ហាណូយ៖ យោងតាមការប៉ាន់ស្មានដោយកម្មវិធីអភិវឌ្ឍន៍អង្គការសហប្រជាជាតិ បានឱ្យដឹងថា ពន្ធគយរបស់សហរដ្ឋអាម៉េរិក ដែលចូលធរមានក្នុងខែសីហា ឆ្នាំ២០២៥នេះ បានកាត់បន្ថយចំណូលរហូតដល់មួយភាគប្រាំនៃការនាំចេញរបស់វៀតណាម ទៅកាន់សហរដ្ឋអាម៉េរិក ដោយធ្វើឱ្យវៀតណាមក្លាយជាប្រទេសរងគ្រោះខ្លាំងជាងគេ នៅក្នុងតំបន់អាស៊ីអាគ្នេយ៍។
ទីភ្នាក់ងារព័ត៌មាន រ៉យទ័ររបស់អង់គ្លេស បានផ្សាយថា ទិន្នន័យពាណិជ្ជកម្មរបស់សហរដ្ឋអាម៉េរិក បង្ហាញឱ្យដឹងថា វៀតណាម គឺជាប្រទេសនាំចេញធំជាងគេទីប្រាំមួយ ទៅកាន់សហរដ្ឋអាម៉េរិក កាលពីឆ្នាំ២០២៤ ដែលនាំចេញទំនិញមានតម្លៃជាទឹកប្រាក់ចំនួន១៣៦,៥ពាន់លានដុល្លារ។ ទំនិញទាំងនោះភាគច្រើនត្រូវបានផលិតនៅក្នុងរោងចក្រ ដែលគ្រប់គ្រងដោយសហរដ្ឋអាម៉េរិក និងក្រុមហ៊ុនពហុជាតិបរទេស។
ប្រធានអ្នកសេដ្ឋកិច្ចរបស់កម្មវិធីអភិវឌ្ឍន៍អង្គការសហប្រជាជាតិ (UNDP) ប្រចាំតំបន់អាស៊ីប៉ាស៊ីហ្វិកបាននិយាយថា នៅក្នុងសេណារីយ៉ូដ៏អាក្រក់បំផុតនៃអតិផរណារបស់សហរដ្ឋអាម៉េរិក ដែលបង្កឡើងដោយអត្រាពន្ធគយខ្ពស់រហូតដល់២០ភាគរយ ដែលបង់លើទំនិញវៀតណាមអាចបណ្តាលឱ្យការនាំចេញរបស់សហរដ្ឋអាម៉េរិក ធ្លាក់ចុះលើសពី២៥ពាន់លានដុល្លារ ឬសើជិតមួយភាគប្រាំនៃចំណូលសរុបប្រចាំឆ្នាំ។
យោងតាមនាយកដ្ឋានគយរបស់វៀតណាម បានឱ្យដឹងថា ទិន្នន័យវៀតណាម ដែលចេញផ្សាយចាប់តាំងពីពន្ធអាម៉េរិកចូលជាធរមាន កាលពីថ្ងៃទី៧ ខែសីហា ឆ្នាំ២០២៥ បានបង្ហាញថា ការនាំចេញរបស់វៀតណាមទៅកាន់សហរដ្ឋអាម៉េរិកបានធ្លាក់ចុះពីរភាគរយ រវាងខែកក្កដា និងខែសីហា ពីខែកក្កដា ដោយធ្លាក់ចុះ ៥,៥ភាគរយសម្រាប់ផលិតផលស្បែកជើង ដែលក្នុងនោះប្រទេសវៀតណាម គឺជាអ្នកផ្គត់ផ្គង់ធំទីពីររបស់ពិភពលោក។
របាយការណ៍របស់កម្មវិធីអភិវឌ្ឍន៍អង្គការសហប្រជាជាតិ ដែលចេញផ្សាយកាលពីសប្តាហ៍មុន អំពីការប៉ាន់ប្រមាណជាសាធារណៈលើកដំបូងនៃផលប៉ះពាល់លើលំហូរពាណិជ្ជកម្ម ចាប់តាំងពីពន្ធអាម៉េរិកចូលជាធរមាន បានបង្ហាញថា ការធ្លាក់ចុះច្រើនបំផុត១៩,២ភាគរយនៃការនាំចេញរបស់វៀតណាម ទៅកាន់អាម៉េរិក នឹងកើនឡើងជិតពីរដង ដែលជាមធ្យមធ្លាក់ចុះត្រឹម៩,៧ភាគរយនៃការនាំចេញពីអាស៊ីអាគ្នេយ៍។
ប្រធានអ្នកសេដ្ឋកិច្ចរបស់កម្មវិធីអភិវឌ្ឍន៍អង្គការសហប្រជាជាតិ បាននិយាយទៀតថា គ្មានប្រទេសណាមួយនៅអាស៊ីអាគ្នេយ៍ ដែលប្រឈមនឹងការដំឡើងពន្ធរបស់សហរដ្ឋអាម៉េរិកច្រើនជាងប្រទេសវៀតណាមនោះទេ។ ចំណែកនៅតំបន់អាស៊ីបូព៌ា មានតែប្រទេសចិនមួយប៉ុណ្ណោះ ដែលនឹងទទួលរងនូវផលប៉ះពាល់ជាប្រាក់ដុល្លារ។
របាយការណ៍ដដែលបាននិយាយថា ក្នុងចំណោមប្រទេសនៅអាស៊ីអាគ្នេយ៍ ការនាំចេញរបស់ប្រទេសថៃទៅកាន់សហរដ្ឋអាម៉េរិក អាចធ្លាក់ចុះ១២,៧ភាគរយ ម៉ាឡេស៊ីធ្លាក់ចុះ១០,៤ភាគរយ និងប្រទេសឥណ្ឌូនេស៊ីធ្លាក់ចុះ៦,៤ភាគរយ។
ការប៉ាន់ប្រមាណរបស់កម្មវិធីអភិវឌ្ឍន៍អង្គការសហប្រជា គឺផ្អែកលើសេណារីយ៉ូ ដែលកាតព្វកិច្ចបង់ពន្ធនឹងក្លាយជាការទទួលខុសត្រូវរបស់អ្នកប្រើប្រាស់នៅអាម៉េរិក ដោយធ្វើឱ្យតម្រូវការធ្លាក់ចុះ ដែលរហូតមកដល់ពេលនេះ មិនទាន់កើតឡើងទេ ព្រោះផលប៉ះពាល់លើអតិផរណារបស់សហរដ្ឋអាម៉េរិក នៅមានកម្រិតមធ្យម។
ទោះបីជាយ៉ាងណាក៏ដោយ កម្មវិធីអភិវឌ្ឍន៍អង្គការសហប្រជា មិនបានគិតគូរពីផលប៉ះពាល់អាចកើតមានឡើងពីអាត្រាពន្ធ៤០ភាគរយ លើទំនិញឆ្លងកាត់ប្រទេសវៀតណាម ដែលអាចជះឥទ្ធិពលយ៉ាងធ្ងន់ធ្ងរ ប្រសិនបើរដ្ឋាភិបាលអាម៉េរិកសម្រេចចិត្តដាក់កម្រិតយ៉ាងតឹងរឹង លើការជាប់ពន្ធរបស់បរទេស ដែលយកប្រទេសវៀតណាមសម្រាប់ទំនិញនាំចេញ ដោយសារទំនិញភាគច្រើនរបស់វៀតណាមពឹងផ្អែកខ្លាំងលើការបញ្ចូលគ្នាជាមួយទំនិញរបស់ចិន៕
