ត្បូងឃ្មុំ៖ បន្ទាប់ពីទទួលបានការបង្ហាត់បង្ហាញអំពីការដាំបន្លែសុវត្ថិភាពនៅក្នុងផ្ទះសំណាញ់ និងការធ្វើទីផ្សារពីខាងសហគមន៍តាសីសាមគ្គី នៅស្រុកថ្មគោល ខេត្តបាត់ដំបងរួចមក ម្ចាស់កសិដ្ឋានត្រសក់ផ្អែមត្បូងឃ្មុំ ដែលបានសាកល្បងដាំបន្លែស្លឹក និងបន្លែផ្លែ នៅខែកញ្ញា ឆ្នាំ២០២២ មានគម្រោងបង្កើនការដាំបន្លែក្នុងផ្ទះសំណាញ់ចំនួនប្រាំបីខ្នងថែមទៀត ដើម្បីឆ្លើយតបទៅនិងតម្រូវការទីផ្សារក្នុងតំបន់។
លោក លីម ផេង ម្ចាស់កសិដ្ឋានត្រសក់ផ្អែមត្បូងឃ្មុំ មានទីតាំងនៅស្រុកពញាក្រែក ខេត្តត្បូងឃ្មុំ បានឱ្យដឹងថា ក្នុងការដាំបន្លែសុវត្ថិភាពក្នុងផ្ទះសំណាញ់អស់រយៈពេលជិតបីឆ្នាំមកនេះ លោកកាន់តែមានទំនុកចិត្តខ្ពស់នៅក្នុងមុខរបរ នៅពេលការលក់បន្លែក្នុងផ្ទះសំណាញ់លក់បានតម្លៃសមរម្យនៅលើទីផ្សារ។
លោកបញ្ជាក់ថា «សព្វថ្ងៃកសិដ្ឋានខ្ញុំ មានផ្ទះសំណាញ់ចំនួន១២ខ្នង ក្នុងនោះមានដាំត្រសក់ផ្នែកចំនួនបីខ្នង, ដាំប៉េងបោះ និងម្ទេសចំនួនបីខ្នង និងផ្ទះសំណាញ់ប្រាំមួយខ្នងផ្សេងទៀតដាំបន្លែស្លឹក ហើយពេលខាងមុខនេះ ខ្ញុំមានគម្រោងពង្រីកផ្ទះសំណាញ់ដាំបន្លែថែមចំនួនប្រាំបីខ្នងទៀ ឱ្យគ្រប់២០ខ្នង ដែលនៅពេលសព្វថ្ងៃនេះយើងកំពុងតែធ្វើការទំនាក់ទំនងជាមួយខាងធនាគារអភិវឌ្ឍន៍ជនបទ និងកសិកម្មផងដែរ ដើម្បីស្នើសុំឥណទានដើម្បីសាងសង់ផ្ទះសំណាញ់បន្ថែម ព្រោះការដាំដុះបន្លែនៅតាមទីវាល កាលណាមានភ្លៀងញឹកញាប់ធ្វើឱ្យដំណាំលូតលាស់មិនល្អ ជាក់ស្តែងដូចដំណាំម្ទេសចិន ដែលខ្ញុំបានដាំកន្លងមកនេះ មានការជ្រុះស្លឹក ហើយការលូតលាស់មិនល្អ ដូចទៅការដាំនៅក្នុងផ្ទះសំណាញ់ ឬនៅរដូវប្រាំង»។
បើតាមលោក លីម ផេង គោលបំណងដែលឱ្យរូបលោកចង់សាងសង់ផ្ទះសំណាញ់ឱ្យគ្រប់២០ខ្នងនៅពេលខាងមុខនេះ ដោយសារលោកមើលឃើញតម្រូវការបន្លែនៅខាងខេត្តត្បូងឃ្មុំ លក់ទៅឱ្យឈ្មួញកណ្តាល គឺមិនទាន់គ្រប់ទៅនិងការចង់បាននៃទីផ្សារ។ ដូចនេះការសាងសង់ផ្ទះសំណាញ់ថែមនេះអាចឆ្លើយតបទៅតម្រូវពពួកបន្លែស្លឹកក្នុងមួយថ្ងៃបាន២០០គីឡូក្រាម ហើយប្រភេទប៉េងបោះ២០គីឡូក្រាម និងម្ទេសបានយ៉ាងតិច៣០គីឡូក្រាមនៅក្នុងមួយថ្ងៃ ដើម្បីឱ្យឈ្មួញយកទៅចែកចាយលក់បន្តនៅតាមតំបន់ផ្សេងៗ។
លោកបន្តថា ការបង្កើតកសិដ្ឋានត្រសក់ផ្អែមត្បូងឃ្មុំនេះ គោលបំណងសំខាន់ក្រៅពីរកប្រាក់ចំណូលសម្រាប់ផ្គត់ផ្គង់គ្រួសារ លោកចង់ផ្តល់ការងារដល់ពលរដ្ឋក្នុងតំបន់ ដោយមិនចាំបាច់ធ្វើចំណាកស្រុកទៅធ្វើការនៅក្រៅប្រទេស និងម្យ៉ាងទៀត មានគោលបំណងចង់ចូលរួមចំណែកផ្តត់ផ្គង់បន្លែសុវត្ថិភាពដល់ប្រជាពលរដ្ឋក្នុងស្រុក ដើម្បីកាត់បន្ថយការនាំចូលមកពីខាងក្រៅ។
សូមជម្រាបជូនផងដែរ ម្ចាស់កសិដ្ឋានត្រសក់ផ្អែមត្បូងឃ្មុំ មុនសម្រេចចិត្តបង្កើតកសិដ្ឋានដាំបន្លែអស់រយៈពេលជិតបីឆ្នាំមកនេះ ពីមុនលោកធ្លាប់ធ្វើការនៅក្រុមហ៊ុនលក់ជី និងថ្នាំកសិកម្ម នៅក្នុងស្រុកមួយ មានរយៈពេល១៣ឆ្នាំ។ ផ្អែកលើបទពិសោធន៍ការងានេះ បានធ្វើឱ្យលោកមានការយល់ដឹងអំពីបច្ចេកទេសប្រើប្រាស់ជី និងថ្នាំច្បាស់លាស់ក្នុងការការពារសត្វល្អិតចង្រៃបំផ្លាញបន្លែ និងឈានទៅដល់កាត់បន្ថយការចំណាយបានមួយចំនួនផងដែរ។
យោងតាមរបាយការណ៍ប្រមូលផលបន្លែប្រចាំខែឧសភា របស់កសិដ្ឋានត្រសក់ផ្អែមត្បូងឃ្មុំខាងលើបានបង្ហាញថា ការប្រមូលផលបន្លែស្លឹក និងបន្លែផ្លែ ក្នុងខែឧសភាពទទួលបានចំណូលសរុបជាងប្រាំបួនលានរៀល៕
