ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពូជា កាលពីល្ងាចថ្ងៃទី២៧ ខែមិថុនា បានមានប្រសាសន៍ថា វិស័យសហគ្រាសធុនមីក្រូ តូច និងមធ្យម កពុងតែដើរតួគ្របដណ្តប់លើសកកម្មភាពសេដ្ឋកិច្ចចម្រុះ និងបានបង្កើតការងារ មុខរបរ បង្កើតប្រាក់ចំណូល កាត់បន្ថយការចំណាកស្រុក ជួយប្រជាជនងាយរងគ្រោះឱ្យមានលំនឹងជីវភាព ជំរុញការអភិវឌ្ឍសេដ្ឋកិច្ច ស្ថេរភាពសង្គម រួមចំណែកដល់ការរីកចម្រើននៃវិស័យឯកជន។
សម្តេចធិបតីនាយករដ្ឋមន្ត្រី បានលើកឡើងដូច្នេះ ក្នុងពិពីសំណេះសំណាល និងពិសារអាហារមហាសាមគ្គី គ្រួសារសហគ្រាសធុនតូច និងមធ្យមនៅកម្ពុជា ( SME)ក្នុងឱកាសអបអរសាទរទិវាជាតិសហគ្រាសធុនមីក្រូ តូចនិងមធ្យមលើកទី២ នៅថ្ងៃទី២៧ ខែមិថនា ឆ្នាំ២០២៥។
នៅក្នុងឱកាសនេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកការរៀបចំព្រឹត្តិការណ៍ប្រចាំឆ្នាំនេះ មានគោលដៅលើកកម្ពស់និងផ្តល់តម្លៃដល់សហគ្រាសធុនមីក្រូ តូចនិងមធ្យមដែលជាមូលដ្ឋានគ្រឹះ និងជាកម្លាំងចលករជំរុញកំណើនសេដ្ឋកិច្ច និងការអភិវឌ្ឍប្រកបដោយភាពធន់ បរិយាបន្ន និងចីរភាព។ សមិទ្ធផល និងវឌ្ឍនភាព ផ្នែកសង្គមសេដ្ឋកិច្ច ដែលកម្ពុជាសម្រេចបានក្នុងរយៈពេលជាងពីរទសវត្សរ៍ បានបង្កើតមោទនភាពជាតិជាថ្មីនេះ គឺការឈានឆ្ពោះទៅការចាកចេញពីក្រុមប្រទេសមានការអភិវឌ្ឍតិចតួចនៅឆ្នាំ២០២៩។
សម្តេចធិបតីលើកឡើងថា សហគ្រាសធុនមីក្រូ តូច និងមធ្យមនៅកម្ពុជាពិតជាបានចូលរួមចំណែកយ៉ាងសំខាន់ ហើយត្រូវមានតួនាទីគន្លឹះក្នុងដំណើរឆ្ពោះទៅគោលដៅនេះ។ លក្ខខណ្ឌពាណិជ្ជកម្ម ជំនួយការអភិវឌ្ឍផ្លូវការ និងភាពអនុគ្រោះ ដែលប្រទេសជាមិត្ត ដៃគូអភិវឌ្ឍន៍បានផ្តល់ឱ្យកម្ពុជា នឹងមានការប្រែប្រួល និងកាន់តែតានតឹងជាមុន ។ ការណ៍នេះទាមទារឱ្យគ្រប់តួអង្គទាំងវិស័យសាធារណៈ វិស័យឯកជន ពិសេសសហគ្រាសគ្រប់ប្រភេទត្រូវបង្កើនសមត្ថភាព ព្រមទាំងអភិវឌ្ឍន៍អាជីវកម្មរបស់ខ្លួនជាប្រចាំ ដើម្បីទទួលបានទំនុកចិត្តពីអតិថិជន អាចបន្តប្រកួតប្រជែងនៅក្នុងសង្វៀនសេដ្ឋកិច្ច។ គោលដៅឆ្នាំ២០២៩ជាវិញ្ញាសារមិនសាមញ្ញពេកនោះទេ ប៉ុន្តែរាជរដ្ឋាភិបាលជឿជាក់ថា យើងអាចសម្រេចបានរួមគ្នា។
