្រាស់ផលិតផល និងកសិផលខ្មែរ ដោយបង្កើនយុទ្ធនាការផ្សព្វផ្សាយ និងកម្មវិធីតាំងពិព័រណ៍ផលិតផល និងកសិផលខ្មែរ ឱ្យកាន់តែញឹកញាប់ និងទូលំទូលាយថែមទៀត ទាំងនៅក្នុង និងខាងក្រៅប្រទេស។
៣) បង្កើនការកែច្នៃកសិផលដើម្បីបង្កើតទីផ្សារបន្ថែមសម្រាប់កសិផលនៅក្នុងស្រុកផង ព្រមទាំងបង្កើតការងារ និងតម្លៃបន្ថែមផង ដោយបង្កើនការកៀរគរអ្នកវិនិយោគក្នុងខ្សែច្រវាក់តម្លៃកសិកម្ម។ ការវិនិយោគកែច្នៃតាមស្តង់ដារ និងការផ្សព្វផ្សាយម៉ាក Make in Cambodiaនិងជួយទាក់ទាញវិនិយោគបន្ថែមទៀត និងបង្កើនទំនុកចិត្តដល់អ្នកប្រើប្រាស់។
៤) បង្កើនកិច្ចសហការកសាងកេរ្តិ៍ឈ្មោះកម្ពុជា ជាប្រទេសផ្គត់ផ្គង់ផលិតផល និងកសិផល ដែលមានគុណភាព សុវត្ថិភាព និងមេត្រីភាពបរិស្ថានទៅកាន់ទីផ្សារក្នុងស្រុក និងអន្តរជាតិ។ ផលិតផល និងកសិផលរបស់កម្ពុជា មានគុណភាពល្អ ដូច្នេះយើងត្រូវប្រើប្រាស់សក្តានុពលនេះឱ្យអស់ពីលទ្ធភាព ដើម្បីបង្កើនការប្រកួតប្រជែង និងជំរុញកំណើនពាណិជ្ជកម្មផលិតផល និងកសិផលកម្ពុជា៕
