កូឡាឡាំពួរ៖ វិទ្យាស្ថានស្រាវជ្រាវ និងអភិវឌ្ឍន៍កសិកម្មម៉ាឡេស៊ី បានកំណត់គោលដៅកាត់បន្ថយឱ្យបាន៣០ភាគរយនូវការពឹងផ្អែករបស់ខ្លួនលើខ្ទឹមបារាំងក្រហមនាំចូល នៅឆ្នាំ២០៣០ ដោយប្រើកម្មវិធីផលិតកម្មគ្រាប់ពូជក្នុងស្រុក ដែលមានរចនាសម្ព័ន្ធត្រឹមត្រូវ។
អគ្គនាយកវិទ្យាស្ថានស្រាវជ្រាវ បាននិយាយថា គំនិតផ្តួចផ្តើមនេះគាំទ្រដល់គោលដៅសន្តិសុខស្បៀងជាតិ ស្របពេលប្រទេសម៉ាឡេស៊ី នាពេលបច្ចុប្បន្នបាននាំចូលស្ទើរតែទាំងអស់នូវខ្ទឹមបារាំងក្រហម ដើម្បីឆ្លើយតបតាមតម្រូវការក្នុងប្រទេស ដែលមានតម្លៃជាទឹកប្រាក់ជាង ៥៥៥លានដុល្លារក្នុងមួយឆ្នាំ។
គម្រោងដាំដុះសាកល្បងនៅក្នុងប្រទេសម៉ាឡេស៊ីបានបង្ហាញពីការរីកចម្រើនគួរឱ្យកត់សម្គាល់ ដោយសហគ្រិនទីវ័យក្មេងម្នាក់បានពង្រីកពីគ្រាប់ពូជចំនួន២០គីឡូក្រាម ដាំនៅលើថ្នាលតូចៗ រហូតបង្កើនគ្រាប់ពួជបានយ៉ាងច្រើន ដែលអាចដាំបានលើផ្ទៃដីកន្លះហិកតា និងទទួលបានទិន្នផលរហូតដល់ប្រាំតោនក្នុងមួយរដូវ។
លោកអគ្គនាយកវិទ្យាស្ថានស្រាវជ្រាវ បាននិយាយក្នុងដំណើរទស្សនកិច្ចពិនិត្យមើលគម្រោងផលិតគ្រាប់ពូជខ្ទឹមបារាំងក្រហម ដែលបង្ហាញថា ខ្ទឹមបារាំងក្រហមអាចដាំដុះបានជាលក្ខណៈពាណិជ្ជកម្មនៅក្នុងប្រទេសម៉ាឡេស៊ី។
សព្វថ្ងៃនេះ វិទ្យាស្ថានស្រាវជ្រាវ និងអភិវឌ្ឍន៍កសិកម្មម៉ាឡេស៊ី កំពុងផ្តោតលើការអភិវឌ្ឍគ្រាប់ពូជក្នុងស្រុកសម្រាប់ចែកចាយដល់ប្រជាកសិករនៅក្រោមនាយកដ្ឋានកសិកម្ម ស្របពេលសហគ្រិនគំរូ នឹងដើរតួជាអ្នកផលិតគ្រាប់ពូជសម្រាប់ចែកចាយបន្ត តាមរយៈប្រព័ន្ធដាំឡើងវិញ គ្រាប់មួយកញ្ចប់អាចបង្កើតបានគ្រាប់ថ្មីបីកញ្ចប់ ដែលអាចពង្រីកការដាំដុះតាមគ្រប់រដូវនីមួយៗ។