សម្រេចធិបតីបន្តថា ស្រពេលកម្ពុជាបន្តទទួលបានកំណើនការវិនិយោគផ្ទាល់ពីបរទេសខ្ពស់ ហើយកំណើននៅក្នុងវិស័យឧស្សាហកម្មកំពុងឈានមុខគេ និងអាចសម្រេចបានក្នុងរង្វង់៧,៨ភាគរយនៅក្នុងឆ្នាំ២០២៥ ។ និន្នាការនេះបានផ្តល់នូវកាលានុវត្តភាពថ្មីៗសម្រាប់សហគ្រាសធុនមីក្រូ តូច និងមធ្យមកម្ពុជាក្នុងការចូលរួមពង្រីកពិពិធកម្មសេដ្ឋកិច្ច និងផ្សារភ្ជាប់ខ្លួនជាមួយខ្សែច្រវាក់ផ្គត់ផ្គង់តំបន់។
សហគ្រាសធុនមីក្រូ តូចនិងមធ្យម បាននិងកំពុងដើរតួនាទីយ៉ាងសំខាន់ក្នុងការផលិតនិងផ្គត់ផ្គង់ និងផ្តល់សេវា ហើយកំពុងខិតខំអភិវឌ្ឍន៍ខ្លួន ឆ្លើយតបនិន្នាការថ្មីៗ ជាពិសេសក្នុងបរិបទនៃការប្រែប្រួលតម្រូវការទីផ្សារ លក្ខខណ្ឌតម្រូវផ្នែកបរិស្ថាន និងការរីកចម្រើនជឿនលឿននៃបច្ចេកវិទ្យា។ រាជរដ្ឋាភិបាលកម្ពុជានៅក្នុងអាណត្តិនេះ និងអាណត្តិកន្លងទៅ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវគោលនយោបាយ និងផែនការយុទ្ធសាស្ត្រ និងវិធានគាំទ្រនានាដើម្បីអភិវឌ្ឍន៍វិស័យសហគ្រាសធុនមីក្រូ តូច និងមធ្យមកម្ពុជា។ រាជរដ្ឋាភិបាលនីតិកាលទី៧នៃរដ្ឋសភា មានឆន្ទៈ និងមានការប្តេជ្ញាចិត្តក្នុងការបន្តអនុវត្តគោលនយោបាយ និងការរៀបចំគាំទ្រ និងលើកទឹកចិត្តថ្មីថែមទៀតដើម្បីអភិវឌ្ឍន៍វិស័យនេះ។ ការដាក់ចេញនូវគោលនយោបាយ យុទ្ធសាស្ត្រអាទិភាពទាំង៦ រួមទាំងយុទ្ធសាស្ត្រជាតិ ស្តីអំពីការអភិវឌ្ឍសេដ្ឋកិច្ចក្រៅប្រព័ន្ធ ក្នុងគោលបំណងលើកកម្ពស់ គាំពារ និងពង្រឹងសមត្ថភាព ផលិតភាព និងភាពធន់នៃសេដ្ឋកិច្ច ដោយលើកទឹកចិត្តការឈានចូលទៅក្នុងប្រព័ន្ធ ដើម្បីពង្រឹងភាពធន់ ភាពប៉ាន់ប្រមាណបាន ភាពរីកចម្រើនក្នុងអាជីវកម្ម មុខរបរ ការងារចិញ្ចឹមជីវិតនៅកម្ពុជា ។
