ម៉ានីល៖ អ្នកនេសាទត្រីក្នុងបឹង តាល់ (Taal) ដែលជាបឹងទឹកសាបដ៏ធំមួយរបស់ប្រទេសហ្វីលីពីន កំពុងតែត្អូញត្អែរពីផលប៉ះពាល់នៃប្រាក់ចំណូលប្រចាំថ្ងៃ ដោយសារត្រីនេសាទបានពីបឹងនេះ បានធ្លាក់ថ្លៃយ៉ាងខ្លាំង បន្ទាប់ពីក្រុមនគរបាលស៊ើបអង្កេត បានរកឃើញឆ្អឹងមនុស្សច្រកក្នុងបាវទម្លាក់ចូលក្នុងទឹកបឹង។
នៅក្នុងសេចក្តីថ្លែងការណ៍មួយ បានលើកឡើងថា កាលពីថ្ងៃទី១៣ ខែកក្កដា ឆ្នាំ២០២៥ ក្រុមអ្នកនេសាទត្រីបានអះអាងថា តម្លៃត្រីរបស់ខ្លួន ដែលនេសាទបានពីបឹងធម្មជាតិនេះ បានធ្លាក់ថ្លៃជាងពាក់កណ្តាល មកនៅត្រឹម១០០ប៉េសូហ្វីលីពីន ឬស្មើប្រមាណ១,៨ដុល្លារប៉ុណ្ណោះក្នុងមួយគីឡូក្រាម គឺធ្លាក់ចុះពីតម្លៃធម្មតាលក់បាន២៥០ប៉េសូហ្វីលីពីន ឬ ប្រមាណ៤,៥៥ដុលា្លរក្នុងមួយគីឡូក្រាម។
យោងតាមក្រុមនេសាទដដែលនេះ បានឱ្យដឹងទៀតថា ការធ្លាក់ចុះតម្លៃត្រី គឺបង្កឡើងដោយសារការរកឃើញសាកសពមនុស្សជាបន្តបន្ទាប់ ដែលត្រូវបានក្រុមនគរបាលស៊ើបអង្កេតរកឃើញក្នុងបាវនៅបាតបឹងដ៏សម្បូរត្រីនេះ។
នាពេលកន្លងមកក្រុមអ្នកនេសាទរស់នៅតាមទីប្រជុំជនជុំវិញបឹង តាល់ បានសម្តែងក្តីព្រួយបារម្ភយ៉ាងខ្លាំងពីផលប៉ះពាល់ធ្ងន់ធ្ងរមកលើសេដ្ឋកិច្ចគ្រួសាររបស់ខ្លួន បន្ទាប់ពីមានការចេញផ្សាយព័ត៌មានលើកឡើងអំពីការប្រហារជីវិតក្រុមអ្នកលេងល្បែងបញ្ជល់មាន់ប្រមាណ១០០នាក់ រួចក្រុមឧក្រិដ្ឋជនបានបោះសាកសពចោលក្នុងបឹង ហើយដំណឹងនេះធ្វើឱ្យមហា។
ចាប់តាំងពីថ្ងៃទី១១ ខែកក្កដារហូតមក ក្រុមឆ្មាំឆ្នេរសមុទ្រហ្វីលីពីន បានមុជទឹកស្វែងរកនៅបាតបឹង ហើយបានប្រទះឃើញបាវសរុបចំនួនប្រាំបាវ ដែលសុទ្ធតែមានច្រកឆ្អឹងមនុស្សនៅស្រស់ៗនៅឡើយ។
ពាក់ព័ន្ធនឹងបញ្ហាត្រីធ្លាក់ថ្លៃនេះ យោងតាមការិយាល័យជលផល និងធនធានវារីវប្បកម្មរបស់ហ្វីលីពីន បានបញ្ជាក់ថា ប្រភេទត្រីចង្វាម្យ៉ាងនេសាទបានពីបឹងនេះ គឺជាត្រីវដ៏ពេញនិយម និងធ្លាប់តែមានតម្លៃខ្ពស់លើទីផ្សារ នៅតែមានសុវត្ថិភាពដល់អ្នកបរិភោគដដែល ដោយសារត្រីចង្វារស់នៅក្នុងទឹករាក់ និងស៊ីចំណីនៅលើផ្លេកតុន។
បឹង តាល់ គឺជាបឹងទឹកសាប កើតឡើងដោយបន្ទុះភ្នំភ្លើង កាលពីរាប់ពាន់ឆ្នាំមុន ស្ថិតនៅក្នុងខេត្ត បាតានហ្កាស (Batangas) នៃកោះ លូហ្សូន (Luzon) របស់ប្រទេសហ្វីលីពីន។ បឹងនេះ គឺជាបឹងធំជាងគេទីបីរបស់ប្រទេសហ្វីលីពីន។ បឹងនេះមានផ្ទៃទឹកទំហំជាង២៣៤គីឡូម៉ែត្រការ៉េ និងមានជម្រៅរហូតដល់១០០ម៉ែត្រ។
នគរបាលជាតិហ្វីលីពីន បាននិយាយថា កាលពីថ្ងៃទី២២ ខែកក្កដា ឆ្នាំ២០២៥ ក្រុមអ្នកស្រាវជ្រាវរបស់ខ្លួនបានមុជទឹករកឃើញ និងស្រង់យកឆ្អឹងមនុស្ស ដែលគេសង្ស័យថា ជាក្រុមអ្នកញៀនល្បៀងបញ្ជល់មាន់ជាង១០០នាក់ ត្រូវបានក្រុមឧក្រិដ្ឋជនជាប់ជម្រិត រួចច្របាច់កសម្លាប់ចោល និងយកសាកសពបោះចោលនៅក្នុងបឹងតែម្តង។
ពាក់ព័ន្ធនឹងករណីឃាតកម្មដ៏សាហាវនេះ រដ្ឋមន្ត្រីក្រសួងយុត្តិធម៌ ហ្វីលីពីន បាននិយាយថា រដ្ឋាភិបាលកំពុងស្វែងរកមនុស្សជាង៣០នាក់ផ្សេងទៀត ដែលអាចជាប់ពាក់ព័ន្ធនឹងករណីបាត់ខ្លួនរបស់ក្រុមលេងល្បែងបញ្ជល់មាន់ទាំងអស់នេះ។
កាលពីថ្ងៃទី១៧ ខែកក្កដា ឆ្នាំ២០២៥ង ក្រុមអ្នកមុជទឹក បានស្រង់យកបាវពីរចេញពីបាតបឹងតាល់ មានច្រកឆ្អឹងមនុស្ស ដែលគេសង្ស័យថា ជាឆ្អឹងរបស់ក្រុមអ្នកលេងក្បែងបញ្ជល់មាន់ ដែលបាត់ខ្លួនទាំងនោះ។
លោករដ្ឋមន្ត្រីក្រសួងយុត្តិធម៌ បានបញ្ជាក់ថា តាមរយៈការត្រួតពិនិត្យលើឆ្អឹងនៅក្នុងបាវទាំងនោះ បានបង្ហាញថា ឆ្អឹងនោះពិតជាសាកសពមនុស្សពិតប្រាកដមែន មានទាំងឆ្អឹងជំនីររបស់មនុស្សផងដែរ៕
