បន្ទាយមានជ័យ៖ នាព្រឹកថ្ងៃទី២៥ ខែមិថុនា ឆ្នាំ២០២៥ នេះ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ធនាគារ ARDB) បានអញ្ជើញជាអធិបតីក្នុងពិធីសំណេះសំណាលជាមួយកសិករ និងឈ្មួញ អំពីបញ្ហាប្រឈមទីផ្សារដំឡូងមី និងពោតក្រហម នៅតាមបណ្តាខេត្តមួយចំនួនរបស់កម្ពុជា។
ពិធីសំណេះសំណាលនេះ បានសហការរៀបចំឡើងដោយក្រុមហ៊ុន ហង្ស ហាវេស អេហ្រ្គីខលឈ័រ ដោយមានអ្នកចូលរួមពីក្រុមកសិករផលិត និងពាណិជ្ជករប្រមូលទិញប្រមាណជាង១២០រូប។
ក្នុងមួយឆ្នាំៗ ដំឡូងមីត្រូវបានផលិតដោយកសិករលើផ្ទៃដីដាំដុះប្រមាណជាង៨៤ម៉ឺនហិកតា ដោយផ្តល់ទិន្នផលស្រស់ប្រមាណ១៥លានតោន និងផ្តល់ផលសេដ្ឋកិច្ចប្រមាណណ១,២៥៥លានដុល្លារ គិតត្រឹមឆ្នាំ២០២៤។ ចំណែកពោតក្រហមប្រមាណជាង ២៨ម៉ឺនហិកតា ដោយផ្តល់ទិន្នផលស្រស់ប្រមាណមួយលានតោន និងផ្តល់ផលសេដ្ឋកិច្ចប្រមាណជាង២00លានដុល្លារ។ ដំឡូងមីត្រូវបានដាំដុះនាដើមរដូវចាប់ពីខែមីនា និងប្រមូលផលជាបន្តបន្ទាប់ ចាប់ពីខែកក្កដា ជារៀងរាល់ឆ្នាំ។ ដោយឡែក ពោតក្រហមត្រូវបានដាំដុះចាប់ពីខែមេសា ជាបន្តបន្ទាប់ និងប្រមូលផលចាប់ពីខែកក្កដា។
នៅក្នុងពិធីនេះ ឯកឧត្តមបណ្ឌិត កៅ ថាច បានបញ្ជាក់ជូនអំពីការយកចិត្តទុកដាក់ខ្ពស់បំផុតរបស់រាជរដ្ឋាភិបាលចំពោះជីវភាពរបស់ប្រជាពលរដ្ឋ ជាក់ស្តែងបានដាក់ចេញនូវកម្មវិធីហិរញ្ញប្បទានពិសេស ជាបន្តបន្ទាប់នាពេលកន្លងមក សម្រាប់ប្រមូលទិញស្រូវ និងកសិផលមូយចំនួនផ្សេងទៀតពីប្រជាកសិករ នាពេលរដូវប្រមូលផលធំជារាងរាល់ឆ្នាំ។
ចំពោះដំណាំដំឡូងមី និងពោតក្រហម, ឯកឧត្តមបណ្ឌិត កៅ ថាច បានអំពាវនាវដល់ពាណិជ្ជករ ឬឈ្មួញបន្តប្រមូលទិញដំឡូមីពីបងប្អូនកសិករ ហើយធនាគារ ARDB បន្តគាំទ្រផ្នែកឥណទាន ដើម្បីដោះស្រាយកង្វល់កង្វះទ្រព្យធានាបំណុលដោយបានប្រើប្រាស់ជាមួយគ្រឹះស្ថានធនាគារឯកជនអស់ហើយនោះ។ ឯកឧត្តមបណ្ឌិតបានផ្តល់ជាជម្រើសដំណោះស្រាយតាមរយៈ (១) យន្តការកិច្ចសន្យាត្រីភាគីលើប្រតិបត្តការទិញ-លក់ដំឡូងមី-ពោត រវាងឈ្មូញប្រមូលទិញ- ក្រុមហ៊ុននាំចេញ – ធនាគារ ARDB ហើយលំហូរសាច់ប្រាក់ទូទាត់លើការប្រមូលទិញដំឡូងមី-ពោត ត្រូវធ្វើឡើងតាមរយ: ARDB Mobile App។
កិច្ចសន្យាទិញ-លក់រវាងក្រុមហ៊ុននាំចេញ និងពាណិជ្ជករប្រមូលទិញដំឡូមី-ពោត ជាយន្តការជួយសម្រួលបន្ទុកដល់ពាណិជ្ជករ ឬឈ្មួញប្រមូលទិញមិនមានទ្រព្យធានាបំណុល ក្នុងការទទួលបានឥណទានពីធនាគារ ARDB។ និង (២) យន្តការយកសន្និធិដំឡូងមី និងពោតក្រហមស្ងួតដើម្បីធ្វើជាទ្រព្យធានាឥណទាន (ទំហំឥណទាន៧០% នៃតម្លៃសន្និធិ) ដោយតម្រូវឱ្យមានកិច្ចសន្យាទិញ-លក់ច្បាស់លាស់ជាមួយក្រុមហ៊ុននាំចេញ និងឬក្រុមហ៊ុនកែច្នៃ។
ជាចុងក្រោយ ឯកឧត្តមបណ្ឌិត កៅ ថាច បានអំពាវនាវដល់បងប្អូនប្រើប្រាស់រូបិយវត្ថុជាតិ គឺប្រាក់រៀល ក្នុងប្រតិបត្តិការទិញ-លក់កសិផលនៅតាមមូលដ្ឋានរៀងៗខ្លួនដើម្បីកាត់បន្ថយនូវហានិភ័យនៃអត្រាប្តូរប្រាក់៕