សម្តេចធិបតី ហ៊ុន ម៉ាណែត មានប្រសាសន៍សង្កត់ធ្ងន់ថា រាជរដ្ឋាភិបាលបាននិងកំពុងធ្វើពិពិធកម្មទីផ្សារ ទាំងក្នុងតំបន់ និងសកលតាមរយៈ៖ ទី១) ការជំរុញលើកកម្ពស់សហគ្រាសធុនមីក្រូ តូច និងមធ្យមឱ្យក្លាយជាខ្សែច្រវាក់ផលិតកម្ម ដែលផ្តល់តម្លៃបន្ថែមខ្ពស់ដែលបម្រើជាឧស្សហាកម្ម និងប្រតិកម្ម។ ទី២) ការជំរុញការរៀបចំបណ្តុំសហគ្រាសធុនតូច និងមធ្យមឱ្យកាន់តែច្រើន ទី៣) ការជំរុញអនុវត្តគោលការណ៍បរិការសង្គមនិងអភិបាលកិច្ច ក្នុងចំណោមសហគ្រាសធុនមីក្រូ តូចនិងមធ្យមដើម្បីចូលរួមចំណែកដល់ការអនុវត្តជានិន្នាការសកល។ ទី៤) ការជំរុញការលើកកម្ពស់ស្តង់ដានិងភាពប្រកួតប្រជែងផលិតផលក្នុងស្រុក និងទី៥) ការជំរុញការកសាងប្រព័ន្ធអេកូឡូស៊ី សហគ្រាសធុនមីក្រូ តូច និងមធ្យមដែលទាមទារការចូលរួម និងគាំទ្រពីគ្រប់តួអង្គពាក់ព័ន្ធទាំងអស់រួមទាំងប្រជាពលរដ្ឋដែលជាអ្នកប្រើប្រាស់ផលិតផលផងដែរ។
អ្នកឧកញ៉ា តែ តាំងប៉ ប្រធានក្រុមប្រឹក្សាភិបាលសមាគមមូលនិធិសម្តេចតេជោមានប្រសាសន៍ថា វត្តមានរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាអញ្ចើញចូលរួមក្នុងពេលនេះ ពិតជាបានឆ្លុះបញ្ចាំងឱ្យឃើញពីការយកចិត្តទុកដាក់ខ្ពស់ចំពោះការងាររបស់សមាគមមូលនិធិសម្តេចតេជោ ក្នុងបេសកកម្មគាំទ្រសហគ្រាសធុនមីក្រូ តូច មធ្យម និងសិប្បកម្មនៅកម្ពុជា ដើម្បីរួមចំណែកអភិវឌ្ឍន៍សេដ្ឋកិច្ចស្របតាមយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា អាណិត្តទី៧នៃរដ្ឋសភា។
ឯកឧកញ៉ាបានបន្តថា ព្រឹត្តិការណ៍នេះគឺជាការលើកទឹកចិត្តដ៏សំខាន់ និងជាការផ្តល់តម្លៃដល់សហគ្រាសធុនមីក្រូ តូច និងមធ្យមនៅកម្ពុជា ក្នុងការចូលរួមចំណែកបង្កើតការងារ ជំរុញការកែច្នៃ ពង្រីកទីផ្សារក្នុងស្រុក និងទីផ្សារអន្តរជាតិ ដែលមានក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ជាស្ថាប័នបង្គោលដឹកនាំសម្របសម្រួល។
សមាគមមូលនិធិសម្តេចតេជោ បានបង្កើតឡើងនៅឆ្នាំ២០២០ មានគោលបំណងដើម្បីរួមចំណែកគាំទ្រ និងជំរុញដល់ការអភិវឌ្ឍសហគ្រាសធុនមីក្រូ តូច និងមធ្យមនៅកម្ពុជា តាមរយៈការបណ្តុះបណ្តាលបច្ចេកទេសជំនាញទីផ្សារ និងការដោះស្រាយបញ្ហាប្រឈមនានាស្របតាមគោលនយោបាយ និងចក្ខុវិស័យរបស់រាជរដ្ឋាភិបាល៕
