រដ្ឋខេកថ័កឃី៖ សមាគមសណ្តែកសៀងអាម៉េរិក កាលពីថ្ងៃទី២០ ខែសីហា ឆ្នាំ២០២៥ បានជំរុញឱ្យរដ្ឋាភិបាលសហរដ្ឋអាម៉េរិកធានាកិច្ចព្រមព្រៀងជាមួយប្រទេសចិន ដើម្បីបើកទីផ្សារដ៏សំខាន់នេះឡើងវិញ សម្រាប់នាំចេញសណ្តែកសៀងរបស់ខ្លួន ដោយសង្កត់ធ្ងន់ថា កសិករដាំសណ្តែកសៀងរបស់សហរដ្ឋអាម៉េរិក មិនអាចរស់បានទេដោយសារជម្លោះពាណិជ្ជកម្មដ៏យូរ ជាមួយប្រទេសចិន។
ប្រធានសមាគមសណ្តែកសៀងអាម៉េរិក ដែលជាកសិករដាំសណ្តែកសៀង នៅក្នុងរដ្ឋ ខេនថ័កឃី (Kentucky) បាននិយាយនៅក្នុងលិខិតមួយផ្ញើទៅកាន់រដ្ឋបាលរបស់លោកប្រធានាធិបតី ដួណាល់ ត្រាំ (Donald Trump) ដោយលើកឡើងថា «កសិករដាំសណ្តែកសៀងអាម៉េរិកកំពុងតែឈរនៅមាត់ជ្រោះនៃវិបត្តិពាណិជ្ជកម្ម និងហិរញ្ញវត្ថុ»។
លោកបាននិយាយទៀតថា «កសិករដាំសណ្តែកសៀងកំពុងមានបញ្ហាផ្នែកហិរញ្ញវត្ថុយ៉ាងខ្លាំង។ តម្លៃនៅតែបន្តធ្លាក់ចុះ ហើយក្នុងពេលជាមួយគ្នានេះ កសិកររបស់យើងកំពុងចំណាយកាន់តែច្រើនសម្រាប់តម្លៃស្តុក និងតម្លៃឧបករណ៍។ កសិករដាំសណ្តែកសៀងរបស់សហរដ្ឋអាម៉េរិក មិនអាចរស់ក្នុងជម្លោះពាណិជ្ជកម្មដ៏យូរជាមួយអតិថិជនធំបំផុតរបស់យើងបានទេ»។
ជាប្រវត្តិសាស្ត្រ ប្រទេសចិនបាននាំចូលសណ្តែកសៀងអាម៉េរិកច្រើនជាង៦០ភាគរយនៃការផ្គត់ផ្គង់សណ្តែកសៀងរបស់ពិភពលោក ដោយសហរដ្ឋអាម៉េរិកធ្លាប់ធ្វើជាប្រភពសណ្តែកសៀងដ៏ធំបំផុតរបស់ចិន។ ប៉ុន្តែពន្ធសងសឹកឥឡូវនេះធ្វើឱ្យសណ្តែកសៀងរបស់សហរដ្ឋអាម៉េរិកមានតម្លៃថ្លៃជាងការផ្គត់ផ្គង់នៅអាម៉េរិកខាងត្បូង ជាង២០ភាគរយ ហើយប្រទេសចិនបានងាកទៅរកប្រភពសណ្តែកសៀងពីប្រទេសប្រេស៊ីល ដែលបានពង្រីកផលិតកម្មដើម្បីបំពេញតម្រូវការនាំចេញទៅកាន់ទីផ្សារក្រៅប្រទេស។
លោកប្រធានសមាគមសណ្តែកសៀងអាម៉េរិក បាននិយាយទៀតថា ប្រទេសចិនមិនបានបញ្ជាទិញសណ្តែកសៀងរបស់សហរដ្ឋអាម៉េរិកសោះតែម្តង ដែលក្នុងរយៈប៉ុន្មានខែខាងមុខនេះ គឺជាពេលជិតដល់រដូវយើងប្រមូលផល។ លើសពីនេះ នៅពេលចូលដល់រដូវប្រមូល ហើយយើងនៅតែគ្មានកិច្ចព្រមព្រៀងជាមួយប្រទេសចិន ដើម្បីបញ្ជាទិញសណ្តែកសៀងទេនោះ នឹងបង្កផលប៉ះពាល់កាន់តែអាក្រក់ទៅលើកសិករដាំសណ្តែកសៀងរបស់សហរដ្ឋអាម៉េរិក។
សមាគមសណ្តែកសៀងអាម៉េរិកក៏បានចេញផ្សាយក្រដាសសមួយ ដែលបង្ហាញពីផលវិបាកផ្នែកហិរញ្ញវត្ថុនៃការបាត់បង់ចំណែកទីផ្សាររយៈពេលវែងនៅក្នុងប្រទេសចិន។ យោងតាមរបាយការណ៍បានឱ្យដឹងថា ប្រទេសចិន គឺជាអ្នកទិញសណ្តែកសៀងកំពូលរបស់សហរដ្ឋអាម៉េរិក។ ក្នុងចន្លោះឆ្នាំ២០២៣-២០២៤ សហរដ្ឋអាម៉េរិកបាននាំចេញសណ្តែកសៀងជិត២៥លានតោនទៅកាន់ប្រទេសចិន ខណៈសណ្តែកសៀងរបស់សហរដ្ឋអាម៉េរិកត្រឹមតែ៤,៩តោនត្រូវបាននាំចេញទៅកាន់ទីផ្សារក្នុងសហភាពអឺរ៉ុប ដែលជាអ្នកទិញសណ្តែកសៀងធំទីពីររបស់សហរដ្ឋអាម៉េរិក ប៉ុន្តែអាចទិញបានស្ទើរតែមួយភាគប្រាំនៃការទិញសណ្តែកសៀងរបស់ប្រទេសចិន។
លោកបាននិយាយថា «ជារៀងរាល់ថ្ងៃ បើគ្មានកិច្ចព្រមព្រៀង កាន់តែបំផ្លាញចំណែកទីផ្សាររបស់កសិករអាម៉េរិកនៅក្នុងប្រទេសចិន។ យើងជំរុញយ៉ាងខ្លាំងដល់រដ្ឋាភិបាលឱ្យមានកិច្ចព្រមព្រៀង ដើម្បីបើកទីផ្សារដ៏សំខាន់នេះឡើងវិញ សម្រាប់សណ្តែកសៀងសហរដ្ឋអាម៉េរិក»៕
