ម៉ានីល៖ ក្រសួងកសិកម្មហ្វីលីពីន អាចនឹងអនុញ្ញាតឱ្យមានការនាំចូលខ្ទឹមបារាំង និងខ្ទឹមក្រហមនៅចុងឆ្នាំនេះ ដើម្បីទប់ស្កាត់ការឡើងថ្លៃ ខណៈការព្យាករណ៍ចុងក្រោយបង្ហាញថា ការផ្គត់ផ្គង់គ្រឿងទេសនៅទូទាំងប្រទេសអាចនឹងមិនមានរហូតដល់ខែធ្នូនោះទេ។
រដ្ឋមន្ត្រីក្រសួងកសិកម្ម លោក ហ្វ្រង់ស៊ីស្កូ ទីវ ឡូរ៉េល (Francisco Tiu Laurel) បាននិយាយថា លោកនឹងអនុម័តលើការនាំចូលខ្ទឹមបារាំងក្រហម និងខ្ទឹមបារាំង នៅចុងឆ្នាំ២០២៥នេះ ដើម្បីបង្កើនការផ្គត់ផ្គង់ក្នុងស្រុក និងបំពេញតម្រូវការរបស់ប្រទេស។ លោកបានបញ្ជាក់ថា ការិយាល័យឧស្សាហកម្មរុក្ខជាតិ មិនទាន់បានផ្តល់អនុសាសន៍ណាមួយនៅឡើយទេ អំពីបរិមាណខ្ទឹមក្រហម និងខ្ទឹមបារាំង ដែលនឹងត្រូវនាំចូលនៅឆ្នាំនេះ។
ការផ្តល់អនុសាសន៍ពីការិយាល័យឧស្សាហកម្មរុក្ខជាតិ ត្រូវបានគេរំពឹងថា នឹងបញ្ជូនមកដល់លោក ហ្វ្រង់ស៊ីស្កូ នៅដើមសប្តាហ៍ដំបូងនៃខែកក្កដាខាងមុខនេះ ដើម្បីរកដំណោះស្រាយសម្រាប់ខ្ទឹមក្រហម និងខ្ទឹមបារាំងនៅសេសសល់ ដែលត្រូវប្រមូលផលក្នុងខែមិថុនានេះ។
យោងតាមការិយាល័យឧស្សាហកម្មរុក្ខជាតិ បានឱ្យដឹងថា ស្តុកខ្ទឹមក្រហមរបស់ប្រទេសហ្វីលីពីន គិតត្រឹមថ្ងៃទី១៣ ខែមិថុនា ឆ្នាំ២០២៥ មានចំនួន៨៥ ៧៥៥តោន។ ចំណែក បរិមាណខ្ទឹមក្រហមប្រហែល៣ ៥៤៧តោន ដែលគេរំពឹងថា នឹងត្រូវប្រមូលផលរហូតដល់ចុងខែមិថុនានេះ។
បើតាមការិយាល័យឧស្សាហកម្មរុក្ខជាតិ បានបញ្ជាក់ថា ស្តុកខ្ទឹមសរុប ដែលរំពឹងទុកគឺមានបរិមាណប្រហែល៨៩ ៣៣២តោន ដែលអាចគ្រប់គ្រាន់សម្រាប់តម្រូវការក្នុងស្រុកបន្តរហូតដល់ថ្ងៃទី១៣ ខែវិច្ឆិកា ឆ្នាំ២០២៥។
ទន្ទឹមនឹងនេះដែរ ការផ្គត់ផ្គង់ខ្ទឹមបារាំង មានបរិមាណដល់១១ ៧៤០តោន អាចមានរហូតដល់ថ្ងៃទី០២ ខែកញ្ញា។ ចំណែកខ្ទឹមបារាំងប្រមាណចំនួន១៣៧តោន ត្រូវប្រមូលផលរហូតដល់ចុងខែមិថុនា។
ប្រទេសហ្វីលីពីននឹងត្រូវការការផ្គត់ផ្គង់ខ្ទឹមក្រហមជិត៣២ ០០០តោន ដើម្បីធានាបាននូវស្តុកគ្រឿងទេសគ្រប់គ្រាន់រហូតដល់ដំណាច់ឆ្នាំ ដោយផ្អែកលើការប្រើប្រាស់ទូទាំងប្រទេសប្រចាំថ្ងៃជាង៥៨៥តោន។ សម្រាប់ខ្ទឹមបារាំង ប្រទេសហ្វីលីពីអាចត្រូវការស្តុកបន្ថែមប្រហែល១៣ ៥០០តោន ដើម្បីធានាការផ្គត់ផ្គង់ពេញមួយឆ្នាំ ដោយផ្អែកលើការប្រើប្រាស់ប្រចាំថ្ងៃជាង១៤៦តោន៕
