ភ្នំពេញ៖ ប្រហុកជាអាហារចាំបាច់មួយរបស់ចាស់បុរាណខ្មែរដ៏យូរលង់ ហើយក៏ជាអាហារផ្អាប់ ដែលអាចរក្សាទុកបានយូរផង។ ក្រៅពីកែច្នៃធ្វើម្ហូបបានច្រើនមុខ អាហារផ្អាប់ ដែលចាស់ទុំតាមស្រុកស្រែចម្ការមិនអាចខ្វះបានមួយនេះ គេនៅប្រើជាគ្រឿងផ្សំបានច្រើនបែបយ៉ាងណាស់ទៀតផង។
មកដល់ពេលបច្ចុប្បន្នអាហារដ៏ល្បីឈ្មោះរបស់ខ្មែរមួយនេះ មិនត្រឹមតែពលរដ្ឋខ្មែរពេញនិយមបរិភោគទេ សូម្បីតែនៅតាមទីផ្សារក្រៅប្រទេសក៏អាចលក់កាន់តែដាច់កើនឡើងជាបន្តបន្ទាប់។
បើតាមការឱ្យដឹងរបស់ឧកញ៉ាឱសថបណ្ឌិត ហៃ លីអ៊ាង ប្រធានអគ្គនាយកក្រុមហ៊ុនខនហ្វីរេល (CONFIREL) ដែលជាអ្នកកែច្នៃម្សៅប្រហុក សម្រាប់ទីផ្សារក្នុងស្រុក និងការនាំចេញ បានឱ្យដឹងថា បច្ចុប្បន្នផលិតកម្មបានកែច្នៃម្សៅប្រហុកបាន៥ ០០០កែវ ស្មើនឹងទម្ងន់មួយតោនប្រហុក ក្នុងមួយថ្ងៃ។ ប្រហុកម្សៅ ត្រូវបានបញ្ចុះក្លិន បញ្ចុះជាតិអំបិល និងបញ្ចុះសារធាតុហាមឃាត់ ដែលធ្វើឱ្យប៉ះពាល់ទៅដល់សុខភាពផ្សេងទៀត។
ឧកញ៉ាឱសថបណ្ឌិត បានប្រាប់ឱ្យដឹងដែរថា មកទល់នឹងបច្ចុប្បន្ននេះ ក្រុមហ៊ុនខនហ្វីរេល មានអាយុ ២៥ឆ្នាំហើយ។ ចាប់តាំងពីពេលបង្កើតឡើង នៅឆ្នាំ២០០១មក ខនហ្វីរេល មានទស្សនវិស័យច្បាស់លាស់ ក្នុងការចូលរួមអភិរក្ស និងអភិវឌ្ឍគ្រប់ផលិតផលដូនតា ដែលជាសម្បត្តិបេតិកភ័ណ្ឌរបស់ជាតិយើង ដោយប្រើប្រាស់សមត្ថភាព និងធនធានថវិកាផ្ទាល់ខ្លួន ជាមួយនឹងទំនុកចិត្តប្រកបដោយភាពជឿជាក់ ដើម្បីផ្តល់តម្លៃដល់ស្នាដៃបុព្វបុរសបន្សល់ទុកឱ្យ។ លើសពីនេះទៅទៀត ក្រុមហ៊ុនខនហ្វីរេល ទទួលបានវិញ្ញាបនប័ត្រ HACCP ដែលជាប្រព័ន្ធគ្រប់គ្រងសុវត្ថិភាពចំណីអាហារ ប្រកបដោយគុណភាព និងសុវត្ថិភាព។
បញ្ជាក់ក្នុងពិធីបើកសម្ពោធម្សៅប្រហុករបស់ក្រុមហ៊ុន ខនហ្វីរេល នៅរសៀលថ្ងៃទី ០៨ ខែ កញ្ញា ឆ្នាំ ២០២៥លោក សុខ ណារិន តំណាងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម ហៅកាត់UNIDO ប្រចាំនៅកម្ពុជា បានឱ្យដឹងថា ប្រហុកម្សៅនេះ ត្រូវបានធ្វើតេស្តសុវត្ថិភាពម្ហូបអាហារ ដោយវិទ្យាស្ថានប៉ាស្ទ័រកម្ពុជា ដើម្បីធានាដល់គុណភាព និងសុវត្ថិភាពម្ហូបអាហារ។
ជាមួយគ្នានេះឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទឱ្យដឹងថា សិប្បកម្មផលិត និង កែច្នៃប្រហុកម្សៅរបស់ក្រុមហ៊ុនខនហ្វីរេល ដែលត្រូវបានធ្វើទំនើបកម្មនិងកែលម្អយ៉ាងល្អប្រសើរប្រកបដោយមោទនភាព ដោយប្រើប្រាស់វត្ថុធាតុដើមក្នុងស្រុក គឺប្រហុកសៀមរាបដែលជាម៉ាកស្គាល់ភូមិសាស្រ្តទំនិញ (GI)។
