តៃប៉ិ៖ ការវាយតម្លៃថ្មីៗនេះរបស់នាយកដ្ឋានសុខភាពកោះតៃវ៉ាន់ ទៅលើបន្លែ និងផ្លែឈើស្រស់ៗ លក់នៅក្នុងទីផ្សារនានារបស់តៃវ៉ាន់ បានបង្ហាញពីអត្រាគ្រោះថ្នាក់ដល់សុខភាព ដោយសារមិនមានអនុលោមភាពត្រឹមត្រូវតាមស្តង់ដារសុវត្ថិភាពចំណីអាហារ មានចំនួនរហូតដល់២៥ភាគរយថា មានសំណល់ថ្នាំពុលសម្លាប់សត្វល្អិតលើសពីកម្រិត ដែលអាចទទួលយកបាន ចំណែកផ្លែទុរេនវិញ មានកំហាប់សារធាតុគីមី កាតមីញ៉ូម (Cadmium) លើសពីកម្រិតសុវត្ថិភាព។
ប្រធានផ្នែកអាហារសុខភាព និងឱសថ បាននិយាយថា ការពិនិត្យជាប្រចាំលើផលិតផលស្រស់ៗ ត្រូវបានអនុវត្តនៅគ្រប់កន្លែងលក់ រួមទាំងទីផ្សារប្រពៃណី ផ្សារទំនើប និងនៅតាមភោជនីយដ្ឋាននានានៅក្នុងកោះតៃវ៉ាន់ ដោយត្រួតពិនិត្យវាយតម្លៃលើកំហាប់សំណល់ថ្នាំពុលសម្លាប់សត្វល្អិត រួមជាមួយនឹងសារធាតុគីមីផ្សេងទៀត ដែលគ្រោះថ្នាក់ដល់សុខភាពអ្នកទទួលទាន។
លោកប្រធានបានពន្យល់ថា ការត្រួតពិនិត្យនៅក្នុងខែឧសភា ឆ្នាំ២០២៥ របស់នាយកដ្ឋានពាក់ព័ន្ធនឹងការជ្រើសរើសយកសំណាកចំនួន៥២ប្រភេទពីបន្លែ និងផ្លែឈើ បានបង្ហាញលទ្ធផលថា មានទំនិញ១៣មុខមិនអនុវត្តឱ្យបានខ្ជាប់ខ្ជួននូវពិធីសារស្តីពីសុវត្ថិភាព។ ជាក់ស្តែង ទំនិញមិនអនុលោមតាមច្បាប់កំណត់ មានតែ ផ្កាខ្ទឹម ស្លឹកខ្ទឹម និងស្ពៃក្តោប មើមខ្ទឹមស។ រីឯផ្លែប៉ោម សណ្តែកបណ្តុះ និងផ្លែស្វាយ សុទ្ធតែមានសំណល់ថ្នាំពុលសម្លាប់សត្វល្អិតលើសពីកម្រិតច្បាប់អនុញ្ញាត។
ជាងនេះទៅទៀត ចំណែកទុរេន ត្រូវបានគេកត់សម្គាល់ឃើញថា មានផ្ទុកសារធាតុ កាតមីញ៉ូម ខ្ពស់ជាងស្តង់ដារអនុញ្ញាត។ រីឯផ្លែស្វាយមានសំណល់ថ្នាំពុលរើសកម្រិត ខណៈទំនិញផ្សេងទៀត ត្រូវបានចាត់ថ្នាក់ជាផលិតផលកសិកម្ម ដែលមានហានិភ័យខ្ពស់ ដែលមានសំណល់ថ្នាំពុលសម្លាប់សត្វល្អិតច្រើនហួសហេតុ ដោយសារលទ្ធផលនៃការត្រួតពិនិត្យជាប្រវត្តិសាស្ត្រពីរដ្ឋបាលចំណីអាហារ និងឱសថ និងក្រសួងកសិកម្មតៃវ៉ាន់។ ដូច្នេះ ផលិតផលទាំងអស់នេះ ត្រូវឆ្លងកាត់ការត្រួតពិនិត្យវាយតម្លៃញឹកញាប់ជាងមុន។
ក្រោយការត្រួតពិនិត្យរួច ក៏មានការណែនាំដល់អាជីវករឱ្យយកចេញផលិតផលណា ដែលមិនអនុលោមតាមច្បាប់កំណត់ ហើយប្រសិនបើពួកគេចង់ដឹងព័ត៌មានលម្អិតផ្សេងទៀត ត្រូវទាក់ទងទៅមន្ទីរសុខាភិបាលនៅក្នុងមូលដ្ឋាន។ លើសពីនេះ ក្រុមហ៊ុនផលិត និងចែកចាយផលិតផលកសិកម្មនៅតៃវ៉ាន់ ទទួលយកការណែនាំដើម្បីបញ្ឈប់ការផ្គត់ផ្គង់ផលិតផលខុសស្តង់ដារពីកសិករ ក្នុងរយៈពេល១ោថ្ងៃ ដោយរំពឹងថា នឹងមានការត្រួតពិនិត្យកាន់តែខ្ពស់នៅក្នុងការត្រួតពិនិត្យនាពេលអនាគត។
ក្នុងករណីមិនអនុលោមតាមច្បាប់ម្តងហើយម្តងទៀត កសិករអាចប្រឈមនឹងការផាកពិន័យ ដែលអាចឈានដល់ការដកហូតឋានៈអ្នកផ្គត់ផ្គង់ផលិតផលចំណីអាហារជាសាធារណៈ។
ដោយមើលឃើញពីឧបទ្ទវហេតុពុលអាហារ ដែលត្រូវបានរាយការណ៍ពាក់ព័ន្ធនឹងក្រុមកីឡាបាល់ទះស្ត្រី នៅវិទ្យាល័យតៃប៉ិ នាពេលថ្មីៗកន្លងមកនេះ មន្ត្រីផ្នែកសុខភាពសាធារណៈរបស់កោះតៃវ៉ាន់ បានណែនាំឱ្យមានការប្រុងប្រយ័ត្នខ្ពស់ទាក់ទងនឹងសុវត្ថិភាពចំណីអាហារក្នុងកំឡុងរដូវក្តៅ ដើម្បីកាត់បន្ថយឧប្បត្តិហេតុពុល។
ពួកមន្ត្រីបានណែនាំដល់អាជីវករ និងអ្នកចែកចាយបន្លែ និងផ្លែឈើ ឱ្យយល់ច្បាស់ពីសារៈសំខាន់នៃការរក្សាទុកផលិតផលប្រកបដោយសុវត្ថិភាព ទុកក្នុងទូទឹកកកឱ្យបានត្រឹមត្រូវ និងចៀសវាងការចម្លងរោគ រួមជាមួយនឹងការទិញផលិតណា ដែលមានប្រភពច្បាស់លាស់អាចទុកចិត្តបាន ដើម្បីកាត់បន្ថយហានិភ័យដល់សុខភាពសាធារណៈ៕