យោងតាមអាកាសធាតុក្នុងប្រទេសម៉ាឡេស៊ី ខ្ទឹមបារាំងក្រហមអាចដាំបាននៅនៅក្នុងខែសីហា និងប្រមូលផលនៅក្នុងខែតុលា។ ការដាំដុះនឹងពង្រីកឱ្យបានកាន់តែធំនៅឆ្នាំ២០២៦ ដែលអ្នកជំនាញសង្ឃឹមថា នឹងទទួលបានទិន្នផលគ្រាប់ចំនួន១៥ ០០០ គីឡូក្រាមក្នុងមួយរដូវដាំដុះ។ ចំណែកនៅកសិដ្ឋាផលិតកម្មចំណីអាហារផ្សេងទៀត អាចផលិតគ្រាប់ពូជបានឈានដល់ ២ ៤០០គីឡូក្រាមក្នុងមួយរដូវ ដែលអ្នកជំនាញបានព្យាករណ៍ថា នឹងទទួលបានទិន្នផលគ្រាប់ពូជកើនឡើងរហូតដល់៥០ ០០០គីឡូក្រាម នៅឆ្នាំ២០២៦។
លោកប្រធានវិទ្យាស្ថានបានជ្រើសរើសកំណត់សម្រាប់ដាំដុះខ្ទឹមបារាំងក្រហម ដែលអាចផ្តល់ទិន្នផលពី៨ ០០០ ទៅ៩០ ០០០គីឡូក្រាម ក្នុងមួយហិកតា អាស្រ័យលើវិធីសាស្រ្តដាំដុះ។ ចំណែកតម្រូវការទីផ្សារក្នុងស្រុកនៅតែមានកម្រិតខ្ពស់ដដែល ដោយមានតម្លៃចន្លោះពី ១,៥០ដុល្លារ ទៅ២,១៥ដុល្លារ ក្នុងមួយគីឡូក្រាម ដែលអាចលក់ស្រស់ៗ និងផលិតផលខ្ទឹមបារាំងបំពងដ៏ពេញនិយមផងដែរ។
សហគ្រិនគំរូពសម្រាប់ផលិតគ្រាប់ពូជវិញ បានកត់សម្គាល់ថា ការងាររបស់លោកបានចាប់ផ្តើមនៅដើមឆ្នាំ២០២៣ បន្ទាប់ពីទទួលបានការគាំទ្រផ្នែកបច្ចេកទេសពីវិទ្យាស្ថានស្រាវជ្រាវ និងអភិវឌ្ឍន៍កសិកម្មម៉ាឡេស៊ី។ ការសាកល្បងដំបូង លោកបានដាំគ្រាប់ពូជចំនួន២០គីឡូក្រាម ផលិតបានខ្ទឹមបារាំងបំពងចំនួន១១៥គីឡូក្រាម ឬស្មើនឹងខ្ទឹមបារាំងក្រហមចំនួន៥០០មើម។ លោកបានបន្ថែមថា ខ្ទឹមបារាំងក្រហមមានភាពងាយស្រួលក្នុងការគ្រប់គ្រងជាងបន្លែដទៃទៀត ហើយក៏អាចបណ្តេញសត្វល្អិតចេញពីដំណាំផ្សេងទៀង ដូចជាម្ទេសជាដើម។
ផ្ទៃដីដាំដុះ គឺសមស្របបំផុតនៅរដូវប្រាំង ខណៈពេលនៅរដូវវស្សា គេអាចដំណាំផ្សេងជំនួសវិញ មានដូចជា ស្ពៃខ្មៅ និងត្រកួនជាដើម។ តម្រូវការខ្ទឹមបារាំងក្រហមបច្ចុប្បន្ននៅក្នុងប្រទេសម៉ាឡេស៊ី គឺកើនលើសពីការផ្គត់ផ្គង់ ដោយការលក់ភាគច្រើនមានកំណត់ចំពោះទីផ្សារក្នុងស្រុក ដោយសារកសិករមិនអាចបំពេញតាមការបញ្ជាទិញពីតាមផ្សារទំនើបបានទេ។ ខ្ទឹមបារាំង ដែលមានគុណភាពខ្ពស់ ត្រូវបានលក់ក្នុងតម្លៃរហូតដល់២,១៥ដុល្លារ ក្នុងមួយគីឡូក្រាម៕