ឯកឧត្តមរដ្ឋលេខាធិការបានបញ្ជាក់បន្ថែមថា៖ដោយមានការគាំទ្រពីដៃគូអភិវឌ្ឍន៍ផ្សេងៗ ដូចជាគម្រោង CAPFISH ដែលបានជួយដល់សិប្បកម្មកែច្នៃម្សៅប្រហុកទទួលបាននូវវិញ្ញាបនបត្រហាសឹប (HACCP) ដែលជាស្តង់ដារសុវត្ថិភាពម្ហូបអាហារអន្តរជាតិ។ ម៉្យាងវិញទៀត តាមរយៈការចងក្រង និង ផ្សារភ្ជាប់រវាងក្រុមអ្នកផលិត ជាមួយនឹងសហគ្រាសកែច្នៃ នឹងជួយរក្សាបាននូវលំនឹងតម្លៃ និង ការផ្គត់ផ្គង់សម្រាប់ទីផ្សារ ដែលជាផ្នែកមួយក្នុងការចូលរួមសម្រេចនូវគោលនយោបាយស្តីពី”សហគមកសិកម្មទំនើប” របស់ក្រសួងកសិកម្ម រុក្ខាប្រមាញ់ និងនេសាទ ព្រមទាំងបានបង្កើតឱកាសការងារ ជាពិសេសសម្រាប់ពលករមាតុភូមិនិវត្តន៍ដែលជាទិដ្ឋភាពមួយថ្មី និង សំខាន់ចំពោះមុខផងដែរ។
ឯកឧត្តមបានថ្លែងឱ្យដឹងដែរថាតាមរបាយកការណ៍របស់គម្រោង CAPFISH-Capture បានបង្ហាញឱ្យឃើញថា ក្នុងរយៈពេលប៉ុន្មានឆ្នាំចុងក្រោយនេះ គម្រោងបានផ្តល់ជំនួយផ្នែកហិរញ្ញវត្ថុ និង បច្ចេកទេស ដល់សហគ្រាសជលផលខ្នាតតូចនិងមធ្យមជាង ៦០សហគ្រាស និងតួអង្គពាក់ព័ន្ធក្នុងខ្សែច្រវាក់តម្លៃជលផលប្រមាណ ៤០០តួអង្គ តាមរយៈកម្មវិធីគាំទ្រវិនិយោគក្នុងខ្សែច្រវាក់តម្លៃ (Value Chain Investment Support- VCIS)។ ជាលទ្ធផល សហគ្រាសបានកែលម្អទីតាំង បរិក្ខារកែច្នៃ និងពង្រឹងការអនុវត្តសុវត្ថិភាពម្ហូបអាហារនិងការត្រៀមលក្ខណៈចូលទៅកាន់ទីផ្សារអន្តរជាតិ។ កិច្ចគាំទ្រនេះបានជួយបង្កើតការងារបានចំនួនប្រហែល ១៤ ០០០នាក់ ដែលរួមចំណែកដល់កំណើនសេដ្ឋកិច្ចជាតិនិងការកាត់បន្ថយភាពក្រីក្រ។
ដោយឡែកឯកឧត្តម ពុំ សុថា ប្រតិភូរាជរដ្ឋាភិបាលទទួលបន្ទុកជាអគ្គនាយករដ្ឋបាលជលនៃក្រសួងកសិកម្ម រុក្ខាប្រមាញ់ និងនេសាទឱ្យដឹងថា៖ នាពេលបច្ចុប្បន្នលើទីផ្សារក្នុងប្រទេសកម្ពុជា ប្រហុកម្សៅកម្ពុជា ក៏ទទួលបានការគាំទ្រ ដោយប្រហុកម្សៅកម្ពុជា ទទួលបានការគាំទ្រសម្រាប់ការនាំចេញទៅទីផ្សារអឺរ៉ុប បន្ទាប់ពីមានការជួយជ្រោមជ្រែងពីគម្រោងអភិវឌ្ឍន៍ជលផលក្រោយប្រមូលផល(CAPFISH-Capture) ដែលគាំទ្រថវិកាពីសហភាពអឺរ៉ុប ដើម្បីអភិវឌ្ឍន៍ខ្សែច្រវាក់ផលិតកម្ម ការវេចខ្ចប់ និងការអនុវត្តប្រព័ន្ធគុណភាព សុវត្ថិភាពម្ហូបអាហារ។
ការគាំទ្រជាបន្ត បន្ទាប់ ត្រូវបានផ្តល់ជូនដល់សមាគមប្រហុកសៀមរាបស្តីពីការគ្រប់គ្រងបទបញ្ជាផ្ទៃក្នុង តួនាទីគណៈកម្មាធិការ ម៉ាកយីហោ ការផ្សព្វផ្សាយ និងកិច្ចការពាក់ព័ន្ធទៀតផង៕
